(كرامت امام رضا(ع)به نادرميانجي)

رفقا دن بيري نقل ايلدي بوجرياني

            علي اكبردي آدي شهرتي ده سلماني

اهل تقوادي عمل دن تانينارانسانلار

            ايش ده مسئول گزينش دور اونون عنواني

سوروشاندا بيريسين چوخ ايپي محكم چكمز

           دئير انسان  دور اولارهربشرين نقصاني

سئورم هم ئوزيني همده دانشماقالاريني

           هم قاتاردوز سوزينه همده قاتارمعناني

بيرگوني صحبت ائدن وقت ده سوزگلدي دئدي

            فقط آلله هامو دان ياخشي تانور انساني

شهريميز ده دئدي وار نادر آديندا بير شخص

            ظاهرا ساده دي باطن ده ولي نوراني

چوخ نماز اهلي دي عاشق دي اذان وئرمگ ايچون

            گرچه ركعت ده قنوتينده اولارنقصاني

ئورگي سئوديگي  سوزلرله عبادت ايلر

            ولي آلله ه ئورك دن دي اونون ايماني

واردي اولدن امام زاديه تاي سيز عشقي

            ئورگين ده اولان حاجاتين اودور درماني

هاردا هيئت سسي گلسه اودا حتما واردور

            قاراپرچم دور اونون دعوتينين عنواني

هيئت عازم دي خراسانه دئيوللر بيرگون

            بو دااصرار ائليور گورمك ايچون سلطاني

چونكي چوخ ساده دي راننده ده باخمور سوزينه

            دئيور اسرار ائلمه يوخدي سنه امكاني

يالوارير بلكه بيرآز رحمه گله راننده

            اودا گورمور ئوركين ده  اوقوپان طوفاني

چيخور هيئت بوقالور چاره ندور ال بوش دور

            ئوز ي بيرده تانيمور تهراني ياسمناني

يئتشيرمشهده هيئت اولور اول گئجه سي

            ئوزي راننده بوجور نقل ائليور جرياني

آقاني عالم روياده گورور غمگين دور

            سايموراصلا ده بويولدان يئتشن مهماني

عرض ائدير جان سنه قربان نه گناه ائيلموشم

            مني آگاه بويور تاائليوم جبراني

بيورور نادري سن يئرده قويوب گلدين چون

            بورويوب دور بيليسن ناله سي شهرستاني

بير ماشين دااوفقط من بئگنن زائريدي

            يئرده قويدون نيه بيز لربگنن انساني

دئيور القصه بوحالتده آيلديم يوخودان

            فوري تعبير ائلديم من ئوزومه روياني

اشتباهيم ائليوبدور آقامي ناراحت

            بيلديم اوز دادينه نوكر چاغروب مولاني

اولماسيدي بوجماعتله قرار داديم اگر

            قيدرديم اودقيقه وطنه پنهاني

اودورهيئت بويوگيند ن چاغروب اذن  آلديم

            قئيدم تيز گتيرم عاشق سرگرداني

علتين آلدي خبر نقل ائلديم گوردوگيمي

            بوش قئيتديم آپارام (نادر بودوراني)

يوز گوزين دن اوپوب عذرايستديم آلديم ئورگين

            دئديم آماده اول اوللام گوزيوين قرباني

سني سلطان خراسان ئوزي دعوت ائليوب

            يوليوي گوزلوري صحني حرمي ايواني

بوقئيتمك سنه خاطردي وارام خدمت ده

            اولدي آماده خراسان قئيتدو خ آني

((اشرفي))منقلب اولدي آقانين لطفيندن

            اونا دا لطف ائله مولي  سني ((نادر))جاني