• جمعه 10 فروردین 03


راه شام زبانحال حضرت لیلا سلام الله علیها -( قانون آخدوقجا یوزه زلف مطرّادن اوغول )

4162

راه شام
زبانحال حضرت لیلا سلام الله علیها

 


قانون آخدوقجا یوزه زلف مطرّادن اوغول
آپارور تاب، ‌توانا دلِ لیلادن اوغول

سن امامت گونونون کوکب رخشنده سی سن
نجه کوکب، او گونون جلوه ی تابنده سی سن
جلوه دن دوشسه گونون علّت پاینده سی سن
باتا سنسیز یری وار مشرق اقصادن اوغول

گوسترور یاره لرون خنجر فولاد اثری
گَتدی اظهاره باشون نقطه ی شقّ القمری
سنی بو حاله سالان ای دل لیلا ثمری
بهره مند اولمیا هرگز ایکی دنیادن اوغول

بیله که اوخلاری سیننده علی سان ویروسن
تیر هجرانه نشان سینمی خوش سان ویروسن
روحیمی جسمیوه باخدوقجا آلورسان ویروسن
ویرمیوب باش بیله اعجاز مسیحادن اوغول

بسلدیم من سنی بو سینه ده چوخ عزّتیله
سینه چاک اولّام اوغول ایمدی غم فرقتیله
باخارام پیکر صد پاره وه مین حسرتیله
آه بو درد دل و حسرت بی جادن اوغول

سن جمال حقه مرآت بو وادی سنه طور
من کلیمون بو تمنّاده گورم جلوه ی نور
دیمز اَرنی رخ مستوریوه سرگرم حضور
پاسخ لَن ایشیدوب اَرنیِ موسادن اوغول

سن بو قربانگه عشقی ایله آباد ایلدون
غم خلیلین نه قدر واردی منا شاد ایلدون
هجریوه سعی و صفادن منی ارشاد ایلدون
ایلدون پیش قدم هاجر و حوّادن اوغول

نه قدر یاره سی وار سینه ده بو گُل بدنون
اوندان آرتوخ یارا وار دلده بو محنت زده نون
بیله گُلگون ایدن آل قانیله وجه حسنون
آشکارا گورونور سرّ سُوِیدادن اوغول

صورتون حُسن خدادادیله سرمایه سی وار
طیّ ایدوب حسن و جمالین نه قدر پایه سی وار
عارضون قرمزی قاندان ایله پیرایه سی وار
گوی سبقت آپارور هر رخ زیبادن اوغول

قانلی زلفونله ووروب مه یوزیوین هاله سینی
قطره ی خون دل ایلوب گُل تر ژاله سینی
دل نشین ایلموسن نای دلیم ناله سینی
یوخسا نالم گذر ایلردی ثریّادن اوغول

ایسترم ناله ی جانسوزیمی دلدار ایشیده
ایستمم شیون و فریادیمی اغیار ایشیده
حیف دور بلبل و گُل صحبتینی خار ایشیده
ناله هرچند برازنده دی ثکلادن اوغول

سن شهید اولدون اوغول تشنه لب دریاده
منده اشکیله گَتورّم یم غم ایجاده
اولی بیر گون بیر اولار بو ایکی یم دنیاده
بو سوسوز دشت اولی سیراب ایکی دریادن اوغول

شاهزاده سنه چوخ نوحه مفصّل یازیلوب
گون کیمی شهرتی وار شرح مطوّل یازیلوب
من یتیمم سوزوم هرچند که مجمل یازیلوب
گوستروب بدر سخن فکرت یلدادن اوغول

 

شاعر : مرحوم حاج حسین عابد متخلّص به یتیم معروف به مولانا ( استاد مولانا یتیم )

  • دوشنبه
  • 17
  • مهر
  • 1396
  • ساعت
  • 9:17
  • نوشته شده توسط
  • علی ببیرپور

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران