دیر راهب

آچ گوزلریوی راهب اولا جانیوه قربان
عیسی ئوزی حق اوسته اخان قانیوه قربان

بو دیر نصارایه شرافت گتیروبسن
الله ئوزی شاهددی کی عزت گتیروبسن
بیر عده باشوندا اوشاق عورت گتیروبسن
قول باغلی گلن غمزده طفلانوه قربان

ناخوشدی چوخی حیف اولا بسترلری یوخدی
قول باغلیدیلار اوچماقا شهپرلری یوخدی
گیسولری روبندیدی معجرلری یوخدی
عفتلی نجابتلی اسیرانیوه قربان

بعضی سی دئیور ققافله سالاریمیز ئولدی
بعضی سی دئیور طفل لبن خواریمیز ئولدی
بعضی سی دئیور قولسوز علمداریمیز ئولدی
منده دیورم طفلووه اصلانیوه قربان

توکدوم سو گوزل لبریوون قانین اپاردی
بیر منظره گوردوم ولی غم قلبیمی یاردی
گوردوم قوریان قانووین آلتدا یارا واردی
بیردن دئدیم ای وای لب و دندانیوه قربان

علت نَدی شام اهلی عناد اوسته دوروبلار
دنیایه گوره رشتۀ ایمانی قیروبلار
آیا نیه سرنیزیه قرآنی ووروبلار
داوود اولا بو لهجۀ قرآنیوه قربان

بو خادم رنجوره غنیمتدی وصالون
قویدون منه منت ننوین شیری حلالون
سرمست ایلیوبدی منی نورانی جمالون
حوریلر اولا صورت نورانیوه قربان

آزدور نَقَدَر نوکرون ائتسه سنه خدمت
سن بیل او کلیسایه گَلَن غمزده عورت
وئر بو قوجالان نوکریوه قول شفاعت
احسان ائله ئوز خادمیوه جانیوه قربان

شاعر : حاج حسین غفاری