• پنج شنبه 6 اردیبهشت 97

مجلس یزید با مقدمه انقلابی -( ای دل شَهِدالله شهدا ئولمیوب ئولمز )

458

مجلس یزید با مقدمه انقلابی

 

ای دل شَهِدالله شهدا ئولمیوب ئولمز
پاینده دی مردان خدا ئولمیوب ئولمز


ممکندی که مجنون ئوله لیلا چیخا یاددان
فرهاد کیمی وامق و عذرا چیخا یاددان
مشگلدی ولی اهل تولا چیخا یاددان
هیهات که ایمان ئوله تقوا چیخا یاددان
خوش خاطره لر زنده دی حاشا چیخا یاددان
دلداره قسم اهل ولا ئولمیوب ئولمز


من که اوزاقام عشق وفا دایره سیندن
عاشقلرین آیا نه یازوم خاطره سیندن
معناده گلور سس شهدا مقبره سیندن
لال اولما دانش جبهه لرین منظره سیندن
خوش منظرۀ میمنه و میسره سیندن
بُلسونله که اخلاص و وفا ئولمیوب ئولمز


قانلار که آخوب دجله و اَروَنده توکولدی
بلبلر ایدوب نغمه گلستان اوزی گولدی
باغلار کیمی داغلار دولوسی لاله دی گولدی
بو منظره نی سرو گوروب قدی بوکولدی
قرآن ئوله بطلان قالا انصاف دگولدی
کیم دینه گوره اولسا فدا ئولمیوب ئولمز


ای مُغرض اولان مکتب قرآنه دولاشما
نامحرم اولوب خون شهیدانه دولاشما
انصاف ایله حیثیت ایرانه دولاشما
پروانه لرین جمعینه بیگانه دولاشما
ای خوار محقر بو گلستانه دولاشما
گلزار شهادتده صفا ئولمیوب ئولمز


فکر ایتمه اوجوز قیمته وحدت اله گلدی
مین لاله ایاقلاندی بو گل حاصله  گلدی
ای تفرقه افکن نیه رأیون بله گلدی
حقدن نه گوروبسن نظرون باطله گلدی
دل یاره سی ورما داخی رهبر دله گلدی
ایراندا اَمین الفُقَها ئولمیوب ئولمز


ای دل داشیلان شیشه مغایردی همیشه
ایستور داش اؤرکلر وورا تیشه سنا شیشه
سنسین گوروم اهریمن الینده ایتی تیشه
مین یول ایلدون تجربه ای تفرقه پیشه
شیشه سینار اما قوروماز یرده کی ریشه
خفّاشه دیون شمس ضُحا ئولمیوب ئولمز


بو جبهه ده مین لالۀ احمر قانی واردی
هر مسجد و محرابیده حیدر قانی واردی
شریان مسلماندا پیمبر قانی واردی
بو سینه حسینونکیدی اکبر قانی واردی
هر بیرصودامر طفلیده اصغرقانی واردی
ایران دئمه، دئ کرب و بلا ئولمیوب ئولمز


همت کمرین که بلینه باغلادی زینب
داغ شهدائیله اؤرک داغلادی زینب
اشراره جسارت یولونی باغلادی زینب
تاریخ اوخی هر یرده دیمه آغلادی زینب
ایستوردی یاتا دین علمی، ساخلادی زینب
بو جلوه بو نهضت ابدا ئولمیوب ئولمز


آه ای شهدا طایفه سی همّتوز اولسون
حیثیّتوزی حفظ ایدون اَمنیّتوز اولسون
گر ایستیه سوز عزّتِ بی منتوز اولسون
اوّلده گرک زینبیله  اُلفتوز اولسون
حق مکتبین احیا ایلیون جرأتوز اولسون
بلسونله که ایمان و حیا ئولمیوب ئولمز


زینب که جگردن شررمحنته یاندی
یتمیش ایکی قربان ویروب ایثاری عیاندی
قارداش آدی دلده شرف اسلامه قازاندی
مین دردیله هم کوفه نی هم شامی دولاندی
دشمن قاباقندا ولی مردانه دایاندی
دخت اَسَدُالله غَزا ئولمیوب ئولمز


فکرایتدی یزید حاصل اولوب کام ونتایج
اوّل  ایلدی  شایعه   بازارینی  رایج
دربارینه جمع اولدی سفیران خوارج
توکدوم دیدی قان اولمیا دیندن بیری خارج
زهرا قیزی بیردن دیدی یا باب الحوائج
سس گلدی که گلبانگ رسا ئولمیوب ئولمز


دلبند علی بانوی صدّیقه رَویّه
زهرای زمان صاحب اوصاف و سجیّه
گوردی هیجان وقتیدی نه جای تقیّه
یوزدوتدی یزیده او خطیب علویّه
سسلندی گرک فاش اولا الان بو قضیّه
عالم بُله شاه شهدا ئولمیوب ئولمز


ای پست فرومایه و نابخرد سگباز
فکر ایتمه ایدوبسن بیزی اندوهیله دمساز
مین پشّه کمند آتسادا دوشمز تورا شهباز
یعنی نه بلا گلسه بنی هاشمی یورماز
سردارم اسیرانه بو قزلار منه سرباز
روحیۀ  گرم اُسرا ئولمیوب ئولمز


فکر ایتمه که دنیانی بیزه تنگ ایلیوبسن
نفرین سنه، اللهیله سن جنگ ایلیوبسن
سیرونده شرف قافله سین لنگ ایلیوبسن
خلقین الین آلودۀ نیرنیگ ایلیوبسن
اسلامی سن ئولدورمگه آهنگ ایلیوبسن
حق مکتبی یَابنَ الطُّلقا ئولمیوب ئولمز


صدپاره اولان سویگلومه پاره تنم من
بل شیر خدانین قیزیام شیرزنم من
عصرخفقان شاهد صلح حسنم من
نهضتده وکیل الشُّهدا بت شکنم من
ئولسمده سنی شامیده رسوا ایدرم من
اما بُلورم آل عبا ئولمیوب ئولمز


گر من دانشام قاضی فرزانه یانندا
قصرون چکرم شعلیه ویرانه یانندا
گورموب بیزی عالم گوزی بیگانه یانندا
اینجیتمه آنام روحینی ریحانه یانندا
وورما  یارالی شمعینی پروانه یانندا
الله بیلی مصباح هدا ئولمیوب ئولمز


ایو صاحبی ایستر اولا آسوده قوناقلار
ای ظالم اوتان چوخ یورولوبلار بو اوشاقلار
قمچی یری قولاردا قباردی چوخ ایاقلار
یورقون بالالار دیزلرین آهیله قوجاقلار
آرام اوتورون قرآن اخور قانلی دوداقلار
ایستور دیه آیات خدا ئولمیوب ئولمز

 

شاعر : ولی الله کلامی زنجانی

  • شنبه
  • 29
  • مهر
  • 1396
  • ساعت
  • 8:49
  • نوشته شده توسط
  • علی ببیرپور

ارسال دیدگاه



ورود با حساب گوگل

ورود کاربران