قرا گیوبدی فاطمه  بو گون آتا عزاسینه
توکور سرشک چشمینی خانم حسن بالاسینه

واگیر:
دیور اؤرکدن گهی آتام وای
سولان دوداقی حسن بالام وای

ویروبدی قلبینه یارا پیمبرون بو محنتی
نقدر اذیّت ایلیوب او باغریقانه امّتی
سالوب توان و تابیدن اونی آتا مصیبتی
یانور غریب آتاسینون بلا و مبتلاسینه

اسیر عشق یار اولان یقین بلانی آختارار
همیشه محنت وبلا غم آشنانی آختارار
یامان گونونده قزلارون گوزی آتانی آختارار
همیشه سس وئرر آتا بالاسینون صداسینه

دیور  غمونده آی بابا یانوب جهانی داغلارام
منیم که یوخدی بیر کسیم عذاره اشکی باغلارام
نه وار آتام نه قارداشیم ئوزوم سنه تک آغلارام
گرکدی صبر ائده بلی مشیّت اقتضاسینه

سنون غمونده آی بابا اشدّ اولوب حسن غمی
بُؤلوبدی اوچ پر اوخ کیمین بو شرحه شرحه سینه می
خیانت ایلیوب اونا ائوینده یار و محرمی
گرک یته او بی وفا جهاندا ئوز جزاسینه

توکوبدی زهری کوزیه او بدمرام و کینه جو
اویاندی نصف شب حسن ایچوب بدون گفتگو
جگرلرینی دوغرادی اود اولدی عاقبت بو سو
جهانی آغلادار بالام بو غملی ماجراسینه

کیمون سولوب حسن کیمی جهاندا باغ و گلشنی
او باوفانون هر زمان بو دردی آغلادار منی
عیال بی مروّتی ائوینده اولدی دشمنی
غریبدور بالام گرک گئدم همیشه یاسینه

دیم ائوینده دائماً غم و بلا چکن اوغول
اؤرک سوزینی همسره آچوب دینمین اوغول
مزاره قلبی غصّه لی جهانیدن گئدن اوغول
قبول ائدن مصائبی همیشه حق رضاسینه

نقدری بو جهانیدن چاتوبدی ابتلا سنه
قونوبدی زاغیلن زغن جفائیلن بو گلشنه
سنون بو محنتون اوغول چوخ ایلیوب اثر منه
گوروم که جُعده توش اولا جهاندا ئوز بلاسینه

نقدری پستیمیش اوغول او بی حیای فتنه گر
محالیدور گوله یوزی اولار همیشه دربدر
بو ظلم و بو جنایتین جزاسین عاقبت چکر
قالوبدی مات و دیده تر هامی اونون جفاسینه

شاعر : حاج فرهاد فکری اردبیلی