حضرت علی‌اکبر عليه السلام


غفاری اردبیلی

سبک:ای نامت از دل و جان...(افتخاری)


یاتما ای چهره قمر نور بصر یارالی قربانیم
اخیامه حمل ائلیوم پیکريوی یوخومدی امکانیم
قدّیم غمدن بوکولوب ایله منه نظاره اکبرجان
آچ زیبا گوزلرووی باخ آتووا دوباره اکبرجان

ای فقیه آل عبا  
قهرمان کرب و بلا
پیکرون قانه بویانوب
اولدی اِحیا دین خدا

شبیه طاها سن
عزیز زهرا سن
گوزوم سنه قربان
امید لیلاسن




سینونده اوخ یاراسی گل بزیوب حضور جانانه
اصغر گورسه دولانار گُل باشیوا مثال پروانه
منده بیر شمع کیمی اودلانارام سنون کنارونده
حقّیم وار نوحه دئیوب باشه وورام یانام شرارونده

ای نگاریم یاتما بئله
یاندی قلبیم چاره ائله
باشووین اوستونده ویرور
گوز یاشیم دنیانی سئله

شهید اول سن
وحید افضل سن
یارالی سان اوغلوم
سینمده دینجل سن




تلّین اوستونده بیبون باشدا قرا سنی دعا ایلر
گلسون اخیامه سنه غملی باجیم جانین فدا ایلر
سنسیز وای قیزلاریمون گونلرینه جهانی داغلاللار
اولسا سالم قالانی سینه ووروب وطنده آغلاللار

گوزلریم قرباندی سنه
ایله اوغلوم تکیه منه
منتظر دور عمه‌لرون
یوسف گل پیرهنه

گوزل نگاریمسن
سولان بهاریمسن
سپاه قرآندا
طلایه داریمسن




ای نخل پر ثمریم اشک تریم آخور فراقوندن
فکریم وار اینجمه سون لیلی کیمی ئوپم دوداقوندن
ئوپسم گُل لبلرووی روحیم آلار وصالیدن توشه
امکانون اولسا اگر آچ قولووی منی آل آغوشه

ای گُل خوشبوی جنان
گوزیاشیمدان یوخدی امان
چارم اولسا جان وئررم
باشووین اوستونده اینان

دیزیمده یوخ طاقت
گوزوم باخور حسرت
قوی ال چالان چالسون
سینمده یات راحت




باشوندن قان توکولور گل یوزووه الیمده یوخ چاره
قاتللر گوز گوزه‌دی غملی بابون قالوبدی آواره
بو قانلی بسترووه لبلرووه ئوزوم فدا اوغلوم
صد پاره پیکرووه گوزلرووه گوزوم فدا اوغلوم

یاره‌لردن قان داغیلوب
قان دئمه مرجان داغیلوب
دوغرانوب آیات خدا
مقتله قرآن داغیلوب

وفالی سان اوغلوم  
یارالی سان اوغلوم
بلالی لیلانون   
مارالی سان اوغلوم