یتیشدی نوبت رحلت جناب زهرایه
وصیتین ائلدی پادشاه بطحایه
دئدی عم اوغلی گئجه قویگولان مزاره منی
منیم سریریمی گوسترمه چشم اعدایه
اودور وصیته قیلدی عمل امیر عرب
گئجه مزار قازوبدور بتول عذرایه
نه محنتیله قویوب قبره فاطمه بدنین
شروع قیلدی دوباره بیر امر عظمایه
نچه مزار قازوب دور قبر فاطمه دن
بصیرت اهلی اولار ملطفت بو معنایه
اودم که فارغ اولوب دفن وکفن فاطمه دن
صدای ناله ثرادن چاتوب ثریایه
قیتدی منزله دریای غصه و غمیلن
دوشوبدی گوزلری بیر لحظه جای زهرایه
یغوبدی دوره سینه فاطمه یتیملرینی
توکوبدی گوزیاشی حسرتله ماه سیمایه
غرض صباح اولوب آگاه اولوبدی شهراهلی
یواش یواش بوخبرچاتدی گوش اعدایه
بیر آیری فکره دوشوبلر او قوم حق نشناس
خبر گتوردیله اول دمده شاه والایه
بیر عده ایستور ائده نبش فاطمه قبرین
ایاقه دور ائله چاره بو ظلم و ایذایه
غضبلنوبدی ایاقه دوروب او شیر خدا
حمایل ایلدی شمشیر قد رعنایه
قویوبدی باشینه اول دمده بیرعمامه ی زرد
نشانه دور همان عمامه روز هیجایه
گوروبله خلق غضبلن گلور امیر عرب
دولوبدی قان غبیندن او چشم شهلایه
یتیشدی دوتدی او دم ثانی نون گریبانون
فشار وئردی گلوبدی بو نوعی آوایه
نه فکره دوشموسن ای کافر خدانشناس
ندندی باعث اولوبسان بو شور و غوغایه
مگر ئولوبدی علی قبر فاطمه سوکوله
نه کینه سالدی سیزی بو قبیح سودایه
بو قبرلردن اگر ذره خاک رد اولسا
قسم جلال خداوند حی یکتایه
سیزون قانوزلا بو صحرانی ایلرم رنگین
ئوزوزه رحم ائلیون گلمیون بو ماوایه
داغیتدی قوم جهولی قیتدی اول سرور
خبر وئروبله بو احوالی آل طاهایه
گلوب علی قیزی زینب قوجا قلادی آتاسین
دییردی بو سوزی آغلار گوزیله مولایه
بابا بو سایه نی باشیمدن آلماسون الله
همیشه باشیمون اوسته اولیدی بو سایه
بو یرده کرب و بلا دشتی یادیمه دوشدی
روادی دونسه گوزوم یاشی لعل حمرایه
حسینی ظلمیله ئولدوردی شامون اهلی سوسوز
جفا الیله گئدوب خیمه گاهی یغمایه
حضور زینبه فضه یتیشدی عرض ائلدی
ایاقه دورگلا قیل چاره فکر اعدایه
بو لشکر ایستور حسین نعشی اوسته آت چاپالار
بو سوزده ناله ی زینب یتوب ثریایه
اگر چه شیر دیوللر گلوب کمکلوق ائدوب
خرد معطل و عاجز قالوب بو معنایه
سکینه دن نیه پیغام شاه دین ائلدی
که ای سکینه یتور شیعیان طاهایه
بو چولده ظلمیله ئولدوردی اهل کوفه منی
سویوبلا پیکریمی سالدیلار بو صحرایه
زبسکه سینه مون اوستونده آت چاپوپ اعدا
قاریشدی خون خدا خاک سطح غبرایه
یتور تمامه بو ابیاتی بسدور « اقبال »
حسینه نوحه گر اول خدمت ائله زهرایه
مرحوم اقبالی زنجانی
- پنج شنبه
- 20
- دی
- 1397
- ساعت
- 20:21
- نوشته شده توسط
- ابوالفضل عابدی پور
ارسال دیدگاه