• پنج شنبه 30 خرداد 98


تشریح باغ فدک و احوالات کوچه -(هفتم هجریده اقدام اِئلِئیوب ختم نبی)

96

هفتم هجریده اقدام اِئلِئیوب ختم نبی
هدفی اولدی جهانی ائده دین عربی
سدّ راه اولدولا بیر عِدّه یهودی نسبی
لشگر " نَصرُ مِن اللّهینی" حاضر اِئله دی
خیبرین جنگینه ئوز امرینی صادر ائله دی
بیر یهودی کی مُخَیرَق یازیلوب صاحب جاه
موشکافانه اِئدوب جاریه اوضاعه نگاه
آخر جنگی یهودی لره درک ائتدی تباه
تانیوردی الی بوش صحنه نی ترک ائتمز علی
قلعۀ خیبری فتح ائیله مسه ، گئتمز علی
واریدی حومه ده بیر مزرعه سی هفت قلاع
صافیه ، بُرقه و اَعرافیله ، د َلاّل و حُناء
قلعۀ ششّمی مِیثَبتیدی ، هفتمده خفاع
پنبه خیزیدی او محدوده یاشیل دامنه تک
کُلّ ِ بو منطقیه دئیدی حِجاز اهلی فدک
قصد صُلحیله مُخَیرَق ، فدکین مسئله سین
حل ائدیب ایسته دی پیغمبره اهدا اِئله سین
بیلدی لازیمدی فدا ائیلیه ، دنیا هوسین
ئوز رضائیمله دئدی عهدیمی تنظیم ائدورم
 شخص پیغمبره ئوز باغیمی تقدیم ائدورم
طبقِ امریّۀ سلطانِ سماوات و سَمَک
وِئریلیبب فاطمۀ طاهریه مُلکِ فدک
اختیارینده اولوب یازده هجریه جک
حاصلِ مزرعه دن سهم آیئروب شاه ولا
گئچینوردی هم علینین حرمی ،هم فقرا
رحلت ختم نبی دن سورا اشرار دنی
قبضه ی قدرتیچون ائتدیله پیکار علنی
حلّ ِ مشگلده بنی ساعِدَه نین انجمنی
اولدی تشکیل ائلیه بلکه بو آشوبی تمام
تا ابوبکر اِئله دی تخت خلافتده مقام
بئله بیر واقعه نین عاقبتی اولدی نفاق
گؤرسه نیب هالۀ تزویریده اربابِ صِداق
بیعت ائتمیشدی ابوبکره اگر شام و عراق
رهبرین حکمینی ردّ ائتدیله درحال ِحیات
دولت حاضره وئرمیدیله بیر عدّه زکات 
ابن خطّاب کی اوضاعیدن اولموشدی کنار
تحتِ امریدی بنی ساعِدَه دَه کارگزار
گؤردی چون موجِ بَلایاده ابوبکری دُچار
طرح ریزی ائله دی قدرته چاتسون ئوز اَلی
باشلانا غائِله ما بینِ ابوبکر و علی
دئدی بوبکره علی نین سنه واردور خطری
آلوب اطرافینه ناراضی اولان شیعه لری
تا قیام ائتمیوب اجرا اِئله طرحِ عُمری
مرتضی دولتِ مُستَأصَله بَلوا سالاجاق
منبعِ کسبینی غصب ائتسون علی تک قالاجاق
نیه تَملیک ائلِییوب فاطمه حق اُمَمی؟
سود سالانه سی یئتمیش مینه بالغ رقمی
نیه بو مبلغه صاحبدی علینین حرمی؟
مرتضی عادت ائدوبدور یئیه نان و نمکی
منبع ِ دخلِ درآمد دی سنه ، آل فدکی
شکل تزویریده چون ائتدی عمر رایزنی
منطقاً اولدی ابوبکره مؤثر سخنی
یازدی فرمان آلالار مزرعۀ فاطمه نی
دئدی ،باغ فدکی ئوز آدیما ثبت ائدورم
قالماز ارثیه پیمبردن ، اودی ضبط ائدورم
فاطمه گؤردی بو جنجالیده وار آیری پیام
بیلدی ایستیلر علی ، ائیلیه بوحکمه قیام
قویمادی موضِعِ شخصی دوتا جریانه امام
نگران اولما دئدی ساقیه ، کوثر واردی
دینمه سه حیدر اگر ، حیدر دیگر واردی
حق آلوب ساتمالی اولمار ساتلا ، یا آلینا
داغ بو ننگی کیم آزاده دی وُرماز آلینا
شیرین آغزیندا اگر اولاسا ،گرگ حق، آلینا
کیم دئیور من بو یولی مَنفَعت اوسته گِئدورم
درس غیرتدی ، قئزم زینبه درس ئورگَدورم
فاطمه شخصاً ابوبکریله دیدار ائله دی
مُستَدَل مدرکینن حقینه اصرار ائله دی
امّ اِیمَنله علینین آدین اظهار ائله دی
دئدی شاهیددی بولار پرده ده ظلم علنه
فدکی وِئردی بابام حال حیاتینده منه
حاکم دینی او شاهد لری انکار ائلییوب
یازان امریّه نی بو باره ده تکرار ائلییوب
روح زهرانی کذایی سوزی آزار ائلییوب
گلدی طغیانه ، حقایقلری افشا اِئلیه
گؤردی واجبدی او نالایقی رسوا ائلیه
دئدی زهرا : اولا هر حاکم اؤزاق امّتدن
اولا بیلمز خبری رنجه دوشَن ملّتدن
استفاده اِئدوسن نَفعُوَه سن قدرتدن
بو وظیفوندی سنون جامعه ده داد اِئده سن
نه کی زهرادن آلوب حقینی پامال ائده سن
حاکم جامعه سن ، سن گرک عادل اولاسان
حقی حقداره وئیریب شرعیده کامل اولاسان
نه کی ئوز خِیرُوَه خاطر شَره مایل اولاسان
سن مقصّرسن اگر مُلکیده ظالم چوخدی
ظلمی گؤرسون گؤزوی یومماقا حقّون یوخدی
عدلی قربانی ائدنمز اُمرا منفعته
خفقان ننگیدی اسلامی اولان مملکته
گَرَگ اوّلده خلیفه باخا حقّانیته
بو تفکّرله خلافتده قالا بیلمزسن
فدک حقّیمدی منیم ، منّن آلا بیلمزسن
شرعین احکامینی ئوز نَفعُوَه تفسیر اِئله مه
شکلیدن شکله سالوب امّته تعبیر ائله مه
قدرته تکیه ائدیب، رأییده تغییر ائله مه
حکم شرعی ائله ، احکامه اگر عالم سن
بیر نفر شهریده مظلوم اولا سن ظالم سن
بو خلافت کی ائدوبسن اونون عرشینده مقام
دونن اجلالیله صدرینده اوتورموشدی بابام
بئله رفتار اِئله دی امتیلن خیر الاَنام ؟
گرک ، احکامِ رسول الهی اجرا اِئده سن
بیر قدم یوخدی اجازون یولووی کج گئده سن
پرورش ائیلیَه نیم ختم رسالتدی منیم
شأنیم عصمتدی شرافتدی نجابتدی منیم
ایاقیمنان اوپن هر لحظه فصاحتدی منیم
دئمورم من سنه سلطان عرب دختریم
غیرتیم ظلمه باش اگمز ، من علی همسریم
فاطمه خطبه سی ائتدی او قدر جلب نظر
سوزلری شدّتیلن ائتدی ابوبکره اثر
فدکه یازدی سَنَد فاطمیه قَیتَره لر
آلدی زهرا سَنَدی شاد و خرامان الینه
کوچیه گلدی حسنلن قئییده ئوز ائوینه
کوچه ده عازمیدی ثانیده تاب و تبیلن
فکری غرق اولموشودی تن تنۀ منصبیلن
روبرو اولدی غرض فاطمۀ اَطیَبیلن
دِئدی معلومیدی شورو شعف وشوقی ده سن
گلموسن دار الاموره نیه ، یا اُمِّ حسن؟
بویوروب فاطمه بوبکریله دیدار ائله دیم
خواب غفلتدکی وجدانینی بیدار ائله دیم
حقّیمه مدرک آلوب ناحقی ده خوار ائله دیم
شکر اولا بیر اولان اللهَ منه اولدی کمک
قویمادم غصب اولونا رهبری تک ملکِ فدک
دئدی ثانی گؤرورم سدِّ رهِ رهبری سن؟
مرتضی گونه سن الحق کی علی همسری سن
گرچه اصل و نسباً ختم نبی دختری سن
قویمارارم شرعیله عرفی منه تکلیف ائده سن
فدکه صاحب اولوب دولتی تضعیف ائده سن
نئچه سوز کوچه ده قهریلن اولوب ردّ و بدل
او دئِدی وِئر سَنَدی ائیله مه ییم آیری عمل
بو دئدی چکمرم حقّیمنن اگر کی ئولَم اَل
گؤردی بو حالی حسن ، عاقبتی بیلدی نَدی
دئدی نامردیدی بو ثانی ، ننه ، وِئر سندی
نئجه ثانی اَل اوزون پنجه سی قهّار و قوی
فطرتاً اسفل و اصلاً شر و ذاتاً بَدَوی
یاپیشوب سیّده دن سیّدِ آلِ علوی
گَه باخوب کوچیه گَه ثانیه گَه فاطمیه
یول کسیلمیشدی بیری گَلمَدی امداد ائلیه
مرد جنگیدی وُران فاطمه بیمار و ضعیف
باغلاماز یول یورولان عورته کیم اولسا شریف
گویه قالخئزدی اَلین کوچه ده نامرد حریف
گؤر نه گؤردی ..حسنین گؤزلری غمنن سئخیلوب
ننه سیلن بالا ، بیر سیلیه، با هم یئخیلوب
اوچیلار هاردا شکار ائیله سه آهو بالاسن
چوخ دیوبلر کی همیشه وُرا ای کاش آناسن
ولی زهرایه حسن دِییدی بئله اوخشاماسن
نه چتیندی ننه دردینده بالا قلبی یانا؟
 کاش اؤلیدیم سنی بوحالیده گؤرمیدیم آنا
مدرکی ثانی آلوب فاطمه دن سرعتیلن
پاره پاره ائله دی توکدی یِئره نخوتیلن
باخدی بانوی دو عالم سَنَده حسرتیلن
دئدی بیر جمله او دُردانۀ گنجِ اَزَ لی
ایندی بیلدیم نئجه دنیاده کمک سیز سن علی
اؤرَه گون من کیمی یانسون سنون ای چرخ فلک
منی ، آذار اِ ئلییَن دردِ علیدور نه فدک
کمگیم اولدی کمک سیز ائلییَن یوخدی کمک
تک قویوب امّت صد چهره شه صف شکنی
آچیق اولسیدی اَلی ، ثانی وراممزدی منی
سؤز چتین یئرده قالوبدور قلمه یوخدی دؤزوم
واردی زهرا بالاسی مَهدیه بیر جمله سؤزوم
بویوروبسان دئیرم ئوز آناما نوحه ئوزوم
نیه اول فاطمه کی درگَهیدور بابِ کرم
کوچه ده سیلی ووروب صورتینه نامحرم؟
نیه زهرا کی ئوزی، نوریدی ، نور ازلی
وئره جگ حکم جزا ، حشریده همراه علی
کوچه دن منزلینه گئتدی یوزی اوسته اَلی؟
دوزدی محشرده خانوم کینه یولون گئتمیه جگ
ولی بو سیلینی زینب جانی عفو ائتمیه جگ
نیه زهرا بو قدر غمده اسیر اولموشدی
زندگیدن قسم ئوز جانینه سیر اولموشدی
سنّی اون سگّیزیدی قامتی پیر اولموشدی
نئینیوب گؤر اونا امت ،اؤرَه گین داغلادیلار
باشنا درود بالاسی دوره وُروب آغلادیلار
نیه اول فاطمه کی شیعه یانار دردینده
غصّه دن ذلفی آغارمیشدی جوان سنینده
نیه اللرده اؤلوب قبری قالیب گیزلینده؟
شیعه بو محنت عضماده اؤرَگ داغلیاجاق
نَقَدر وار نفسی ، فاطمیه آغلیاجاق
شیعه قان آغلیاجاق فاطمه نین محنتینه
آغاران ذلفی یاراشموردی جوان صورتینه
ایکی عالم اولا قربان اگیلن قامتینه
فاطمه فاطمه دی حرمتی وار عزتی وار
نیه گیزلینده غریبانه اولان تربتی وار؟
حقیدن امت اگر رشته ی الفت قیرالار
امر واضحدی علی حرمتینی سئندیرالار
نه دلیلیله گرگ در گهینه اود وورالار؟
ثانی فکر ائیله دی درگاه امامت یاندی
قاپودان چوخ شرف و عصمت و غیرت یاندی
سوزلریم نوحه دی اما یوزونه پرده دوشوب
قاپی اود دوتدی دئدی مرد ایشی نامرده دوشوب
در و دیوار آراسی.. فاطمه بیر درده دوشوب
سئنان آئینه کیمین آلنینا مرجان دوزولور
قاپی مسمارینه کیم باخدی گوروب قان سوزولور
شعری ئورگنمه گیلن شاعر اگر شاعر اولا
شعری شعر اولماز، اگر قافیه ده ماهر اولا
شاعرین ذوقی شعورینده گرگ ظاهر اولا
ای «امانی» فضلا ، فرعی اصول ائتمه دیلر
عرفا نظمیده هر شعری ،قبول ائتمه دیلر

  • پنج شنبه
  • 20
  • دی
  • 1397
  • ساعت
  • 20:37
  • نوشته شده توسط
  • ابوالفضل عابدی پور

ارسال دیدگاه



ورود با حساب گوگل

ورود کاربران