دامن فاطمه ویردی حاصل
گلدی دنیایه بیر شخص کامل
لطف حقدور بو نوزاد زهرا
شیعه نون حالینه اولدی شامل
نشر ایدور صورتی نور سبحان
لبلریندن یایور روح قرآن
اشکی گوزلرده مانند زمزم
کیپریگی گوزلر اوستونده پیکان
بسلنوبدور بو گول دین باغیندا
بیتمیوبدور بیابان داغیندا
باغ دامان زهراده آچدی
یوخسا بیتمز چولین توپراقیندا
واردی بو گولده روح طراوت
گورسنور صورتینده صداقت
بو گوله باغیدور بطن زهرا
یوخدی توپراقدا هرگز لیاقت
بو گولون قدرینی چوخ بیلن وار
شاد اولوب ال چالان وار گولن وار
آغلاسا اشکی آخسا گوزوندن
گوز یاشین صورتیندن سیلن وار
بو گوزل گونلره گئچدی دوران
#کربلا دشتینه دوشدی طوفان
گلدی میدانه پیغمبر اوغلی
الده بیر صود امر تشنه قربان
چاره سی هر طرفدن اوزولموش
باش آخوب آلنینا تر دوزولموش
صورتی ساری گول تک سولوبدی
قاره گوزلر عطشدن سوزولموش
رد ایدوب صورتیندن عبانی
لشگره گوستروب شه ، بالانی
سسلدی سو ویرون یاندی غنچه م
گلشنیمدن بودور تک قالانی
سوز هله اولمامیشدی اعاده
ناگهان سوزدی بیر اوخ هواده
بیلمورم گلدی اوخ دگدی هاردان
سسلدی شه اباالفضلی داده
گل اباالفضلیم ، اوخلاندی اصغر
اوچ پر اوخ گول کیمی ائتدی پرپر
باغبان الده گول ائتدیناله
دوره دن ال چالوب گولدی لشگر
گه دئدی وای حسین گه وای اوغلوم
گه دئدی راحت اول لایلای اوغلوم
سو داشا چیخدی اوخلاندون عطشان
یات گوروم قانه دونسون چای اوغلوم
- چهارشنبه
- 28
- فروردین
- 1398
- ساعت
- 13:34
- نوشته شده توسط
- ابوالفضل عابدی پور
ارسال دیدگاه