• دوشنبه 25 شهریور 98


کرامت حضرت علی(ع) گریز خرابه_شام -(بیوردی حجة الاسلام برگی منبرده (1))

60

بیوردی حجة الاسلام برگی منبرده (1)
بیوردیقین یازیرام قسمت اولسا دفتره

علی کرامتی دیر نظمه اولموشام مایل
بو فیضه آلله ائده کاش بنده نی نایل

سند بیوردی بودور شرح حال علامه
اوکس کی خدمت ایدیبدیر بو دین اسلامه

یازیللا بیر گون عراقین وزیر فرهنگی
یازوبدی بیر بیله نامه شمادت آهنگی

ملاک ایشینده نه ایمان اولوب نه دینی اولوب
خطابی حضرت علّامه امینی اولوب

واریدی شیعیه نسبت ئورکده چوخ غرضی
ائوینده اوغلی واریدی بئلینمین مرضی

نه نیتیله یازیلموشدی مهر اولوب نامه
آپار دئدی منه وئیرسین جوابین علامه

بوئیدی متنی علی عشقینون بهاسین وئر
آقاوا دی کی بونین اوغلونین شفاسین وئر

آل ایمدی قرخ ایلیوین مزدینه من ایستیه نی
قبول ائدیم او زامان منده بعضی سن دییه نی

علی ده واردی کرامت بیرین نشان وئرسین
قوتاردی چاره م، عزیزیم آزالدی جان وئرسین

گئدنده قاصده تاپشیردی ایله سین عجله
ئورکده چوخ تله سیر انتظاری گلسین اله

مسیری طی ائلیوب قاصد سعادتمند
چاتوبدی مقصده سالم بو خاطره خرسند

دئیور گوره ن کیمی تاپدیم صفا جمالیندن
نه چهره کی اوخونور معنویت حالیندن

باخوبدی نامیه فوراً قلم دوات آلدی
خلوصه باخ کی دخیل اولجاقین برات آلدی

گوزوم گوروردی اول کلمه یازدی بسم الله
علی نین حرمتینه لطف ائدیب شفا آلله

جوابی فارسی یازیردی شفانی داد یازدی
بفوری یازدیقینا درکیم انتقاد یازدی

دئدیم آقا بونی خواهد داد ایله املاسین
بو جمله ئیله دگیش مطلبین ده معناسین

بیوردی یازدیقیما واقفم سن اول آگاه
علی ضمین اولا حتما شفا وئرر آلله

دعا مگر قئیدر صدقیله دئسه ن به علی
مرامیوه یئتیرر ذات حی لم یزلی

آقا محبتینین اجری بیت جنت اولا
رضا اولارکی بوگون نوکری خجالت اولا

دئدیم اجازه بیورسان منه مرخص اولوم
نتیجه هرنه اولا من گئدیم اوزاقدی یولوم

منی دعا ائلیوب حرمتیله سالدی یولا
عبا سالوب حرمه ایستیوردی عازم اولا

گئدیم عریضه وئریم حضرته ضمانتیمی
حواله یازموشام آلله دان ایسته حاجتیمی

فدا اولوم سنه ای معدن کرامت آقا
وزیر سُنّی دن ائتمه منی خجالت آقا

ایاق توزیلا قئیتدیم دوباره بغداده
تیکیلمیشم هله عّلامه یازدیقی داده

چاتینجا مقصده هی ذهن ده دولاندیریرام
گهی یئین گئدیرم گه یولی اوزاندیریرام

وزیره سوز تاپیرام اوغلی تاپماسا صحت
ئورک دئیور هله گورستمه نامه نی گیزلت

خیال ده ائیله اسکندریه ده گَزیرم
گهی قرا چکورم گه محله نی بَذورم

محللیه یئتیشینجاق بو فکرلردیدیم
دئیوردیم ئوز ئوزیمه من گئدیم و یا قئیدیم

نگوردوم اهل محل جمله شاد و خندان دیر
محله نی بئذیوبلر بوتون گلستان دیر

وزیر آچوب قاپوسین ازدحام و غوغادیر
کسیبدیلر نئچه قربان کی عید اضحی دیر

گورن دئدی کی فلانی هایاندا قالمیشدون
اوشاق دوروب اوتوروب سن گتیر نه آلمیشدون

وزیره نامه نی شوقیله ائیلدیم تقدیم
هاچان یازیب دئدی ؟ منده دقیقه سیله دیدیم

دئدی همان او زامان لار اوشاق دوروب اوتوروب
هانی آفام سوروشوب اگلشیب سئونده دوروب

نه جور یازیب منه علامه دوز چیخوب والله
گوروم ائیوین اولا آباد یا ولی الله

گلایه نین یئری وار ائیمدی بوردا مولادن
سنون کی دارخرون قبل و بعد دنیادن

الون کی آللهین اذنیله درده درماندیر
یدالله ها آقاجان هر چئتینلیک آسان دیر

نیه خرابیه بیر گلمدین صفا وئیره سن
اونازنین بالاوین دردینه دوا وئیره سن

گوزینده یاش باباسین گوزلین زمانینده
نه لر واریدی اونین ناله ی نهانین ده

سوز الدی دردین الیندن او خردسال ائیله
دئدی بی بی چوخ اولوب زحمتیم حلال ائیله

یازاندا «اشرفی» مولاسینون کرامتینی
یازیبدی ذیلینه علامه نین لیا قتینی
ـــــــــــــــ
(1) حجةالاسلام و المسلمین حاج رسول برگی از وعاظ مشهور اهل تبریز

  • پنج شنبه
  • 9
  • خرداد
  • 1398
  • ساعت
  • 14:12
  • نوشته شده توسط
  • ابوالفضل عابدی پور

ارسال دیدگاه



ورود با حساب گوگل

ورود کاربران