یاحسین سائلیوم ایسترم حاجت سندن
قاپی دوگماق منِ سائلدن - عنایت سندن
نه زماندور بلوسن من یوزه گوز یاش توکرم
آغلارام حسرتینی کرببلانین چکرم
سن کرم صاحبی‌سن - قیل منه‌ده لطف و کرم
ال گدادن - اَتَک ای کانِ کرامت سندن
گلسه شاهلار قاپیوا جمله سنه بنده اولار
محو رخسارون حسین‌جان مهِ تابنده اولار
ئوپر حاتم ایاقوندان اوزی شرمنده اولار
گورسه گر بیر بیله احسان و سخاوت سندن
دوگسه هرکس قاپیوی صدقیله ای باب سخا
دردینه حتماً آلار هر ایکی دنیاده دوا
ناامید ایتمه منی گل الی بوش سالما یولا
چکمرم ال بلوسن ای گُل جنّت سندن
دیمورم ایتممیشم جرم گناهیم یوخدی
دیمورم نامه‌ی اعمال سیاهیم یوخدی
ولی سندن صورا عالمده پناهیم یوخدی
ال گتورمز کیم اولار غرقه‌ی محنت سندن
باخ آقا نوکریوین گوزدن آخان گوز یاشینا
جام صبری نقدر - من چالوم هجران داشینا
اشگیم آخماز سارالان صورتیمه اوز باشینا
واردی دردیم دیورم - ایستورم حاجت سندن
عمده دردیم بودی آگاهسن ای شاه جهان
سن اوزون عفو ایله یوخدور بلورم جای بیان
کربلا حسرتی نیلوم ایلیوب قلبیمی قان
ایسترم اولسادا - تا روز قیامت سندن
قورخورام باد اجل گلشن عمره اسیله
دامنوندن آقاجان دست امیدیم کسیله
"اکرمی" ایستموری یازدیقی بو شعره صِله
نوکرون ایستوری محشرده شفاعت سندن
- دوشنبه
- 9
- فروردین
- 1400
- ساعت
- 11:46
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه