شیعه‌لر گلدی محرم گیینون قاره گلون
دردوزه ایسته‌سز عالمده اگر چاره - گلون
گنه آیلار دولانوب ماه محرم اولدی
کاسه صبر داشوب سینه محندن دولدی
بو همان آیدی گلستان پیمبر سولدی
وورولوب قاره علملر در و دیواره گلون
پوزولوبدور غم الیندن گنه‌ده نظم نظام
باش آچوب جنّت الاعلاده یقین خیرالانام
بو همان آیدی که ئولدوردی رعیّتلر امام
فاطمه عرشیده سالدی باشینا قاره گلون
نُه سمایه یر اوزوندن اوجالور آه و نوا
کون و امکاندا عزا مجلسی اولموش برپا
بو همان آیدی خانم فاطمه دور صاحب عزا
دوتماقا یاس او شَهِ بی کس و بی‌یاره گلون
قدسیان آتش محنتده اورک داغلادیلار
حلقه‌ی یاس قوروب باشه ووروب آغلادیلار
بو همان آیدی فراتین یولونی باغلادیلار
قحط آب ایلدیلر عترت اطهاره گلون
گلشن فاطمه‌نین گللری تالان اولدی
سربسر کرب و بلانین چولی القان اولدی
بو همان آیدی حسین قانینه غلطان اولدی
ایتدیلر پیکرینی ظلمیله صد پاره - گلون
کربلاده ایلدی ظلمون عیان قوم ظُلَم
حشره تک آغلاداجاق حضرت زهرانی بو غم
قوللارین ایتدی ابوالفضلین او صحراده قلم
دیماقا دردوزی اول قولسوز علمداره گلون
اشقیا دوغرادیلار جسم علی اکبرینی
قانه غرق ایلدیلر قاسم گل پیکرینی
حرمله اوخلادی شش ماهه علی‌اصغرینی
غنچه نازینی توش ایلدیلر خاره گلون
شمر دون آتدی ندن شرم و حیانین داشینی
زینبین حشره کیمی قان ایلدی گوز یاشینی
کسدی گودالیده لب تشنه حسینون باشینی
تسلیت ویرماقا سیز - حیدر کرّاره گلون
باش باشا اوخلارا گل پیکری آماج اولدی
نیزه‌لر باشی کسیک باشینه معراج اولدی
خیمه‌گاهی ستم و ظلمیله تاراج اولدی
ووردولار اود خیم عترت اطهاره گلون
"اکرمی" آتش محنتده اورک داغلا بو آی
ابر تک گوز یاشیوی عارضیوه باغلا بو آی
بو سوزی ورد زبان ایله گنه آغلا بو آی
شیعه‌لر گلدی محرم گیینون قاره گلون
- سه شنبه
- 10
- فروردین
- 1400
- ساعت
- 11:50
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه