ساقيا بوگجه لطف ايله بيزه وئر باده
گوزوموز قالميا تا جام می ميناده
رسميدور عاشق اولار اوز يارينون مشتاقی
بورا ميخانهدی بيز باده پرست ای ساقی
شادلیق ايّاميدی شاد ايله دل عشّاقی
البشارة سسی امواجه سالوب آفاقی
مجلس جشن و طرب واردی بيزيم مأواده
باقر آل محمّد، يئره چون قويدی قدم
بيزی سرمست حضور ايلدى اُول كان كرم
ساغر و جامی چكاق عشقيله بيز باشه بو دم
اورهگی شاد ائليين نغمه اوخی قالميا غم
عرض تبريك دياق تا آقاميز سجّاده
ديل قوشو اوچدو بوگون ترك ائليوبدور قفسی
گول كنارينده گولوستانی دوتوب نغمه سسی
گوزدن آتدی گولون عشقينده بوتون خاروخسی
گوزلرين آچدی بو گونده حَسَنينون نوه سی
گون كيمی پارلادی ایشّقلی يوزی بطحاده
قولاق آس بو سوزه ای واعظ و مادح، شاعر
وصف ائدنماق اونو هر قدری اولاق گر ماهر
گيينرميش آقا هر يئرده لباس فاخر
وئردی پيرايه بو دنيايه امام باقر
اودی واردور شغف و شور و شعف دنياده
عُلماده بلی تصديق ائليوبلر بو سوزی
علمنه حلمنه حيرتده قالوب علم اوزی
آفرين بير بئله مولوده كه شهلادی گوزی
آناسی فاطمه باخدی او گوله گولدی يوزی
گوردی گويچكدی، قدی بنزيوری شمشاده
وصفينی يازماقا آلديم بوگئجه منده وضو
ولی هاردان يازا بيلّم اونا بير مدح نكو
آب دريانی دوتانماز بلی مين جام و سبو
عالم علمده دريادی پيمبركيمی بو
غرق اولار هامّی بيلنلر بئله بيردرياده
واريميش خوش سسی بو بلبل شيرين سخنين
ايگليرميش ملك و حوری او گول پيرهنين
لحن زيباسی آلارميش ديلين اهل وطنين
يوخ نظيری، نوهسی اولموش حسين و حسنين
مرحبا سويلدی حقّا علی و زهراده
هاشمی خالی يوزينده بيز ايچون بير، دانه
دامدور زلف و خطی عاشق اولان انسانه
شمع دور حضرت باقر بيز اونا پروانه
مين سلاميله تحيّت اولا بو جانانه
كه سلام يولاّدی جابردن اونا طاهاده
بيری سويلوركه دوا ايستيورم بايراملوق
بيری سويلوركه شفا ايستيورم بايراملوق
بيری سويلوركذا ايستيورم بايراملوق
من ولی كرب و بلا ايستيورم بايراملوق
چون «بشيرين» بودی تنها ديله گی دنياده
- پنج شنبه
- 19
- فروردین
- 1400
- ساعت
- 12:46
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه