اگلشدی تختین اوسته اوگون بی حیا یزید
اوّل خدایه ایلدی حمد و ثنا یزید
مست ایلمیشدی قدرت اونی بسکه عمروده
فرض ایلیوردی دینه اوزون مقتدا یزید
ئولدورموشیدی فاطمه نین نور عینینی
ال الله ائدیردی مکرر جفا یزید
راس حسینی طشت طلاده قباقینه
قویموشدی هی دییردی اونا ناروا یزید
کبر و غروریلن دئدی من فاتحم حسین
ئولدون سن اولدی گور نجه غمدن رها یزید
صونرا یوزون دوتوبدی قرا باغلیانلارا
رسم وفانی گوزلمه دی بی وفا یزید
رحم ائتمدی ائوینده اسیر محنلره
دل یاره سی ووروبدی جلای وطنلره
الدن گئدوب او وقتیده یاراسی زینبین
موجه گلوبدی غیرت دریاسی زینبین
گوردی یزید ظالم اولوب ظلمده جری
غیرتدی اسدی یکسره اعضاسی زینبون
دوردی ایاقه قولاری باغلی وقاریلن
دور برینده جمله احباسی زینبین
شیر خدا عزیزی دلین تیغ تیز ائدوب
غوغا یاراتدی منطق برّاسی زینبین
دوتدی یوزون یزیده دئدی ای جفا سیَر
دوزدور باتوبدی قانینه مولاسی زینبین
شاماته گلمیشم ائلیم تختیوی فنا
فکر ایلمه که یوخدی تواناسی زینبین
باخما اسیریوم ئوره گی داغلیام یزید
قول باغلی گلمیشم قولوی باغلیام یزید
گرچه اسیر محنتم و غم دچاریم
صبر ایلرم صبوریلرین بردباریم
زینب آدیمدی زین ابم شیر زن منم
ایندی حسین حرملرینون غم گساریم
کرب و بلاده قانه باتوب قارداشیم ولیک
من نهضت حسینون هله استواریم
ابن زیادی خوار ائلدیم شهر کوفه ده
دریای غیرتم آتامون یادگاریم
الاندا گلمیشم سنی خوار ایلیوب گئدم
علت اودور بو بیر عملین پافشاریم
همت واریمدی قارداشیمون آلماقا
اگه که من ولیّ حقین ذوالفقاریم
فکر ائتمه که ئولوبدی حسین کامه چاتموسان
مست غروریسن هله غفلتده یاتموسان
سعی ایله بیر آییل یوخودان ایلمه جفا
چوخ تکیه ائتمه تاج و تختیوه چونکه اولار فنا
ییغ باشه عقلیوی بو قدر یاوه سویلمه
راه وفانی ترک ائلیوب گئتمه سن خطا
بسدور حیا ائله او باشا وورما خیزران
باشی یارالیدی نیه بس ائتموسن حیا
کرب و بلاده قانه باتوب یار و یاوری
اوغلی ئولوبدی قلب رئوفینده وار یارا
سن قدر و قیمتین نه بیلورسن حسینیمون
فخر بشردی جانیم اولا جانینه فدا
عمروم نقدری اولسا اونا آغلارام مدام
یاد ایلرم غم و محنون ایلرم نوا
(سالکده) محنتیمده منیم سینه داغلیار
قارداشیمون غمینده همیشه قان آغلیار
- پنج شنبه
- 13
- خرداد
- 1400
- ساعت
- 13:14
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه