دردیم دواسی زهـرا               روحیم صفاسی زهرا
گیزلینده قبره گئتمیش           گیزلین یاراسێ زهرا
آواره دیر عم اوْغلۇن (۲)

(شابئیت جاوابی)
زهرا منی دانێشدێر               آز قلبیمی آلێشدێر
گؤگلۆن کۆسۆبدۆ منده‌ن          اینصافه گل بارێشدێر
آواره دیر عم اوْغلۇن (۲)
روسوا ائدیبدی کوفری، پئیغمبرین شوعاری
سێندێردێ دست-ی-ظۆلمۆ، زیبا سؤزۆن، ووقارون
بیلمه‌م کی دۆشدۆ هاردان، جبره‌ن سنین گوذارون
غوسلون وئره‌نده گؤردۆم، نیلی اوْلۇب عوذارون
آواره دیر عم اوْغلۇن (۲)
واردێر یئری اۇجالسا هر لحظه شور-وْ-شینیم
قوْل باغلێیام قضاده‌ن، چاره‌م کسیلدی نئیلیم
آواره دیر منیم تک ایسته‌کلی نور-ی-عئینیم
زینب غموندا اوْخشار، دائیم مله‌ر حۆسئینیم
آواره دیر عم اوْغلۇن (۲)
جیسمون بۆرۆندۆ نوره، فانی دییاره گلدی
اوْن سگگیز ایلده بختون، تئز دؤندۆ قاره گلدی
میسمار اوْلۇبدۇ باعیث، سینه‌ن فیشاره گلدی
بیر گۆنده دوْققۇز ایللیک، عئشقون عیاره گلدی
آواره دیر عم اوْغلۇن (۲)
من شاهکار-ی-خیلقه‌ت، سن شأن-ی-مولک-ی-جنّت
آیاته من مفسِّر، سن سوره‌لرده‌ن آیه‌ت
والشمس و الضحایه من سن گؤزه‌ل علامه‌ت
سن یاتمێسان یارالێ، من قالمێشام خیجاله‌ت
آواره دیر عم اوْغلۇن (۲)
ظۆلم اهلینین داغێلسێن، زهرا گؤرۆم تیفاغی
گۆلزاری برهم ائتدی، سێندێردێ گۆل بۇداغێ
آخشام یانار چێراغلار، خلقین گله‌ر قوْناغێ
باخ گؤر آناسێز ائوده، کیم یاندێرار چێراغێ
آواره دیر عم اوْغلۇن (۲)
قبر اۆستۆنه گله‌نده، من دل شیکه‌سته هر شب
اشک-ی-مولاییم ائیله‌ر، گؤز کاسه‌سین لبالب
گؤرره‌م حۆسئن سێزێلدار، اوْخشار سنی مرتّب
غم دیزلرین قۇجاقلار، آغلار دالێمجا زینب
آواره دیر عم اوْغلۇن (۲)
قۇش آشیانی میثلی، برباد اوْلۇب تیفاغیم
هر گۆن گؤره‌م مزارون، وار دیلده ایشتیاغیم
روحیم دۆشۆب صفاده‌ن، گلمه‌ز یئره آیاغێم
هئچ یانمایێب مرتبّ، سنده‌ن سوْرا جێراغێم
آواره دیر عم اوْغلۇن (۲)

شاعر: سیفی