ای کرب وبلا نین یری ای کعبه دن اشرف

الله معرف سنه سن بیته معرف

توپراقوی هر کیمسه اوپوب کامه چاتوبدی

شانونده بو بسدور که حسین سنده یاتوبدور

*******

یوخدور سنه واللهی شرافتده چاتان یر

سنسن شرف آل عبا قانه باتان یر

حی ابدی مظهر و محبوبی یاتان یر

آرام دل فاطمه نین مدفنی سنسن

حق مظهری ناحق اله نین مسکنی سنسن

سنده بویانوب قانه باتوب بر گل خوشبو

دنیا گوزی گورموب ایله بر نو گل خوش رو

خلقتده آلوب رنگ او گلدن گل مینو

بر گل که اونون گلشنی دور سینه زهرا 

بر سینه که ایگلردی اوپردی اونی طه

قبر نبوی یا اولا کعبه یری حتی

توپراقینی جایزدگی شرعا یماق اما

پیغمبر ایدوبدور سنی بو حکمده منها

بو سهلیدی جایزدی یماق خاک شفادی

 بر ذره بری گر ییه مین درده  دوادی

مشگی یارادان نافه آهوی ختنده

بر عطر قویوب ای شرف غالیه سنده

مشگین آزالار قدری اونون عطری گلنده

تا عطرین آلار قبرده زهرا ملر آغلار

 دلده بالا وای گوز یاشی گوزدن الر آغلار

گر عرش دیسم من سنه بالفرض خطادی

توپراقوه عبطه آپاران عرش خدادی

تعظیم ایلسه فرشوه گر عرش سزادی

سن دوش نبی زینتین آغوشه آلوبسان

 عرشین سبب خلقتین آغوشه آلوبسان

ای کرب و بلانین یری سن کوه مناسن؟

یوخ یوخ سبب منزلت بیت خداسن

آغوشه آلوبسان   نچه لب تشنه فداسن

بر خدمت ایدوبلر اولار احکام جلیله

ممکندی او خدمت نه ذبیه نه خلیله

ای کرب و بلا سنده کی ششگوشه مزاری

بر نوع سایوب با عظمت حضرت باری

مژگانیله جبریل سیلر اولسا غباری

عمریم او گوزل مدفنه آثاروه قربان

یوخ منده لیاقت سنه زواروه قربان

 ای کاش اجلدن او قدر مهلت اولیدی

لطفیله آقامدان نظر رافت اولیدی

بر نیمه شعبان منه ده قسمت اولیدی

گوز یاشلی گذر کعبه مقصوده سالیدیم

 جان تک او گوزل مرقدی آغوشه آلیدیم

دلباخته عاشقدی سنه جان (حسینی)

سنسن مرض عشقینه درمان (حسینی)

اسموندی هامی بر سوزه عنوان( حسینی)

سعدی زمان اولسا اگر علتی سنسن

 گوندوز گیجه گوز یاشلی سوزی صحبتی سنسن