دیر راهب
بیر گجه منزل ائدوب دیر نصارانی حسین
عرشیدن گتدی کلیسایه مسیحانی حسین
عیسوینون ائوینه گلدی پیمبر نوه سی
احتراماً اوجالوب دیرده ناقوس سسی
بیر طرف صاحب انجیلون حزین زمزمه سی
بیر طرفدن اوخیور آیۀ قرآنی حسین
پرنیان پردۀ راهبده حسین دوتدی مقام
دایانوب حضرت عیسی قاپودا مثل غلام
انبیا وارد اولوب دلده تحیات و سلام
جایر کعبه قیلوب خانۀ ترسانی حسین
انبای چیگنینه سالموش هاموسی شال عزا
اولیا اگنینه گیمیش گجه تک رخت قرا
گَتوروب ختم نبی کاسۀ چشمنده دوا
جذب ائده یاره سینه تا که او درمانی حسین
سبط پیغمبره اؤز امتی چون قاتل اولوب
یارالی باشی گلوب راهبه هم منزل اولوب
بو حوادث شهِ اسلامه بُیوک نسگل اولوب
خارجی مذهبون اولدی گجه مهمانی حسین
اوغلینون باشین آلوب سینۀ پرمحنتینه
بوسه ائتدی قانا توپراقه باتان صورتینه
اولمادی راضی گوزین سیلسون اونون زحمتینه
ویردی مژگانلارینی پاک ایلدی قانی حسین
قوریان لبلریله وئردی طراوت سسینه
خوش گلوب سن بابا نصرانی لرون کلبه سینه
گوهر اشک دولان وقتیده گوز کاسه سینه
دیده گریان ایلیوب چشم رسولانی حسین
قاریشوب بیر بیرینه هر ایکی گوز یاشلری
ایسلادوب دیرده کی خشت لری داشلری
آغلادی جعبه ایچینده شهدا باشلری
بو قضا یاده سالوب حیرته رهبانی حسین
آناسی فاطمه نون یاندیروب امت قاپوسین
آچدی اما اؤزی ترسایه محبت قاپوسین
ای اولان طالب رحمت تانی رحمت قاپوسین
قصر رحمتده آچوب سفرۀ احسانی حسین
گوردی زهرا او باشی بوکموش حریره ترسا
زلفینی الدی اله ایلدی رهبانی دعا
دئدی منده ائدورم خدمتیوون حقین ادا
حقّیدن ایستراو ساعتده که دیوانی حسین
امّ شاه شهدا راهبه تحسین ایلدی
هول محشردن اونی قورتارا تضمین ایلدی
زادۀ سعده باخوب قهریله نفرین ایلدی
صبره دعوت ایلدی حضرت زهانی حسین
آنا راضی دگولم من سنی گوز یاشلی گورم
اَلیورسن گوزون یاشینی من قان الرم
قوری توپراقلارون اوسته یاتشوب اهلل حرم
ولی بستر ایلیوب پردۀ دیبانی حسین
بو گجه راحت اولوب گر چه کلیساده باشیم
صبح اولاندا گزه جک نیزۀ اعداده باشیم
سنگباران اولاجاق شهریده صحراده باشیم
تازه دن قانلو گورر بو لب عطشانی حسین
گئدورم هر یره گئتسون سنیله منده بالا
بی مروتلر اوغول باشیوی سالمش نه حالا
سپرم گوز یاشیمی یارووه یارون ساغالا
اودی ترک ایلمیشم روضۀ رضوانی حسین
«یحیوی» ایستر او بزمی دولی جمعیت اولا
وقتیده وسعت اولا سوز دیمگه فرصت اولا
دُر نثار ایلیه محشرده اونا قیمت اولا
ایلیه خلعت عطا سندس و خضرانی حسین
زاهدا بوکمه منی آیه یازیلمیش کفنه
اسم سبحانی انیس ائتمه خجالت بدنه
باشیمه باغلا حسین قاره سینی بسدی منه
او قرا اوسته یازار نامۀ غفرانی حسین
شاعر : حاج عباسقلی یحیوی
- پنج شنبه
- 20
- مهر
- 1396
- ساعت
- 2:59
- نوشته شده توسط
- علی ببیرپور
- شاعر:
-
حاج عباسقلی یحیوی
ارسال دیدگاه