زبانحال حضرت زینب به حضرت رقیه (س) در خرابه

ائتمه بئله بلبل کیمی افغان رقیه
سن آغلوسان باغریم اولور القان رقیه

گل سینم اوسته قوی باشون بیر آز زمان یات
زینب بو آغلار گوزلره قربان رقیه

قویما بئله گول صورتون توپراقلار اوسته
گیرم که غمدن اولموسان رنجور و خسته
ئولسون بیبون گل باشوی قوی سینم اوسته
ائتمه بیبوندن دردیوی پنهان رقیه

شهزاده سن مسکن اولوب کنج خرابه
شهزاده لر قویماز یوزون روی ترابه
بار گراندور نسگلون بی کس ربابه
آغلار آنان بو نسگله هر آن رقیه

آخر وداعینده منه شاه شهیدان
امر ایلدی قویما بالام اولسون پریشان
سن آغلیاندا آغلاشور بیر عده ثکلان
ایلور غمونده ناله و افغان رقیه

گلسه سفردن اکبرون ای ماهپاره
قلبونده کی هر دردیوه وار اوندا چاره
ایلر تدارک معجر و هم گوشواره
خرسند اولارسان قلبیدن هر آن رقیه

ائتمه بئله ویرانه ده فریاد وشیون
گوزدن آخان گوز یاشیوه قربان اولوم من
سالما اشاقه باشیوی شهزاده سن سن
باخما شمادت ایلوری دونان رقیه

توکمه سرشک حسرتون گوزدن عذاره
گلمه قزیم بلبل کیمی چوخ آه و زاره
آه و فغانون سینمه سالدی شراره
ائتدون غمیله زینبی نالان رقیه

عالم بولر سنسن قزیم اکبر مارالی
اکبر غمی ایلوب سنی باشی بلالی
هجر علی اکبر ائدوب قلبون یارالی
درد فراقه منده یوخ درمان رقیه

یوخ «تابع دینه» بیر آن غمدن فراغت
شرح ائتماقا احوالیوی یوخ الده فرصت
فرصت تاپوب یازدی سنه بیر شرح محنت
سنده گل ایله بیر بیوک احسان رقیه

شاعر : محمد حسن تابع دین