مرحوم جبار مضطر اردبیلی

خبردار ای عزاداران
            حسینین یاسی باشلاندی
اولونسون عالمه اعلان
            حسینین یاسی باشلاندی


آلور بازاریدن گوردوم کی بعضی شخصیلر قاره
خبر آلدیم نه اوضاعدور آچوبلار نطق گفتاره
مگر گورمورسن اطفالی دوشوبلر کوچه بازاره
دیوللر با دل سوزان حسینون یاسی باشلاندی


دیدی ای شاعر نالان ندن بیلدون بو پیغامی
اونا عرض ایتدیم ای مومن بو سوزلر اولدی الهامی
اولور چون #نهم #ذی_الحج کی یعنی #بایرام_آخشامی
سحر کی کسدیلر #قربان حسینون یاسی باشلاندی


او گوندن کی حسین اولموش قتیل لشگر اعدا
همان گوندن الی محشر گرک اولسون عزا برپا
هامی یر کربلا دشتی هامی گون یوم عاشورا
کفایتدور بو بیر برهان حسینون یاسی باشلاندی



اگر فکر عالمیلن ایلسن سن گوگلره معراج
گوررسن حضرت روح الامین باشدان گوتورموش تاج
بلند آوازیلن سویلر الا ای فرقۀ  بهاج
اولون غمگین بودور فرمان حسینین یاسی باشلاندی



گئدیب بیر طفلد‌ن آلدیم خبر آیا، نه عالمدیر
دئدی آلما خبر ای مرد محرمدیر، محرمدیر
بیزیم گوز یاشیمیز آخر حسین زخمینه مرحمدیر
اونون لطفی بیزه درمان حسینین یاسی باشلاندی



گوزومد‌ن یاش اولور جاری، قلم آلدیم اله فی‌الحال
یازام بیر شمّه بو حالی خیالیمدن گئچیب گودال
همان گودالی آلمیشدی آرایه دستۀ  اطفال
هامیسی دیدسی گریان، حسینین یاسی باشلاندی



آچیبدیر باشینی زینب او نعشین اوسته دلخسته
نه حالدیدی دولاندیردی خلاصه آرخاسی اوسته
باجیدیر قارداشین اوخشار ولی آهسته  آهسته
میان مقتل میدان، حسینین یاسی باشلاندی



گوروب بیر اوچ یاشیندا قیز مصیبت باشیدن آشدی
دئدی دردین باباسینه محبت قایناییب داشدی
آتاسی قوللارین آچدی، بالا گلدی قوجاقلاشدی
باخیر اطرافید‌ن عدوان، حسینین یاسی باشلاندی