توفیق خدادن بو گویول مرغی پر ایستر
صحن و چمن کرب وبلایه گذر ایستر


گوز یاشیمیله بیرجه او صحنی سولاسایدوم
قندیلِ دلی طاق رواقیندن آسایدوم
اول مرقد ششگوشه نی آغوشه باسایدوم
گویلوم یته بو مقصده شام و سحر ایستر


جان بلبلی اولموش رَغَنِ نفسه گرفتار
دائم قفس سینه ده ایلر اونا آزار
بو لایق فردوس او نیرانه سزاوار
عُلوی طلبی سُفلده اول حیله گر ایستر


توفیقیوی یارب بیزه همواره رفیق ائت
دَعوّیِ تَولاّی حسینینده صدیق ائت
لطفون بو رهِ عشقیده همراه طریق ائت
دل وادی حیرتده دی بیر راهبر ایستر


هرکیمسه که ایستراولا عاشقلیقا لایق
البته خلایقدن ایدر قطع علایق
قطع نظر اونداندا گرک عاشق صادق
هر ما ملکیندن ائده قطع نظر ایستر


بوعلمی حسین تک اِلَموب کیمسنه تحصیل
یتمیش نفری ایلدی بیر حَرفیله تکمیل
اجمالی او حرفه شُهدا ویردیله تفصیل
گوردوله وفا درسیدی بو ترک سر ایستر


بیر بیر شهدایه باخوب اول شاه شهیدان
ویردی ازل اؤز ایسته دیگی اکبری قربان
مین زخمیله بیر گوشۀ میداندا ویروب جان
گئچماق او جگر گوشه دن الحق جگر ایستر


حُسن حَسنیله واریدی شهرت قاسم
قارداش یرینِیدی اونا چون حضرت قاسم
آسان دگول اول پادشهَه فرقت قاسم
قارداش بالاسین کیم قانینا غوطه ور ایستر


اصغرده اولوب مرتبۀ عشقیده  ظاهر
حیران قالوب اول مظهره مجموع مظاهر
جانویردی لب خشکیله اول چشم تر آخر
آغلوب یانا احوالینه هر خشک و تر ایستر


عباس کیمی گلمیوب آفاقه برادر
اولمازدی اونا کیمسه شجاعتده برابر
اولدی نجه راضی باتا قانه او هنرور
گیچماق ایله قارداشدان حقیقت هنر ایستر


گه ناقه ده اولادین عدو گاه پیاده
چکدیله دَرِ دیره دَرِ ابن زیاده
نه حوصله دور اوندا نه صبر آل عباده
اول نوع کیم اوز عترتینی دربدر ایستر


کیم ایستر عیالی اولا اعدایه گرفتار
عریان دوه ده ایلییه لر داخل بازار
بیمارینه کیم ایستر اولا بیر بیله آزار
بو ظلمی شه کرب و بلا بیر مگر ایستر


دل ایستر اونا کشف اولا گر باب معانی
«راجی» بیله توجیح ایدوب ارباب معانی
باب اللهیلن فتح اولی هر باب معانی
فیض نظر باب شُبیر و شُبر ایستر