گل ای جفای فلکدن قدی کمان زینب
زمین ماریه ده زار و ناتوان زینب
گیدن دمشقه کیمی شمر شوم النده اسیر
دیار کوفه ده زنجیره باغلانان زینب
بو گورماقیم سنی چون آخرین وداعیمدور
دوباره گورماقا یوخدور داخی گمان زینب
سنیله وعده دیدار محشره قالدی
بیله مدار ایلدی دور آسمان زینب
وصیتیم بودی صبر ایله ای وفا کانی
گلنده قتلیم ایچون شمریله سنان زینب
گورنده شمر گلور الده خنجر خونخوار
مباد یالواراسان شمره الامان زینب
اوزوم بلانی قبول ایتموشم ازل گوندن
گلور ظهوره بو گون بیر به بیر عیان زینب
کسر بو گون باشیمی شمر یِدّی ضربتیله
گرک ویرَم ره جاناندا تشنه جان زینب
اوز اختیاریمیله ویرموشم قضایه رضا
بلایه سینه می ویرم اوزم نشان زینب
دوشر بو گل بدنیم پاره پاره صحرایه
اولور بو قانلی باشیم زینت سنان زینب
عیالیمی سنه تاپشوردوم ای حیا کانی
یتیم اوشاقلارا غمخوار و پاسبان زینب
بلا نقدر گلور سن بلایه صبر ایله
وفالی عاشقی ایلَلَّه امتحان زینب
ملول اولما اگر شام پرجفاده سنه
خرابه یر ویره لر منزل و مکان زینب
اگرچه شمر آپارا مجلس یزیده سنی
مباد ترک ایده سن صبری بیر زمان زینب
او وقت خرمن صبر و قراره ویرما شرر
ویراندا لبلریمه چوب خیزران زینب
شفاعتیم گچه جاقدور «حقیره» محشرده
اولوب مقدمۀ شامه نوحه خوان زینب
بو آخرین گجه میزدی دم فراغتدی
دویونجا باخ یوزومه چونکه وقت فرصتدی
بو گجه وقت فراغتدی تا اولونجا سحر
گتور عیالیم اوزونه ایدیم دویونجا نظر
دوباره گورمیه جاق عترت رسول منی
گتور وداع ایده ذریۀ بتول منی
صباح اولاندا بو عالم بیر اوزگه عالم اولور
بساط جاه و جلالیم بو یرده برهم اولور
جوانلاریم قیریلور ظلمیله یاتار علمیم
بو عرصه ده داغیلور لشکریم هامی حشمیم
من غریبی یارالی سالوللار اهل جفا
کسر سوسوز باشیمی ظلمیله او شمر دغا
قویاللا نعشیمی تالانه اهل شام باجی
سویاللا پیکریمی کوفیان تمام باجی