*قتلگاه*
عاشق تاپار نگارینی بولمم هاچان تاپار
چوللرده خسته پا دولانار ناگهان تاپار
سنده دوز عاشق اول دولان آختار نگاریوی
شک ایلمه اینان سوزومی، آختاران تاپار
وارسته اُول امام اوزی گلسین سراغوه
شایسته اُول گلوم سنی صاحب زمان تاپار
هر کیمسه اهل بیتله دوز تاپسا رابطه
محشرده رستگار اولی خطّ امان تاپار
دنیانون عمری آزادی بو دنیانی نیلوسن
احسن اونا که عمر تاپار جاودان تاپار
خار اول چمنده، خوار ولی اولما دهرده
بدبخت او دور که سود تاپانماز زیان تاپار
مولا محله سینده ایت اُول هور هرآینه
هر ایت که هورسه کامه چاتاراستخوان تاپار
گنج گرانبهادی شفاعت جزا گونی
روح حسینه آند ایچرم آغلیان تاپار
هر گول گلاب ویرمز عزیزیم دولانما چوخ
مرغوب گول او گولدی فقط باغبان تاپار
زینب گلوبدی قتلگه آختارور گلون
تاپسا اگر حسینینی بیر گلستان تاپار
انصافدور تاپانمیا اؤز قارداشین خانم
اما حسینون اللرینی ساربان تاپار
قارداش جنازه سین تاپا گر زینب حزین
گیسوی حوریله اونا بیر سایبان تاپار
آخرده تاپدی سویدوقنی بولمرم نجه
دلدارتاپسا دلبرینی باغریقان تاپار
بلبل کیمی نوایه گلوب تاپدی اؤز گولون
هانسی عزالی بزم ایله نوحه خوان تاپار
عرض ایلدی حسین باجووام منله بیر دانیش
هر باجی قارداشین دولانار ناگران تاپار
پیغمبر اوغلی ایسّی بو قوملار بو جانماز
روح نمازی یار زمانِ اذان تاپار
تنها نه آختارور سنی زینب بو چولده لیک
ای وای حسین دیه دیه زهرا آنان تاپار
فکر ایلورم که جنّ و ملک دوره وی آلوب
ای لالۀ بهشت سنی قدسیان تاپار
نچه نشانیله سنی تاپدی باجون ولی
روح الامین بو چولده سنی بی نشان تاپار
یول گوزلورم رقیّه قیزون یانوه گله
هر دلشکسته قیز آتاسین بی گمان تاپار
بیر کلمه گل دانیش منه روحیه ویر حسین
جسمیم فقط حسینیله روح و روان تاپار
بیر آسمان ستاره باتوب کوی عشقده
ای زهرۀ شرف سنی هفت آسمان تاپار
سندیرّام اشقیانی اؤزوم سنمارام حسین
تاریخ کربلا منیده قهرمان تاپار
باخما که ظاهراً سنه دشمن وئروب شکست
ای فاتح جهان سنی اهل جهان تاپار
«خوشزاد» یازما وامق و عذرا حکایتین
یاز نوحه یا حسین دینه نوحه یازان تاپار
«صافی» هانی «شهاب» هانی بس نولدی «شهریار»
ذوق اهلی باور ایلمه «سعدی زمان» تاپار