قانلی بیر باش نیزه باشینده ائدوب غوغا گلور
اَم حَسِبْتَ انّ اَصحَاب آیه سین گویا گلور
برج ظلمتدن چیخوبدور گوئیا خورشید عشق
غرق ظلمت چوللره انوار حق پیما گلور
اولمیا وادیّ سینانی گزن موسی دی بو
بیر تلالو باشدا وار گویا ید بیضا گلور
نفحۀ رحمت دی مشرقدن وزان دی چوللره
سایه سالسین کوه قافه شهپر عنقا گلور
کاروان تا یتدی بیر خاموش دیره ، گوردیلر
زنگ ناقوس کلیسا سسلنوب هیها گلور
دوشدی دیرین راهبی خوفه چیخوبدور دیریدن
تا گوره ناقوسیدن اول سس نه دور آیا گلور
گوردی ظلمت چوللرین بیر نور رحمانی آلوب
آسمان کوفه دن شمس جهان آرا گلور
بیرنئچه مهتاب آلمیش اول گونون اطرافینی
دیره گلجاق نالۀ یَا لَیتنَا کُنّا گلور
دقتیله باخدی راهب کاروان کوفیه
بیر نئچه جلادی گوردی هار و بی پروا گلور
واردی هر جلاد الینده نیزه ، نوک نی ده باش
باشلارا باخدوقجا قلب راهبه بلوا گلور
واردی بیرباش باشلارایچره دائماً قرآن اوخور
صوت قرآنی اونون جان بخش و روح افزا گلور
قانلی باشدان اولدی از بس منجلی نور وقار
فکرائدوب راهب اونون مأواسینه یحیی گلور
باغلانوبلار خوردا قیزلار قول قولا زنجیریلن
گوزلرینده واردی قان یاش دیلده واویلا گلور
کاروانین همرهینده واردی بیر عورت خانم
قان دولان عطشان دوداقیندن حزین نجواگلور:
ای حسین ای شاه مظلومان باجون قربان سنه
آچ گوزون باخ زینبه چوللرده وانفسا گلور
کیم بولردی گلشن زهرانی صرصر صولدیرار
کیم دییردی زینب آخر بو چوله تنها گلور
کیم قبول ایلردی شهر کوفه ده زهرا قیزی
اللری زنجیر ظلمه باغلانا ، سودا گلور
کیم قبول ایلردی سبط تاجدار عالمین
نیزیه وُرسونلا باشین،بیله سۆزحاشا گلور
قانلی باشین بیرگجه قالدی کول اوسته یاحسین
بیر گجه اول باشین استقبالینه ترسا گلور
سن بلکده عرشه گئتدون گویلره وئردون صفا
ایندی اما باشیوه یئرلرده مین بلوا گلور
زینبین نجواسی سالدی راهبی تاب و تبه
دیرینه ، بولدی شُبیر اول زادۀ ایلیا گلور
خاتم پیغمبرانه وار بو باشین نسبتی
رتبه ده ختم رسالت برتر از عیسی گلور
الغرض سُکنی تاپوبدوردیریده شاهن باشی
جلوۀ تنویر حق دور لیلۀ یلدا گلور
آرتوروب دیرین صفای معنوی سین قانلی باش
گوئیا میثاق عشقه تاج کَرّمنا گلور
لحظه لحظه عطرجنت دور مشامی ناز ائدور
دیریدن هرآن شمیم انبیا پیدا گلور
گرچه بو عیسی دگور یا نسبتی یحیایه یوخ
رتبه ده امّا او پیغمبرلره همتا گلور
نیمۀ شب راهب احساس ائتدی بیر آیری نوا
قلبینی رام ایلین آرام بیر نجوا گلور
نیم خیز اولدی یریندن فاش بیلسون مطلبی
بولمدی گوزدن چکیلدی پرده ،یا رۆیا گلور
گوئیا سس صاحبی بیر عورتیدی باغریقان
چوللری بیرباشن عشقینده اولوب جویا گلور
الله الله بونه عالم دور بوعورت کیمسه دور
نسبتی وارهاجره،مریم دی، یاسارا گلور؟
نوررحمت تازه دن دوشدی او دیرین بطنینه
بزم اِنس و حوره بیر انسیّۀ حورا گلور
ایستیوردی فاش بیلسون سرّعشقین مطلبین
دقت ایلوبدی گوروب بیرسسدی چوخ باجا گلور:
ای کسیلمیش باشی دالدان خنجر عدوانیلن
جان سنه قربان اولا آچ گوزلرین زهرا گلور
بیر گجه خولی ائوینده من سنه مهمانیدیم
بو گئجه مظلوم آنان غم دیرینه امّا گلور
رسم عالمدور آنانی ئولدوره مسماریلن
اوغلونون جسمینده دورت مین اوخ یری پیدا گلور
دور بابام پیغمبره با هم گلایه ایلیاق
بو نه عالمدور عدالت حرف بی معنا گلور
هاردا شاهن باشی نوک نیزه ده جولان وئرر
هانسی شاهه شورش محشر بئله برپا گلور
ناقه لر اوستن آتوللار چوللره قیزلاریوی
اوخ دگور قمچی دگور تیغ و سِنان حتّی گلور
بار الها هم بابام مظلوم ئولوب هم مرتضی
هم حسینیم ظلم الیندن دوغرانوب اعضا گلور
صبریمیز بی حددی والله هر بلایه صابروخ
حقّ عطا ایلوبدی آخر سینه میز سینا گلور
حق تعالی دن گلن تقدیره زهرا لا دئمز
لایُری دن هرنه گلسه خوش گلور زیبا گلور
ای «مُصَیـّب» مِهر تابان سپهر عصمته
کیم توسّل قیلسا اَدنی شأنی بس اَعلی گلور
گل خلوص نیتیلن باغلا احرام ولا
اوندا کی قلبین حسینین عشقینه شیدا گلور
وئر خانم زهرایه شاه کربلانی سن قسم
فاطمه گر واسطه دوشسه سۆزی باجا گلور
عشقیوی اثبات اگرائتسن حسین درگاهینه
مطمئن اول کی ، برات کربلا امضا گلور
- دوشنبه
- 2
- مهر
- 1397
- ساعت
- 10:53
- نوشته شده توسط
- ابوالفضل عابدی پور
- شاعر:
-
محمد علی مصیبی
ارسال دیدگاه