سروش غیبیدن ناگه سحر بیر خوش ندا گلدی
دئدی خوشحال اولون یاران زمان اعتلا گلدی
پریشان خلقه عالمده وئرن صلح و صفا گلدی
مزیّن عرش و فرش اولدو جهانه مصطفا گلدی
اورکدن سُودیگیم جانان ائدیب عهده وفا گلدی
کونول شاد اول کی دنیایه او ختم انبیا گلدی
بولودلاردان گوزل بیر آی هلالین آشکار ائتدی
ساچیب نورون اورکلرده سحابی تار و مار ائتدی
کدرلر کوچدو بیر آن دا اورکدن غم فرار ائتدی
بئله فرخنده میلاده ملک لر افتخار ائتدی
سیلیندی غصّه دن گونلوم کی یار مه لقا گلدی
کونول شاد اول کی دنیایه او ختم انبیا گلدی
اونون فرخنده میلادی بیزه عین سعادت دور
او ارشاد ایلین خلقی او مسئول رسالت دور
او برباد ایلین ظلمی او معمار عدالت دور
اودور محو ایلین جهلی او دریای فضیلت دور
سعادت گوسترن خلقه بویوک بیر پیشوا گلدی
کونول شاد اول کی دنیایه او ختم انبیا گلدی
گرکدور افتخار ائتسین محمّد نامینه آدم
نئجه بو شانلی میلاده تفاخر ائتمه سین عالم؟
اساس علمی عالمده محمّد ایلدی محکم
فضیلتده اودور اوّل نبوّتده اودور خاتم
قدوموندان بو گون شوقه بوتون ارض و سما گلدی
کونول شاد اول کی دنیایه او ختم انبیا گلدی
مقدّس اسلامین دینی سعادت ایسته یر خلقه
جهالتدن اسارتدن برائت ایسته یر خلقه
خرافاتین کوکون یولماق فضیلت ایسته یر خلقه
اخوّت،بیرلیک،آزادلیق،عدالت ایسته یر خلقه
نفاقه،کینه یه،کفره دیانت دن فنا گلدی
کونول شاد اول کی دنیایه او ختم انبیا گلدی
حقیقت قوی عیان اولسون سئچیلسین حقّیلن باطل
یاتان وجدانلار عالمده آیلسین اولماسین غافل
سیلینسین بیربه بیر اولسون اورکدن کینه لر زایل
نه ظلم اولسون نه ده ظالم نه جهل اولسون نه ده جاهل
هدایت ائتمگه خلقی مقدّس رهنما گلدی
کونول شاد اول کی دنیایه او ختم انبیا گلدی
گرکدیر کعبه ده بتلار ازیلسین تار و مار اولسون
قازیلسین ریشه سی ظلمون عدالت بر قرار اولسون
خرافات اهلینه «آذر» اتم عصرینده عار اولسون
سنه ای بت شکن رهبر بوگون مین افتخار اولسون
ائدن توحیدین احکامین جرادن برملا گلدی
کونول شاد اول کی دنیایه او ختم انبیا گلدی
- سه شنبه
- 29
- آبان
- 1397
- ساعت
- 20:0
- نوشته شده توسط
- ابوالفضل عابدی پور
- شاعر:
-
مهدی مازندرانی
ارسال دیدگاه