آل طاهایه خبر ویر ای باجی اکبر گلور
قتلگه‌دن خیمه‌گاهه شورش محشر گلور
بیر آتانون یوخ بیله ناکـام اؤلن نورسته‌سی
خیمه‌لـرده واردی بیحـد مایل دل بسته‌سی
مرکب اوستونده گلور خندان قیزل گُل دسته‌سی
یئندیرون یورقوندی آتدان رزمدن حیدر گلور
ایچماقـا جام شهادت باغلیوب زرّین کمر
چشمۀ حیواندن ایچدی ویروب شیرین ثمر
گورسنـور فَرقینـده عینـاً معجز شقّ القمر
گوئیـا تـاج شـرافت باشدا پیغمبر گلور
گلـشن پیغمبـر اکـرم روادور سولماسون؟
دیدۀ جـام جهان اشک غمیله دولماسون؟
آچماسون لیلا نئجه بوغمده زلفون یولماسون؟
محشر کبرانـی عیناً گوسترن مَنظر گلور
بانـوان عصمـت اُولـدی خیمـه‌دن یکسر کنار
آلدی نَجم و شَمس صُبحون دوره‌سین سیّاره‌وار
گوردولر بیر قانلو پیکردن آخار قان چشمه‌سار
ظاهـراً قـان باطنـاً بیـر چشمـۀ کوثر گلور
ایلیـوب طغیــان دریالـر کنـاره داشدیلار
اُمّهـات اَربَعـه سس چکدیلـر آغلاشدیلار
نقل ایدر راوی قویوب یئرده عبادن آشدیلار
خیمه‌دن نعش اوسته هی عورتدی بی‌معجر گلور
زینب کبـری گلـوب اوّل دولانـدی بـاشینه
بیر علی نعشینه باخدی بیر حسین قارداشینه
ایتـدی آهنـگ نـوا ویردی خبر گؤز یاشینه
بیلـه بولّم ایمدیده زینب علی سسلر گلور
گوردولـر اعضـا اولوب پاشیده زخم تیردن
محو اولوب بالمرّه یوخدور اصل ترکیب بدن
خانـۀ زنبــوره بنــزر زخـم تیـر و نیزه‌دن
عهده‌سیندن بو سؤزون نه خامه نه دفتر گلور
آلدیـلار اطــرافینی عمّه باجی بیکس آنا
باش آچان زلفون یولان تقریریله گلمز سانا
لیک جمله بیـر یانـا نازلـو سکینه بیر یانا
ایله قارداش یانینه گلسه باجی نیلر گلور
گوردولر ممکن دگل جسمینده بیرسان پرده‌سی
جلـوۀ سینانـی مستور ایلیوب قان پرده‌سی
مُرشد موسانی چون محو ایلیوب جان پرده‌سی
آیریلان شیـرازه‌دن بیر مُصْحَفه بنزر گلور
ای‌عـجب تیـر بـلا قلـب جهانی دَلمدی
دوشمدی دوران مداریندن بیر آن دنجلمدی
هامّـی گلدی خیمه‌دن لیلا کناره گلمدی
خجلتیدندن گوردی چون سلطان بی‌یاور گلور
امـر ایـدوب لیلایه‌ده گلسون امـام مُحتشم
گئتدیلـر اُفتــان و خیــزان بانـوان محترم
سَسلنوردی دمبدم ایوای اوغول وای هر قدم
هانسی اوغلی گورماقا لیلا کیمی مادر گلور
- سه شنبه
- 7
- شهریور
- 1391
- ساعت
- 7:54
- نوشته شده توسط
- جواد
ارسال دیدگاه