بستر شهادتده یاتما دور
مرتضانی یاندیرما فاطمه
گوزلرون یوموب عرش و فرشی گل
ماتمه بو یاندیرما فاطمه
گیتمه فاطمه (4)
گر چه صف شکن حیدرم ولی
گور نه نوعی افسرده حالتم
دهریده منم مشگلی آچان
چاره سیزلره باب رحمتم
باخ نجه ایشیم دوشدی مشگله
عم قزی نه سندن خجالتم
ویر سسیمه سس سیخما قلبیمی
حیدری اوتاندیرما فاطمه
گیتمه فاطمه (4)
همدم اولموسان دوقوز ایل منه
هر غم و بلایه دایانموسان
نسگیلون سالور اوت وجودیمه
من یانان مصیبتده یانموسان
درد و غم قباقیندا چون سپر
هر بلالری جانه آلموسان
گیتماقونلا بو داغلی سینمه
تازه دن یارا ورما فاطمه
گیتمه فاطمه (4)
واردی دیلده مرضیه بیر سوزوم
نیت دیلی حاصله یتور
من بویون بلاسی ایاقه دور
گویلوم ایستوری بیر قدم گوتور
خوشدی مرتضی سنله فاطمه
خسته روحیمه تازه جان گتور
باب غصه ده بو کمک سیزی
یاندروب دایاندیرما فاطمه
گیتمه فاطمه (4)
دستخط قدرت بو فرقتی
سنله من آراسی رقم وروب
دور اسفلی حاله نظاره قیل
زینبون نه گور گول کیمی سولوب
غصه لر اریتمیش وجودیوی
وای منه که زهرا اولان اولوب
گیتمه باری قال حیدری بیله
دهریدن اوساندیرما فاطمه
گیتمه فاطمه (4)
گوزلریم ساتاشدی عذاریوه
نقش اولوب یامان غملی منظره
سریوی نهان ایتمیسن ندن
چوخ گراندی بو دردون حیدره
واردی خواهشیم نیلی صورتون
ایلمه نمایان پیمبره
جدیوین یانوندا بو حالیله
جان مرتضی دورما فاطمه
گیتمه فاطمه (4) بار
سن سیز اولام آماج هر بلا
منزلیم پوزولموش چمن کیمی
گورمز عالمین چشمی دهریده
دلشکسته دلخسته من کیمی
ایلوسن بیله ترک آشیان
فاطمه غریب وطن کیمی
بو یانقلی گیتماقدا منزله
غم بساطینی قورما فاطمه
گیتمه فاطمه (4)
گر چه (زلفی) عاشقسن حیدره
یوخدی سنده خوش خلق و حوصله
گر چه دهریده پای لنگ سن
زندگی امورین دوشوب گله
حب فاطمه ایله دولان دانیش
مشکلاتیدن ایلمه گله
شاه دین دیلوندن بو نوعی یاز
مرتضانی یاندیرما فاطمه
گیتمه فاطمه (4)
- چهارشنبه
- 12
- دی
- 1397
- ساعت
- 20:56
- نوشته شده توسط
- ابوالفضل عابدی پور
- شاعر:
-
حاج علی زلفی تبریزی
ارسال دیدگاه