ویروب الله برکت خلقت ایچینده بشره
نظر لطف ایلیوب شیعه اثنی عشره
شیعه یعنی سند زنده اعمال علی
فکر وذکری غم دین،زینت آمال علی
ایکی دنیا شرفی بندگی آل علی
شیعه یعنی علوی مکتبینه حامی اولان
ظاهروباطنی هر عصریده اسلامی اولان
شیعه یعنی صدف گوهر ایمان و شرف
سینه سی دینه گوره تیر بلیاته هدف
قبله حاجتی گلدسته ایوان نجف
شیعه نون قلبی گرک صاف اولاچون آئینه
دین و قرآن سوزونی ساتمیا هر آئینه
شیعه نون فوته نمازی گیده قانیاش اَلییر
دامن حسرتینی اشک ندامت بلییر
شهوت وکبر و ریادن اتگین سیلکه لییر
سالک راه علی حفظ حجاب ایتسه اگر
قبرون اوَّل گیجه سی دادینه مولاسی گلر
شیعه تأخیره نمازین سالا انصاف دگول
گیجه گوندوز دیسه یافاطمه اجحاف دگول
غم زهراده نقدر آغلاسا اصراف دگول
هانسی زهرا غم بی حدینه عالم قربان
یارالی سینه ده قان ردینه عالم قربان
عالمی خلق ایلین وقتیده سلطان جلیل
حرمت فاطمه نی خلقتنه ایتدی دلیل
حبّ زهرادی کلید در جنات جمیل
روز محشرده که کرسی عدالت قورولار
عاشقین سینه سینه مهر شفاعت وورولار
عاقل انسان صدف نفسیده محبوس اولماز
سیر گلزاره گیدوب خاریله مأنوس اولماز
عاشق فاطمه محشرگونی مآیوس اولماز
ذکر یا فاطمه محشر گونی محشر یارادار
اسم اعظمدی یقین شیعه نی اوتدان قوتارار
خالقون خلقت والا نصبی فاطمه دی
باغ دینون گل زیبا لقبی فاطمه دی
جنتون عطری گوزلدور سببی فاطمه دی
یر گویون ریزه لری گوهر اولاسردی خانم
متن قرآندا گلن سوره کوثردی خانم
باغ دینون غزل بی بدلی فاطمه دی
عالمی روشن ایدن نور جلی فاطمه دی
افتخار علی و آل علی فاطمه دی
چاهیدن یوسفی عرشه آپاران فاطمه دی
نوحی گرداب بلادن قوتاران فاطمه دی
یوخدور ایرادی دیسم فاطمه حق سایه سیدی
همسرشیر خدا دین حقون پایه سیدی
عاشق فاطمه محشر گونی همسایه سیدی
مهر تأیید وورار کیم بوسوزه قائلدی
حبّ زهرا و علی اولماسا حج باطلدی
فاطمه کیمدور اونی خالق یکتا تانیور
ساکنان فلک و عرش معلی تانیور
حسنین و علی و زینب کبری تانیور
لب رحمت الینه بوسه وورران زهرادی
آتاسی ام ابیها چاغوران زهرادی
عاشق فاطمه محشرده صفه دور میاجاق
ذات حق عاشق زهرانی اوتاندیرمیاجاق
کیم ئورکدن دیسه یافاطمه یاندیرمیاجاق
کیم توکر فاطمه نون خاطرینه گوز یاشینی
ذات حق روز قیامتده اوجالدار باشینی
روزمحشرده که امت هامی حیران قالاجاق
خوف محشر هامینون صبرین الیندن آلاجاق
فاطمه امر ایلسه بارش رحمت یاغاجاق
کیم بو دنیاده اونون غملرینی یاد ایلر
روز محشرده خانم غصه دن آزاد ایلر
گرچه آزعمر ایلیوب دهریده سلطان زنان
علت خلقت عالم دی بو بانوی جوان
عرش وفرشی اوناخاطر یارادوبدور یارادان
« روزاول که نه عرش و نه ثریا واریدی
یوخودی آدم وحوا ولی زهرا واریدی»
هانسی زهرا نه یازوم من غم بسیاریندن
نه دیوم آه شب واشک شررباریندن
بیر نفر یوخ سوروشا ثانی مکاریندن
بومگر آیه دگول « یوم الحساب سئلت»
نه دیرسن دیسه لر « بای ذنب قتلت»
هانسی زهرا گل بی خار رسول مدنی
اریوبدور غم طاهایه گوره گول بدنی
حرمتون ساخلامادی ثانی بی شرم ودنی
ووردی بیر سیلی اونا دگدی یوزی دیواره
قولاقیندان قیریلوب دوشدی یره گوشواره
سیلی تا صورت زهرایه اصابت ایله دی
حَسَنی باغرینا باسدی دیدی قورخما وَلَدی
نگران اولما بالا رسم زمانه بیله دی
هر قیزون اولماسا قارداشی بلایه بوکولر
دورت طرفدن باشینا گرد مصیبت توکولر
- جمعه
- 14
- دی
- 1397
- ساعت
- 16:11
- نوشته شده توسط
- ابوالفضل عابدی پور
- شاعر:
-
مرتضی اسکندری
ارسال دیدگاه