بو حدیثی بویوروب حضرت صادق علنی
مخبر اعظم اولاد رسول مدنی
قنفذون ظلمی جوانمرگ ایلدی فاطمه نی
ضربه لر که آناما ووردی او بی شرم غلام
آیری عورت دوزه بولمزدی آنام ایتدی دوام
گون بگون پیکری تحلیله گیدوب اولدی نحیف
اریمشدی اریَن شمع تک اول جسم شریف
دورا بولموردی ایاقه ایله اولموشدی ضعیف
اورگی غملی گوزی یاشلی غذا خون جگر
اجله منتظریدی او خانم شام و سحر
گون او گون اولدی وفات ایتدی او ناموس ازل
آغلیان گوزلرینه غالب اولوب خواب اجل
مرتضی قیلدی وصیّت لرینه بیربیر عمل
صحن منزلده گئجه نصفی او مولای زمن
کوینگ اوستن اونا غسل ایتدی گیندیردی کفن
قویدی تابوته بتولین بدنین شاه ولا
ویردی دستور اوگنج علوی دفن اولونا
باخدی زینب آنا تابوتی گئجه دوشدی یولا
قاره گونلر قیزیوین سن دیدی دینجلدون آنا
الی قوینوندا قویوبسان بیزی خوشگلدون آنا
گوزومون کاسه سی واردور یری اشکیمله داشا
نه باجون واردی سالا قاره بو ماتمده باشا
قارداشون واردی نه تابوتیوه باری یاپوشا
اولمیان باجیسی نه قارداشی یالقوز آناوای
گیجه تابوتی گیدن قبره آدامسیز آناوای
او مسافر دگوسن ای منیم ایستکلی آنام
سفرون روشن اولا منده دالونجا سو سَپَم
مسن اولدی داخی جغدِ غمه بو غملی حرم
ئوزونه صورت بیت الحزن آلدی ائویمیز
پوزولان بیر چمنون شکلینه قالدی ائویمیز
گل لروندن داخی بوندان صورا اولماز خبرون
بیرده بو غصّه لی کاشانیه دوشمز گذرون
لانه سیندن اولور آواره گوزل جوجه لرون
مهرباندور آتامیز یوخدی چاتان پایه سینه
سیخیلار خوردا اوشاقلار آنانون سایه سینه
بدرقه ایلدی گوزیاشلی پیمبر قوناقین
منزلین گلدی خموش ایلدی روشن چراغین
زلفینی توکدی یوزه گزدی بتولین اطاقین
سن قرانلوق ائوه گئتدون دئدی ای جدّیمه گُل
من چراغ روشن ائدم بو گئجه انصاف دگُل
ماحصل یدّی نفر یولداش اولوب مولایه
یتوروبلر خانمی دفن اولونان ماوایه
مرتضی گوردی گیدور الده اولان سرمایه
هرقدر سعی ایلدی مالک اولا صبر ایوینه
اورگی گلمدی زهرانی قویا قبر ایونه
گه باخوب قبره پیمبر قیزینون بسترینه
گه دونوب سالدی نظر فاطمه نون پیکرینه
دیله گلدی دئدی درد دلینی دلبرینه
مرتضی فاطمه وئرمزدی بو آفاقه سنی
ایندی وئرسون نجه آخر قره توپراقه سنی
نقدر فکر ایلدی گوردی غم اطرافین آلوب
گهی مبهوت گهی صوت نواسی اوجالوب
دردیمون چاره سی زهرا دیدی اللّهه قالوب
من نجه پیرهن وصلیوی بو یرده سویوم
صبر عطا ایلسون الله سنی من قبره قویوم
او لقای صمدی دوتدی حقه روی نیاز
ایکی رکعت ایلدی حضرت معبوده نماز
یالواروب کعبه نون اللّهینه سلطان حجاز
بارالها سن علینی ایله بو غمده صبور
قبره طاها گُلونی تاپشوروم ای حیّ غفور
ایکی رکعت او نمازیکه علی ایتدی ادا
حق تعالی اونچون صبرجمیل ایتدی عطا
قیلدی مثلین او نمازین شه دین عاشورا
نه زمانیدی نه وقتیدی یوخیدی قالانی
قبره ایستوردی قویا یوز گوزی قانلو بالانی
مرتضایه گینه همدم واریدی یدّی نفر
یار و یولداشسیزیدی اوغلی حسین تشنه جگر
نقطۀ دایره تک دوره سین آلموشدی خطر
اللّری اوسته قالوبدور قوزی قربان یارالی
دیلینون ازبریدور جان یارالی جان یارالی
آرزو ایلدی احبابینی سلطان هدا
نوک شمشیریله قازدی یری شاه شهدا
اوغلونون قدّینه بیر قبر دوزلدوبدی آتا
دوتدی تصمیم سینان گوهری مدفون ائلسون
گکلمدی اللری مبهوت قالوبدور نِله سون
بالانی قویدی یره ایلادی اقدام صلوة
یرده دشمن متحیردی ملک عرشیده مات
قیلدی حاجت نمازین ایستدیگی اولدی برات
اللری اوستونه آلدی گینه سنمش گُهرین
رو بقبله ائلدی قبره قویوب صود امرین
عشق گهواره سینه وئردی یارالی بدنین
جابجا ائتدی تانتدیردی او طفلون وطنین
خم قیلوب قدّین ائدوب بوسه لب بی سخنین
باخدی حسرتله ایکی قانیله دولموش گوزونه
قرمزی دوشلوگونی چکدی کفن تک یوزونه
باغبان توپراقی توکدی گلونون صورتینه
شرف آرتوردی حسین کرب و بلا تربتینه
اوره گی یاندی او دیلسیز بالانون محنتینه
دئدی الدن گئدن هیهات اله گلسون علی
دوشلوگون اولدی کفن حرمله دینجلسون علی
آلتی آی عمر ائلدون عشقیده سالار اولدون
جدّیمون دینینه سرباز فداکار اولدون
رتبه ده سنده علی مثل علمدار اولدون
گلشن قدسیده پروازه گیدورسن بیلورم
سینۀ فاطمه ده نازه گئدورسن بیلورم
- جمعه
- 14
- دی
- 1397
- ساعت
- 16:59
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه