• جمعه 10 فروردین 03


حالات حضرت زهرا(س) و خطبۀ غرّای ایشان در مسجد مدینه اشاره به ماجرای کوچه -(ای قلم عنوان عشقی سالک تقوادن آل)

514

ای قلم عنوان عشقی سالک تقوادن آل
اقتباس کوه قافی شهپر عنقادن آل
مطلبین سررشته سین انسیّۀ حورادن آل
یاز فروغ عرش رحمت نور زهرادور فقط
طور سینای شرف بوندان هویدادور فقط
آسمان عصمتین خورشید عالم تابیدی
کائناته بعد ِ طاها و علی اربابیدی
کعبه دور محراب شیعه کعبیه محرابیدی
خلقت ارض و سماواته بهانه فاطمه
عزت و رحمتدی واللهی جهانه فاطمه
صبریده ایوبه بنزر بس کی دریا صبری وار
مرتضی عشقینده هردرده دوزوبدور جبری وار
قوی دیوم آخرنه دن زهرانین ایتگین قبری وار
گورموسوز تازه گلنده کهنه ، سوزلردن دوشر
قبر زهرا فاش اولا گر، کعبه گوزلردن دوشر
جوهر معنانی درک ائت صحبتیمدن با دلیل
گر چه بام کعبه دن بال و پر آچمیش جبرئیل
لیک بیر داش دورفقط کعبه،بنا ائتمیش خلیل
کعبه بانی سین سالاندا آتشه غوغایه باخ
آتشی گلزار ائدن فریاد یازهرایه باخ
چکسه گردون قبر زهرادن قرانلیق ابرینی
کعبیه قدرت وئریلسه باشدان ایلرصبرینی
عاشقانه بیر طواف ایلر او ، زهرا قبرینی
خشت خشت کعبه آوازه گلر بی واهمه؛
سسلنللر کاش اولیدوق خاک پای فاطمه
کعبه اولسا حلقه،قبرفاطمه قاش خلق اولوب
مشعروحلّ ومنا ومروه دن باش خلق اولوب
حَجرِاسود بیرمَلَکدورکعبه ده داش خلق اولوب
فاطمه اما یارانمیش فوق حوری و بشر
قبری والله فاش اولاندا کعبه رونق دن دوشر
آسمان عصمتین زهرادی پارلاق اولدوزی
مطلع انوار حق دن فیض آلوب طاها قیزی
آسمان نیلی دی چون نیلی دی زهرانین یوزی
غنچۀ نوخیز عصمت پرپر اولدی کوچه ده
شهپر رحمت یانوب خاکستر اولدی کوچه ده
یاندی درگاهی ولی یاندیرمادی قلبین اونون
قلبی زهرانون یانوب بیرکوچه ده آگاه اولون
اوندا کی خطّابون اوغلی باغلیوب زهرا یولون
بیر جسارت ایله دی عرش معلا تتردی
قدسیان آغلار قالوب تا قلب زهرا تتردی
بیرجسارت اولدی تابشدن دوشوب خورشیددین
بیرجسارت اولدی حیدر قالدی بی یار و مُعین
وامصیبت ناله سین عرشه سالوب روح الامین
وای اولا ، یثرب ده کی قرآن ایاقلاندی اوگون
مرتضی نین قوللاری معناده باغلاندی اوگون
کوچه نین تشریحینه بوندان چوخ عاجزدورقلم
باشلانوب اول کوچه دن زهرایه مین درد والم
اوردا بیر ایش گوردی ثانی منظر قوم ظلَم
مجتبی فریاده گلدی غنچه تک صولدی آنام
یا رسول الله ئوزون گل ، ووردیلار ئولدی آنام
کیمدی زهرا شیر هیجا حیدر کرار تک
کیمدی زهرا طائر غم جعفر طیار تک
کیمدی زهرا نطقی گویا احمد مختار تک
خطبۀ غرّاسی احساسین هویدا ایله دی
زادۀ قحّافه نی (۱)مسجدده رسوا ایله دی
مسجده ساری گلور بیر غیرت سرشاریلن
چادرِ عفّت باشیندا قلب آتشباریلن
دورین آلمیش قوم وخویش ونئچه خدمتکاریلن
وارد اولدی مسجده دخت نبیّ مصطفیٰ
چکدیلر بیر پرده تا فاش اولماسین سرّ حیا
داغ پیغمبردن اولمیشدی خانم زهرا ملول
وا اَباها سسلنوبدی فاتح قلب رسول
نالۀ جانسوزینه آغلار قالوب قوم جهول
مسجده بیرهمهمه دوشدی جماعت آغلاشوب
اوندا پیغمبر قیزی شور و صلابتله داشوب
سویله دی ؛ الحمدللهُ عَلیٰ مَا انعمَه
شکر بیحد ذات پاک کردگار اعظمه
یوخ شریکی تک اودی حاکم امور عالمه
لایُریٰ دی گوزلره گر چه گورونمَز آشکار
لیک باخسان هر یره وارجلوه سی بس بیشمار
تاپدی تا حمد و ثنای حیّ سبحان خاتمه
اشهَدُ اَنّ مُحَمّد سسلنوبدی فاطمه
قلبلرده صیحۀ فریادی سالدی واهمه
بیلدیلر زهرا گلوب اتمام حجّت ایله سین
جاعلان امر طاهادن شکایت ایله سین
ای جماعت وار یادیزدا غرق استبدادیدیز
پیرو کفر و نفاق و فتنه و بیدادیدیز
بتلارا سجده ائدوب بو فعلیدن دلشادیدیز
تا بابام چاتدی مقام بعثته ، انذار ائدوب
سینه زی انوار حیّ ذوالمنه سرشارائدوب
یرمی اوچ ایل نوررحمت قلبیزه تابان اولوب
حق کتابی آیه آیه فعلیزه برهان اولوب
ایندی اما قلبیزین فرماندهی شیطان اولوب
نائب بر حق طاها حقینی غصب ایله دیز
گورکیمی مولاعلی نین وجهینه نصب ایله دیز
فقر و ذلت سایه سالمیشدی سیزه ، اقوام کین
سدّ جوعیز جیفه و مرداریدی عین الیقین
بیم و وحشت حاکمیدی شهریزه قوم لعین
فتنه زی طاهایه خاطر حق تعالی رفع ائدوب
دشمنیزهرفتنه ایلوبدورعم اوغلوم دفع ائدوب
سیز بیلورسیز بیز دلیل خلقت عالم لروخ
بیز دلیل جوشش کوثرلروخ ، زمزم لروخ
بیز دلیل تابش مهر و مه و انجُم لروخ
تک سقیفه رٲینه ساتدوز عجب ایمانیزی
واقفیدیز گرچه هامّیز ؛ دوغریسوز قرآنیزی
ای جماعت ؛ سنّت پیغمبری محو ائتمیسیز
حق صراطین قویموسوزشیطان یولوندان گئتمیسیز
بعد ِ طاها مرتضانی یورموسیز سینسیتمیسیز
فتنه لر کی قورموسیز بنیان ِ ایمانی ییخوب
امر پیغمبر غدیر خم گونی یاددان چیخوب
یَابْن قحّافه ! ئوزون واقف سن حیدر شأنینه
آز قالور تا مرتضی چاتسین پیمبر شأنینه
چاتماسان سن رتبه ده حتی او قنبر شٲنینه
عزل ائدوبسن مرتضانی بی دلیل و مدعا
هانسی حُکمیلن اولوبسان جانشین مصطفی
یَابْن قحّافه فدک حُکمی پیمبر حُکمیدی
کیم موافق اولماسا والّلهی صُمٌ بُکمیدی
حق کتابینده وراثت رکنی اعلیٰ رُکنیدی
جنّتین مُلکی منیم آدیمده دی بی همّ وغمّ
بو فدکده یوخ گوزوم، حقیمدن امّا گئچمرم
ایّها الانصار ! یارانِ توانمندِ ولا
یوز چویوردیز دینیدن باشسیزقالوب امر خدا
دوزدی رحلت ائتدی پیغمبر، ولی وار مرتضیٰ
حق کتابیندن بونی ذکر ایلیرم ، فٱسْمَع بِهِ
آیۀ (2) اِلاّ رَسولٌ قدْ خَلَتْ مِن قَبْلِهِ
قیله نین اولادی!(3)سیزلر ثانیه یار اولمیون
حیدره پابند اولون بوبکره غمخوار اولمیون
جاعلان امر طاهایه وفادار اولمیون
منصب و حکم خلافت حیدریندی دانمیون
آتش خشم خدای لایزاله یانمیون
ای جماعت حجّتی من سیزلره ائتدیم تمام
بو خلافت مرکبینده وار یارا یوخ التیام
تا ابد جاریدی خشم کردگارِ لایَنام
ختم صحبت ،عزّت ِ دین ِحقْ،اولیٰ دور منه
تا جانیم وار مرتضی سالار و مولادور منه
ای« مصیّب »منطق زهرا وقار اوستونده دی
مکتب و ذکر و مَقالی عشق ِ یار اوستونده دی
شیعه نین زهراسی وارپس اقتداراوستونده دی
حُبّ زهرا وار اگر قلبینده ائتمه واهمه
تا توانین واردی عشقیلن دئنن یافاطمه
1) منظورازابن ابی قحافه همان خلیفه اول می باشد
2) آیه ١٤٤سورۀ آل عمران ؛ و ما محمد الا رسول قد خلت من قبله الرسل . . .: مگر محمد (ص) پیغمبری  از طرف خدا نیست و قبل از او پیامبرانی نبودند که درگذشتند و آیا اگر محمد نیز به مرگ یا شهادت درگذشت باز شما به دین جاهلیت رجوع خواهید کرد . . .
3) منظورحضرت زهرا از اولادقیله همان قبایل «اوس وخزرج»می باشد
منبع ومأخذ:
کتاب آیینه ایزدنماحضرت زهرا(س) تالیف آیت الله محمدرضا ربانی

  • جمعه
  • 14
  • دی
  • 1397
  • ساعت
  • 19:24
  • نوشته شده توسط
  • ابوالفضل عابدی پور

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران