قطره ناچیزیدی تا وصف ایله سون دریانی
کیم یقینه یتیشوب درک ایلیوب عقبانی
هر کیمون اولسا اگر عشق علی قلبینده
جان وئرن وقتیده حتما گوره جاق مولانی
عشق مولادی منه قدرت تحریر اولدی
ایله سه یاری اگر، وصف ایدرم زهرانی
یوخ سوزوم اولسا قلم شاخه لری اشجارین
وصف کامل ایله سون کیمسه ده یوخ امکانی
لیک هرکس که یازوب مفخر لعیا وصفین
ئوز توانیجن ایدوب وصف، او گل ریحانی
منده قاصر قلمیمله نچه جمله یازورام
وصف زهرادن اگر لطف ایلَسه یزدانی
او خانم فاطمه دور، عصمت یزدان لقبی
باعث اولموش که خدا خلق ایله سون دنیانی
ثالث پنج تن و مادر پیغمبریدی
عارفه، عالمه، حیرتده قویوب حورانی
بو خانم وصفینه چوخ سوز یازیلوب اشعاره
وصفیمون ایله توجه ندی گور عنوانی
عزم ایدندن صورا خاتم سفر عقبایه
گوردی زندان ئوزونه فاطمه بو دنیانی
بیر گونی گوز یاشی یوزده اوتوروب منزلده
حمد ایدوب آغلیوب ایلردی ثنا رحمانی
همسری شیر خدا وارد اولوبدور بیته
گوردی زهرانی ملول و گوزونی گریانی
دوردی زهرا ایاقا گوزیاشی رخساره آخور
پیشواز ایله دی ئوز رهبرینی، مولانی
مرتضی آلدی خبر علتینی، گوز یاشین
دی منه دردیوی ائتمه سوزیوی پنهانی
بیله گفتاره گلوب دخت رسول مدنی
منه سویله سن ایا فاطمه نون جانانی
قلب بو عالم هستی کیم اولار عالمده
سویله دی قلبم ئوزوم، آند اولا زهرا جانی
دیدی قلبون سنون عالمده ندور مولا جان
دیدی حق، قلب ایلیوبدور منیچون قرآنی
گینه ده بیله سوال ایتدی خدیجه بالاسی
قلب قرآن ندور ای خاتمون هم پیمانی
قلب اولوب سوره یاسین دیدی بیل قرآنه
قلب ایدوب یاسینه حق فاطمه ی طاهانی
بیر بیله شأن و جلالت که واروندور سنده
نیتون سویله ندور ای حسنینون جانی
گوزونون کاسه سی گوز یاشیله دولدی خانمون
آخدی رخساره سارالدی او رخ نورانی
دیدی وار بیر بیله گر شأن و جلالت منده
نیه وئرمزله سلام ئولکه میزون نسوانی
قیلدی فرمایش او دم فاطمیه شیر خدا
آغلاما حق سنیله زینت ایدوب رضوانی
آغلار اولموش گوزی اما او شه مظلومین
دولدی گوزیاشیله داشدی گوزینون پیمانی
سیل تک گوزلرینون یاشی آخوب صورتینه
بورودی غصه و غم قلب شه مردانی
دیدی گر اهل مدینه سنه ویرمزله سلام
یاندیروبلار دل خونینِ منِ نالانی
من سلام ایلیرم رد جواب ائتمزلر
گور نه مظلوم ایلیوبلر شه مظلومانی
اهل کین خانه نشین ایتدی منی یا زهرا
ایده بیلمزدیله اولمیدی نبی فرمانی
یاندی قلبیم اوگونی که سنی ثانی ویردی
آه و افغانیلیه دولدوردولا یا کیهانی
در و دیوار آرا قالدون قالا دین پا برجا
اولدی قرآنه گوره محسنیموز قربانی
قنفذون ضربه لری سالدی سنی طاقتدن
نجه تاب ایلرم عم اوغلون گوره بو ایزانی
فاطمه، یاره دی قلبیم، بیلوسن علتینی
طی ایدوبسن سن ئوزون راه و رَهِ عرفانی
بیلمیوب سینه سینی یاره لیوب دور مسمار
قفس سینه سی سینموشدی آخوب القانی
سیندیروب قنفذ اونون ساق قولونی بیلموردی
یا ویروب گل یوزونه کوچه ده سیلی ثانی
گر بو اوچ مسئله نی میر هُدیٰ بیلسیدی
ذوالفقاریله بولردی آرادان اعدانی
اود دوتوب یاندی صحیفه بو غم عضمادن
قلما صبر ایله یازما بوقدر جریانی
«ثاقبا» دردیوی سویله ایده درمان زهرا
یا قسم ویر خانما قلبی یانان مولانی
آند ویرم سنی عرض ایت خانمون زهرایه
قویما تنها منی قبریمده، دی زهرا جانی
- جمعه
- 14
- دی
- 1397
- ساعت
- 19:35
- نوشته شده توسط
- ابوالفضل عابدی پور
- شاعر:
-
کربلایی فخرالدین اسکندری
ارسال دیدگاه