قان آغلارام دلدن سنه
هر آن آنا یا فاطمه
قویدی یتیمه زینبون
دوران آنا یا فاطمه
واردور یری داد ایلسون
تا جاندا وار جان زینبین
یاده دوشنده دل یانار
هم وصلۀ چادر شبین
آغلار گوزیله اوج ایدوب
افلاکه یارب یاربین
گون ویرمدی غمدن سنه
دوران آنا یا فاطمه
ایتموم ننوعیله آنا
دورِ فلکدن من گِله
بیر بیله وقتیمده منی
قویدی آناسیز ظلمیله
گور نه حسینین گوز یاشی
جاری اولور بی فاصله
اشکی اخور ویرمور امان
بیر آن آنا یا فاطمه
گرچه آتام واردور ولی
اولماز آتا مثل آنا
کیمدور آناسیز قیزلارین
احوالینه دلدن یانا
ای هم زبانی زینبین
وی غم ایدن عمرین فنا
سن ئولمدون ئولدوردولر
عدوان آنا یا فاطمه
ازبس غلاف تیغیله
ووردی آنا قنفذ سنی
غش ایلدون بی فاصله
یاندوردی اول حالین منی
چکدی آتامی بیعته
قول باغلی کفارِ دنی
امداده گیتدون مسجده
گریان آنا یا فاطمه
مشکل قیزین بیرده آنا
سندن صورا دلشاد اولا
واردور یری قان آغلیا
هم مونسی فریاد اولا
سن تک آنام الدن گئدوب
چرخین ایوی برباد اولا
سازش سنیله ایتمدی
دوران آنا یا فاطمه
چیخماز یادیمدان بیر زمان
ویرموب امان آغلار گوزین
یاندی قاپون قالدون در و
دیوار آراسیندا اوزین
آخر اولیدی اللری
شل ای آنا جان قنفذین
ظلمی اولوبدور مرگیوه
عنوان آنا یا فاطمه
ای شافع روز جزا
ای دختر ختم رسول
تنگه گلوبدور (حامدی)
عمرینده اولموش دل ملول
ایله سنی اوغلون حسین
بو بیر سوزی اوندان قبول
قویما قالا روز جزا
حیران آنا یا فاطمه
- چهارشنبه
- 19
- دی
- 1397
- ساعت
- 12:57
- نوشته شده توسط
- ابوالفضل عابدی پور
ارسال دیدگاه