عم اوغلی جان سنون جان حسینیله حسنون
ایکی امانت زهرا قالور یانوندا سنون
حسینیله حسنیم هر دو نور عینیم دور
عزیز جانیدن آرتوق منیم حسینیم دور
بو نور دیده لریم اشقیای امّتدن
نه ظلملر گوره جاقلار جفای امّتدن
عیان اولوب منه گویا بو گونکی گون گورورم
منی بو غم یتیروب جانه ئولمه میش ئولورم
خبر وئروبدی رسول خدا عیاندی منه
گوزوم ائوینده که زهری وئریبدیلر حسنه
جگرلری اثر زهردن دونوب قانه
باجیلاری دولانور باشینه چو پروانه
معاینه گورورم نور هر دو عین اوغلوم
بدن یارالی وئرور تشنه جان حسین اوغلوم
صاقا دوننده دیور العطش اناالعطشان
وئرور جوابینی خنجر یاراسی زخم سنان
وورولّا تیغیله اول دم دوننده صول طرفه
دولاندیرور گوزینی گه بقیعه گه نجفه
آلوب جوانب اطرافی دسته دسته سپاه
اولار دورور بو دیور یالقوزام مدد الله
گوزین آچاندا گورور قاتلین باشی اوسته
گئدلله خیمیه کفار دسته به دسته
گله خیاله نه ممکن مصیبت زینب
نه حاله قالدی او ساعتده بولمرم یارب
قشون احاطه ائدوب خیمه گاهی زینب زار
چخوب شتابیله تلّ اوسته چون قالوب ناچار
گوروب قدملری تیترور الین قویوب باشینا
سلام وئردی او یردن یارالی قارداشینا
سلام اولا سنه ای اهل بیت دادرسی
مگر قولاقوه یتمز قیزون سکینه سسی
یتیش هرایمه ای شاه مشرقین قارداش
تالاندی خیمه لرون هارداسان حسین قارداش
او حالتینده که سلطان خطّه ی اعزاز
ائدردی خالقیله قان ایچینده راز و نیاز
قولاقینه یتیشوب استغاثه ی زینب
گوروب کی جذبه لنوبدور یاخون گلور زینب
اونون گلن یولونا گوزلرینی دوندردی
قاباقجا زینبه قلباً سلام گوندردی
توجّهیله مقاماتی سیر قیلدی تمام
گورنمدی دل زینب کیمی شکسته مقام
دل شکسته ی زینبده حق عیان گورونوب
اودور کی یدّی قدم زینبه طرف سورونوب
گورنده قلبینی زینب امام وابسته
الین قویوب اورگینه دوشوب یوزی اوسته
دئدی بو حالیله گلماقیوا رضا دگلم
بو نوع گلمه کی آز قالدی خجلتیمدن ئولم
خجالتم سنه مندن یتیشدی بو زحمت
قیامته کیمی قارداش بسیمدی بو خجلت
همان بو حالتیله گلمه ای شه ابرار
منی اسیر ائلیوب قوی قولومی باغلیالار
دئسن نقدر«حقیرا»سوزون تمام اولماز
تمام قیل دل حضّارده دوام اولماز
- چهارشنبه
- 19
- دی
- 1397
- ساعت
- 13:16
- نوشته شده توسط
- ابوالفضل عابدی پور
ارسال دیدگاه