علینی سالدی فراقون ملاله زهرا جان
عزالیام هانی محرم بو حاله زهرا جان
علاقه وی بو محقّر زمانه دن کسدون
یتشدی طالعون اوج کماله زهرا جان
منیم مدینه ده سن یار و پشتوانه میدون
دؤنر غمونده بو قامت هلاله زهرا جان
سینیدی کاش او ال که سنه وروب سیلی
او سیلی عمریوی گتدی زواله زهرا جان
سالاندا لکّه بولود آسماندا آی یوزونه
من آغلارام او گؤرمیش جماله زهرا جان
گئچنده کوچه دن الاندا مجتبی پوزولار
یادیندا چون جریان قباله زهرا جان
فدک قباله سی عمرون قباله سین بوکدی
قالوب او کوچه ده آهنگ ناله زهرا جان
جوار رحمت طاهاده ایندی مهمانسان
منیمده گل یوخوما ، لامحاله زهرا جان
یتور سلامیمی پیغمبره ، دعا ایله سین
فراق گونلری دؤنسون وصاله زهرا جان
دور ای یارالاریمی باغلیان یارالی خانم
یارا دگوب بو دل پر ملاله زهرا جان
جانیم چخنجا ساغالماز بو آیریلیق یاراسی
که لاله ، داغی سؤر ، داغی لاله زهرا جان
ایراق گوزوندن اولا، قنفذون آچخدی الی
چاتوبدی شهرت و مال و مناله زهرا جان
مدینه دن سن ئولندن گیدوب مؤذّنیمیز
الیم یتشموری نیلوم بلاله زهرا جان
او گوندنیکه بلالین اذان سسی کسیلوب
صحابه نین دلی دؤنمور مقاله زهرا جان
جگر یارادی، اورک مضطرب ، الیم باغلی
ایکی گوزوم ایکی داشقین پیاله زهرا جان
نه وقته چان گوزی یاشلی باخوم یانان قاپیا
جواب یوخدی ویرن بو سئواله زهرا جان
اولار که دوگدی سنی خلعت آلدی دشمندن
وئر یلدی رُتبه لر اهل قتاله زهرا جان
سسیمه سس ویرن اولسا سکوتی سند یّرام
قسم رضای حق لایزاله زهرا جان
ولی نیدیم که آلوب دوریمی منافقلر
تأسف امت بی اعتداله زهرا جان
مغیره دن گوزی قورخوب منیم بالالاریمون
اونی گورنده دوشور اود خیاله زهرا جان
ئوزون گل ایوده آنالیق ایله یتیملریوه
منیم باشم قاریشوب قیل و قاله زهرا جان
بلورسن اسمیوب هیچ جنگیده منیم بدنیم
گوز آچ دوشوبدی علی گور نه حاله زهرا جان
شکایت ایلمورم ، قور خورام فقط گئج ئولم
زمانه تنگیدی فخرالرّجاله زهرا جان
- پنج شنبه
- 20
- دی
- 1397
- ساعت
- 11:19
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه