دولوبدور اشک شوقیله ایکی پیمانه یا زهرا
خمار باده ی نابم هانی میخانه یا زهرا
مبارک اسمون اسرار تجلای حقیقتدی
مثال شمعدور آدون جهان پروانه یا زهرا
بئله یانام سنون عشقونده ای مظلوم اولان معصوم
که قویسون آدیمی دنیا منیم دیوانه یا زهرا
دمادم سسلدون دلدن امیرالمؤمنین حیدر
علیاً حجة اللهی دئدون مردانه یا زهرا
سنون آیات برهانون هویدادور طبیعتده
یقین کُردور سنه هر کیم دئسه افسانه یا زهرا
نه تنها مصطفی حتی علیده اللرون اوپدی
دییردی پنج تن ایچره بیزه دردانه یا زهرا
سماوات و زمینده ماخلق دوشسه آغیر درده
گللّر دیلده «یا زهرا» هامی درمانه یا زهرا
سنون مِهرون بولوددور که یاغور هر دم بو گوزلردن
منیم قربان اولا جانیم بئله بارانه یا زهرا
تقاضا ایتمه میش، سندن کرامت گورموشم فورا
فقیرانه ایدورسن سن کرم شاهانه یا زهرا
دلیل لطف شایانون منه عشق حسین اولدی
حسینه یانمیان سنلن اولار بیگانه یا زهرا
شرافت سیز جماعت توکدی قانون حیدره خاطر
او مظلوم قان باتار؟ باتماز قسم قرآنه یا زهرا
او که غصب ایلدی حقون یقینا نسل شیطاندی
الی الحسرت اولا لعنت بوتون شیطانه یا زهرا
سنون اول درگهون که مهبط نوریدی گوگلردن
منیم باب امیدیمدی اگر چه یانه یا زهرا
عجب غمخانه دور دنیا نوای آشنا گلدی
علیدور بو دل شبده گلوب افغانه یا زهرا
اگر چه چوخ غریبم سن ولی آسوده خاطر یات
شکسته پر کبوتر تک گلوبسن جانه یا زهرا
حلال ایله منی آخر الیمده اولمادی چاره
گوزون هم سینون هم قلبون دونوبدور قانه یا زهرا
- پنج شنبه
- 27
- دی
- 1397
- ساعت
- 12:27
- نوشته شده توسط
- ابوالفضل عابدی پور
- شاعر:
-
اکبر پورآقا
ارسال دیدگاه