کیم ائتدی فنا دهریده حقدن تبعیّت
خلاق اونا یاراولدی گوزل طینت آپاردی
بیر گون چمن عشقیده آسوده گزیردیم
بیر منظره گوردوم که منی حیرت آپاردی
شوقیله گل اوستونده اوتورموشدی که بلبل
عطر گل اونی مست ائله میش لذّت آپاردی
ایلوردی نوازش گلی چون باد بهاری
ناگه من شوریده سری فکرت آپاردی
بو فکرتین اوستونده کماکان دولانیردیم
بیر آیری خیال اوسته منی حسرت آپاردی
علّت ندی کوتاه اولی زیبا گلون عمری
گرچه بو آزعمرونده کلان عزّت آپاردی
بلبل دیله گلدی او گل ناز عوضیندن
بیر سوز دئدی گلشنده منی محنت آپاردی
کوتاهیدی گرعمری گلون صحن چمنده
آزعمرونه باخ گور نقَدَرشوکت آپاردی
گل عمرونی گلشنده حساب ایلمه کوتاه
بلبل گُله باخدیقجا گلی خجلت آپاردی
قانون طبیعتدی لطافت گُلون اولدی
گلشن دولوسی جلوه لنوب شهرت آپاردی
ایکاش اولا انساندا بو گُللر سایاقیندا
اوندان گوره کیم دهریده شخصیت آپاردی
انسان دئدیگون بندۂ خلاق جهاندی
گلدن بو لطافتده که وار سبقت آپاردی
معطوریدی گلدن چمن عشقیده اما
بعضی عملیندن گوروسن ذلّت آپاردی
تدبیر ستم اولماسا انساندا نخوشدی
شاید اونی اهریمن بدفطرت آپاردی
شیطان بشرون نفسیدی انسان بد اندیش
بیراهه گئدوب عمر اوزونی لعنت آپاردی
ثانی کی ستم کاریدی انسان دئمگ اولماز
گور نیلدی ظالم آرادان حرمت آپاردی
یاندی ستمینده که اونون درگه زهرا
لعن ابدی ثانی دون خصلت آپاردی
بیر گل کی لطافتده اونون مثلی یوخیدی
گلزار محبتدن اونی محنت آپاردی
یثربده اوگل صورتی بیر خارخ ساتاشدی
قلبینده اوگلزار غمه حسرت آپاردی
گل پرپر اولوب باغ ولایتده ولیکن
قبره او گلی یدّی نفر امّت آپاردی
قبر اوسته بویوردی بو سوزی حیدر الهی
ئولمزدی بتولی آرادان عصمت آپاردی
محبوبۀ خلاق جهان کوثر طاها
گئتدی حرم عشقیدن امنّت آپاردی
یارب نظر فاطمه دن «مژده» نی سالما
امید اونی جنّاته او مه طلعت آپاردی
مژدۀ اردبیلی
- پنج شنبه
- 27
- دی
- 1397
- ساعت
- 13:30
- نوشته شده توسط
- ابوالفضل عابدی پور
ارسال دیدگاه