امامتین گونونون قلبی انقلابیده دی
گورور چون عصمت آیی حال اغترابیده دی


نجوم غم آیی دورت سمتیدن حصاره سالوب
مدینه نون مهینون غصّه لی یوزی سارالوب
ستاره نون بیرینی خسته سینه اوسته آلوب
ستاره ناله ایدور ماه پیچ و تابیده دی


ستاره اشگی سبودن سوزن سو تک سوزولور
جمال زرد مهین اوسته ژاله تک دوزولور
بو ژاله لر سر مژگان نجمدن اوزولور
آیون سولان یوزی گل تک گنه گلابیده دی


نه وار کنار ائلین ماهیدن ستاره لری
نه وار نوازش ایدن زرد رو بهاره لری
قراریدن آپاروب غصّه بختی قاره لری
بالاجا قلبلری حال اضطرابیده دی


گلوب علی اوزی اولدوزلاری کنار ائلدی
نجوم درده طریق غمی مدار ائلدی
دولوب سرشگیله گوز دردین آشکار ائلدی
غروب رنگی دئدی روی ماهتابیده دی



بالالاریم بو همان دخت پاک طاهادی
توان قلب علی افتخار دنیادی
علینی الدن آلان دلشکسته زهرادی
دوشوبدی بستره جان سینه ده عذابیده دی


بو فاطمه که ئوزی ما سوادن ا فضلدی
نه شاد اولوبدی بو ایوده نه بیرجه دینجلدی
دالیمجا اللری پهلوده مسجده گلدی
یتشدی گوردی منیم اللریم طنابیده دی


بو فاطمه که بو نوعی دوشوبدی بسترده
بونی پیمبر ئوزی وصف ایدوبدی منبرده
سنوبدی حرمتی وار احترامی گویلرده
کمال شهرتی گوگلرده نُه قبابیده دی


اوجالمو ر ایندی الی اشگینی سیله گوزدن
ئورکده کی سوزی سوزنده دی یانار کُوزدن
منیده ایتمیوب آگاه ئورکده کی سوزدن
تمام غملری قلب آدلی بیر کتابیده دی


هزار درد دله گوز یاشی اشاره ایدور
فقط علی بلور الآن چالشدیقیجا ندور
علی الندن آلور دامنین مزاره گئدور
شکسته قلبی سنان سینه ده شتابیده دی



یورولدی فاطمه اون سکیز ئیلده دنیاده
اولوبدی ایندی بونا رحل رحلت آماده
اگر چه غصّه یوروب ایلیوبدی افتاده
محمد عربی گوئیا رکابیده دی


بونون محوّل اولوب رخصت جنان الینه
بونون زمانه وورور بوسه هم زمان الینه
هامی امیدِ علی باغلیدی سینان الینه
شبیه دور او گُله روی سیل آبیده دی


اوجیدی معجری مین پادشاه تاجندن
چوخیدی نور جمالی جنان سراجندن
قالوبدی عاجز علی دردینون علاجیندن
ملال و محنتی رخساری تک حجابیده دی


ئورکده گزلین اولان دردین آشکار ایلمور
ئوزی چکور ئوزی تاب ایلیور کنار ایلمور
سزلدیور ولی من گلجک آشکار ایلمور
بو قان دولان گوزینون جلوه سی سحابیده دی


ئورک غمی سبب اولدی گوزل جمالی سولا
یاتانمزیدی گجه هی دونردی صاق و صولا
غمین دئمزدی مبادا علی خجالت اولا
ولی گورردیم ایله حالت مذابیده دی


بونی یقین بلورم تاپشروب ئوزی حسَنه
نه گوردی کوچه ده فاش ایتمیه ایوه گلنه
نه من دئدیم بونا ئوز دردیمی نه ده بو منه
زمان گچوبدی داخی آرزیلار سرابیده دی


تلاش ایدریم اوزوم بونلا هم ملال ائلیم
نیه مریضیدی جویای وضع حال ائلیم
اوتاندیم اولمادی ممکن ولی سئوال ائلیم
اورگیم ایستدی دل گوردوم اجتنابیده دی


آنوزدا بیر بیله فکر ایلیردی ئوز ئوزینه
گوزوم دوشردی الیکه او قان دولان گوزینه
اولاردی مالک اودا من کیمی ئورک سوزینه
اوسوزلر ایندی سولان یوزده اشگ نابیده دی


منی گوزتلدی حقیمده چوخ کرم ائلدی
سینان الی الیمی دوتدی رفع غم ائلدی
گتورمدی دله دردین اورک ورم ائلدی
دل اهلی اولسا سُوزن گوزلری خطابیده دی


حسینی شاعر اودور «هادیا» تاپا تقوا
خلوص نیتیلن شعری ایلیه انشاء
قبول ایلسه بیر بند شعروی زهرا
نتیجه روز جزا موسم حسابیده دی


#فاطمیه_شهادت
#امامتین_گونونون_قلبی_انقلابیده_دی
#هادی_اردبیلی
#ترکی