• پنج شنبه 9 فروردین 03


حالات حضرت زهرا (س) -(یارب اگر ایجاب ایلسه امر مشیت)

691

یارب اگر ایجاب ایلسه امر مشیت
احسان ایله گلسون عمله دلده کی نیت
زهرانین ایدوم ساحتینه عرض ارادت
بو شرطیله گراولسا عنایت خانیمیمدان
همواره اولوب لطف و کرامت خانیمیمدان


من بیر نفرم معترف جرم و گناهکار
آلوده و ناپاکم و محتاج نمکذار
بیر روسیهم عاصی و مجرم و خطاکار
اما خانیمیم لطف و عنایتدی سراپا
هم عاطفه و نعمت و رحمتدی سراپا


هر چند که احبابینه ایتگیندی مزاری
اوچ یرده ایدر اهل ولا گوز یاشی جاری
بیر منبر و محراب آراسی یا که کناری
ممکن اولا زوّاری گیدر بیرده بقیعه
بیرده اوز ایوینده اولا شاید او ودیعه


هر نوعیله تحسینه سزاواریدی زهرا
احساسیدی اخلاصیدی ایثاریدی زهرا
اوز همسرینه یار فداکاریدی زهرا
معلومیدی مولایه حیاتین بو نکاتی
مرهونیدی زهرایه حقیقتده حیاتی


زهرا نجه زهرا فلک عصمته اختر
زهرا نجه زهرا صدف عفته گوهر
زهرا نجه زهرا او کمکسیز شهه یاور
بیر کیمسه ده اولماز اولا بو قدرت و تمکین
ایثاری ایده همسرینین عمرینی تضمین


پیغمبر رحمت شرف عالم امکان
ایستردی ایده بو خانمین شأنینی اعلان
فرمایش ایدردی آتاسی بو قیزا قربان
ایلر بیزه بو نکته بو معنانیِ حکایت
زهرادی گل سرسبدِ عالم خلقت


زهرا نجه زهرا گل زیبای رسالت
زهرا نجه زهرا  دُر دریای محبت
زهرا نجه زهرا شرف عالم خلقت
مانندینی گورمز بو جهان تا بو جهان وار
باشدان ایاقا مهر و وفا رأفت و ایثار


ای گلشن طاهایه گل ناز و معطر
ای عفّته پیرایه اؤزی عصمته زیور
وی بحر محبت صدف خلقته گوهر
سن نوگل زیبای گلستان وفاسن
سن گوهر پرارزش دریای حیاسن


ای سرو قدی نخلۀ گلزار رسالت
وی معنی ایثار و وفا روح فضیلت
مسجدده علیدن ایلین وقته حمایت
فاش اولدی که سن آیت حیِّ ازلی سن
سن یار وفادار و فداکار علی سن


سن گلشن توحیدیده بیرغنچۀ ترسن
سن معنی کوثرده کی پربار ثمرسن
افسوس که عمرین گونی تک زودگذرسن
هیچ بیر گُلین عمری سنون عمرون تک آز اولماز
هیچ بیر گل افسرده جمالین کیمی سولماز


بو مطلبه مولا اوزیده ایلوری اقرار
مین ایللراگر دور ایده بو گنبد دوّار
مشکل گوره زهرا کیمی بیر یار وفادار
هیهات بتولین گوره مانندینی دنیا
باشدان ایاقا مهریدی ایثاریدی زهرا


نه همسریدی تک منه زهرای فداکار
بیر یار وفاداریدی بیر یاورغمخوار
باشدان ایاقه عشقیدی اخلاصیدی ایثار
هر لحظه که گورسیدی اگر غصّه لیم من 
دوزمزدی آلاردی غم و اندوهیمی دلدن


بیعت گونی جبراً آییراندا بونی مندن
قنفذ ایله بیر ظلم ایلیوب منفعلم من
ای کاش دوشیدی او ایکی شوم الی تندن
مجروح ایلیوب ضربتی بازوی بتولی
قمچی یری درده گتوروب قلب رسولی


بیر کشمکش اولدی دیمورم من نلر اولدی
باد ستم اسدی خانیمون گلشنی سولدی
هرغنچه گلین باغری قزل قانیله دولدی
بو حادثه لر قویدی آناسیز حسنینی
زهرانی شهید ایلدی آغلاتدی حسینی


تهدید اولونان وقتیده دربار امامت
بوردا دئدیلر فاطمه وار ائتمه جسارت
باشَد دئدی وار فاطمه، وار منده او جرأت
بو درگهی یاندورّام علی ایتمسه بیعت
ایوای اگر نفس ائده انسانه حکومت


چون عقلی اسیر اولدی اونون نفسینه ناچار
باب اللهی یاندورماقا چوخ ایلدی اصرار 
باخ شرمه اودون ایستدی اول شوم و جفاکار
ای کاش او ظالم شل اولیدی ایکی الدن 
تا نادم اولیدی بیله بیر زشت عملدن


شورای سقیفه ایلموشدی بیله تصویب
تا منده ایدم بیعت اولا دین ایوی تخریب 
ئولسمده اولانماز بیله بیر مرحله تعقیب
هیهات که عالم ایلیه جاهله بیعت
بی ارزش و ناچیزیدی بو امرخلافت

شورائیله اوز دلده کی مقصودیزه یتدوز
دوز یولدان آیردوز یولی بیراهیه گیتدوز
بو غصب خلافتدی مسیرین عوض ایتدوز
بو ناقۀ مجروح سیزه سود ویره بولمز
قان اولدی او سود خلق سعادت گوره بولمز


وقت اولدی خلاصه خانیمی درک ایده رحلت
وقت اولدی که اوز ایستدیقی تک اولا راحت
وقت اولدی که حق خواهشینی ایتدی اجابت
وقت اولدی خانم امر قضایه اولا تسلیم
اوز جانین ائده محضر جانانینه تقدیم


مولایه خبر ویردیله درک ایله بتولی
گل منزله ترک ائت حرم پاک رسولی
امر ایله بتولین گله اطفال ملولی
زهرانی دویونجا گوره بیرده حسنینی
زهراده گوره گوزلرینین نوری حسینی


مولا حرمی ترک ایلیوب عالم و آگاه
نه قدر چتیندور بونا بو آیریلیق الله
دوردی گیده ایوای یخلدی یره ناگاه
بولمم نقدر قلبی بو مِحنتده سیخیلدی
دنیاجه حوادث اونی یخمازدی یخیلدی


دوردی ایاقا یأس تمامیله او مولا
گلدی گوره نه حالیده دور عصمت کبرا
گوردی که یاتوب بستر آلامیده زهرا
قصد ایتدی دانشدیرسین او محزون و حزینی
زهراده جواب اولمادی آغلاتدی علینی


فرمایش ایدوب ای یارالی قلبیمه یارا
چوخ غصّه لییَم هجریوه یوخ منده شکیبا
بیر کلمه دانش آل بو سینق گوگلومی زهرا
هر چند حذر یوخدی قضای ازلیدن
آچ گوزلریوی دویما بو تزلیقدا علیدن


ای هرغم و مِحنت گونومون  یاوری زهرا
وی چرخ حیا و ادبین اختری زهرا
ای بو حرمین طایرخونین پری زهرا
پرواز ائله دون عرشه سینان بال و پریله
قویدون منی عالمجه غم و درد سریله


زهرا بیله فکر ایتمه محبتده یانشدی
تا آلدی علینین سسینی گوردی تانشدی
نازیله گوزین آچدی دله گلدی دانشدی
عرض ایلدی ای سرور دین خسرو خوبان
سن آغلاما آغلار گوزیوه فاطمه قربان


سن آغلاما ای خلقته شخصیتی زیور
سن آغلاما ای قافلۀ امّته رهبر
سن آغلاما ای یار وفادار پیمبر
سن آغلاما آغلاتما بو مَحزون و ملولی
عفو ایله گذشت ایله حلال ایله بتولی


بیر آز ایکی دلداده او دم درد دل ائتدی
اذن آلدی خانم محضر پیغمبره گئتدی
تک قویدی علینی اوزی مقصودینه یتدی
مولایه نه اندازه اولوب  مشکل او هجران
بیر فاطمه بولدی  بیر اُوزی  بیر حق سبحان


ائتموشدی وصیّت گیجه غسل و کفن اولسون
تشییعینه حاشا نه گلن نه گیدن اولسون
نه قبری بولونسون و نه دفنی علن اولسون
ایوای اولار که بو ملاله سبب اولدی
زهرا و علینین اورگی قانیله دولدی


بیر نیمۀ شب ایتدی علی منزلی خلوت
اول پیکر زهرایه باخوب شاه ولایت
کیم بولدی او باخماقدا نلر گوردی او حضرت
عرشه اوجالوب ناله سی اشرارین الیندن
گوردی که گلی پرپر اولوب خارین الیندن


خلوت گیجه دنیانی دوتوب پرده ظلمت
زهرایه اُوزی غسل ویروب شاه ولایت
زهرا نه حقیقتده اولوب عالم خلقت
ذی روح یقین یوخ  کسیلوب شهریده سسلر
محبوس اولونوب سینه ده هر اودلی نفسلر


راوی دیر ال چکدی علی غسلیدن امّا
دیواره یوزین قویدی ایله آغلادی مولا
عرض ایلدیم ای صبرینه حیران هامی دنیا
بو آیریلیق ائتدی سنی بو نوع مکدّر
یا وار آقا بو آغلاماقا علّت دیگر


فرمایش ایدوب هر نقدر عمر ائده دوران
منده او قدر عمر ائلییم گر اولا امکان
بیرعمر اولام فاطمه نین فقدینه گریان
ائتمزله  مذمّت منی اهل دل اولانلار
امّا او که آغلاتدی منی اهل دل آنلار


بیخود اولا بولمز اولا عشقیمده ثباتیم
مرهون اولا بیر ال که بو حالیمده حیاتیم
زهرانین الییدی که اولوب فُلک نجاتیم
اللردن آلوب دشمنه محصور قالاندا
شمشیرلر آلتندا او گون بیعت آلاندا


جبریله چکن وقته  منی مسجده دشمن
زهرا الی دامانیمی گوردوم که دوتوب من
قنفذ که آیردی منی اوندان اونی مندن
بو شاخۀ گلده اثر خار وارایمدی
قمچی اثریندن هله آثار وارایمدی

درد دل مولایه عجب ائتدیله چاره
ووردی یارالی قلبینه غملر گینه یاره
کیملر گتوروب فاطمه نی پایِ مزاره
دنیاجه غم و غصّه دی اول معدن صبره
مولا اوز الیله قویا محبوبینی قبره


زهرانی قویوب قبره اوشه با دل محزون
گویا ائدوب اوز روحینی زهرائیله مدفون
اشکین یوزه جاری ایلدی چون دُر مَکنون
فرمایش ائدوب ای گوزومون نوری عزیزیم
شایسته دی گئتسه گوزومون نوری عزیزیم


ای وای بو دنیا نقدر پستیدی یارب
کیم بولدی نجه روح علی اولدی معذّب
تا مغرب ظلمتده غروب ایتدی او کوکب
آغوشینه خاک آلدی ایله گوهر پاکی
عرشه یری وار فخر ایلسه عالم خاکی


بیر نیمه شبِ خلوت و خاموش مدینه
گیزلینجه گئدر منزل قبره او دفینه
علّت ایکی عاملدی فراهمدی زمینه
بیر علتی زهرا اوزی ایتموشدی وصیت
شاید اولا بیرعلتی بیگانه جماعت


اعلام ایلموشدی اوزی پیغمبر رحمت
هر کیمسه بتولین ایده تشییعینه شرکت
بی شبهه اولار حشر گونی داخل جنت
چوخلار بو امیدیله که گیتسونله بهشته
ایستردیله تشییع اولا اول حور سرشته


اما او قرانلوق گیجه آخر سحر اولدی
تا پرتو خورشید فلک جلوه گراولدی
بو حادثه دن اهل جفا باخبراولدی
یعنی ثمرین ویردی  او دم نخل سقیفه
قصد ایتدی نمازه گله زهرایه خلیفه


هیهات اولا نائل بیله بیر امر خطایه
کرکس اولا بولمز که سالا سایه همایه
مشکلدی ئولومدنده  بو غم اهل ولایه
یارب نیه خسف ایتمدی یر اهل حجازی
گور کیم گلوب ایستر قیلا زهرایه نمازی


ثانی که او گون مصدریدی امریده ناگاه
اولدی او خانم فاطمه نین دفنینه آگاه 
جمع ایلدی اوز باشینه بیر عدۀ گمراه
یوز قویدولا قبر اوستونه اللرده وسیله
بو امر اهانتدی او بانوی جلیله


بولمم نیه دوندرمدی حق چرخ مدارین
یا ائتمدی شل اللرینی قوم شرارین
گلمیشدیله نبش ایتماقا مرضیه مزارین
هیهات ایله بیر امره اولار ایلیه اقدام
بو مسئله شخصیدی  دگل صحبت اسلام


ناگاه گوروبلر که گلور شاه ولایت
اندامی دوتوب لرزه غضبدندی علامت
باشدا ساری دستمالی دیور وار نه حکایت
غیظیله دوتوب الده او شه قبضۀ شمشیر
آماده دی بیر حملیه روبه لره چون شیر


فرق اولمیا بیر جامعه ده نیک و بدیله
انسانی برابر سایالار دیو و ددیله
بیر دل که دولا کینه و بغض و حسدیله
آیا او علی غیرعلی فرقینی آنلار
یا مهلکه ده جامعه نین غرقینی آنلار


فرمایش ایدوب یاندی قاپوم اوندا دایاندیم
ظاهرده دایاندیم ولی دلدن یارالاندیم
اود شعله لنوب منده شرارغمه یاندیم
منظوریدی چون مصلحت دین الهی
دوزدوم که خلل گورمیه آئین الهی


امّا او که بو قبرلره اولسا جسارت
مربوطیدی شخصاً اوزومه حفظ و حراست
شمشیرهمان الده همان الدی جماعت
چون چوخلاروزون قدرتیمه واردی یقینی
سیراب ایدرم قانوزیله روی زمینی


چون گوردوله مولانی غضبناک او اشرار
ال قبضۀ شمشیریده آمادۀ پیکار
ال آچسا او بیر حمله ده قویماز قالا دیّار
عذر ایستدی ثانی دیدی ای شیرشجاعت
عفو ایت بیزی بیزده یوخودی قصد اهانت


مولا او که خشم ائتدون  او افراد جهوله
دنیا بوئی حسرتدی بو محزون و ملوله
بیر قبر که منسوبیدی ظاهرده بتوله
دؤزمزدون او تپراقه دگه دست جسارت
ایستردون اولا زیر و زبر عالم خلقت


امّا او که عاشور گونی دشت بلاده
اشرار ائلدی سویماقا اطفالی اراده
زینب او کشاکشده چاغوردی سنی داده
گر مصلحت اولسیدی گلردون او دیاره
ناچار قالان قیزلاریوا ایتماقا چاره


یا فاطمه  ای گلشن دین سروخرامی
وی چرخ حیا و ادبین بدرتمامی
(خوندل) سیزه هر گونده ایدرعرض سلامی
وار قصدی که بیر گون اولا احسانیوه مشمول
قبرینده یقین ایلر اولوب خدمتی مقبول


بیرشخص مشخَّص سیزه دارای ارادت
صادق متعهد اوزی آماده خدمت
افسوس که یوخ جامعه ده فهم و فراست
اونداندی عطا خواهشی مندندی اشاره
ایوای اگر ایتمیه سوز دردینه چاره
ـــــــــــــــــــــ
(1) از اشعار چاپ نشدۀ مرحوم خوندل ، بکوشش استاد زاد صادق (گنجینه گذشتگان) ، با تصحیح استاد (عدلی_تبریزی)

  • دوشنبه
  • 1
  • بهمن
  • 1397
  • ساعت
  • 14:47
  • نوشته شده توسط
  • ابوالفضل عابدی پور

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران