یتیشوب موسم فرقت آنا قربانون اولوم
چولقیوب قلبیمی محنت آنا قربانون اولوم
من حسینم ننه جان گلشن دیننون گُلیم
هم سنین هم آتامون هم بابامون سویگلیم
ایندی شیرین دانوشان دیللّروین مایلیم
گوزلرین آچ ائله صحبت آنا قربانون اولوم
نجه گوزدن المز گوزیاشینی صورتینه
بیر اوغول که قالا حسرت ننه نون رأفتینه
بالا صبر ایلیه بولمز آنانون فرقتینه
چوخ چتیندور بو مصیبت آنا قربانون اولوم
جدّیمیزدن صورا بوواقعه چوخ اولدی چتین
دشمن کینه گر ائتدی بابامی خانه نشین
قاپومز ظلمیله یاندی ائلدون سقط جنین
محسنه یتدی شهادت آنا قربانون اولوم
بولمورم من نجه بیرحمدی اول کینه شعار
آل پیغمبری یکسر ائله دی رنجه دچار
قنفذون ضربینین آثاری قولوندا گنه وار
سنی ئولدوردی او ضربت آنا قربانون اولوم
نوجوانلوقدا سنین گلشن عمرین سارالوب
ستم قوم دنی طاقت آرامین آلوب
هیچ دیمورسن داخی مظلوم بالالار هاردا قالوب
ای اولان معدن رأفت آنا قربانون اولوم
اگنیمزده داخی دائمدی مصیبت قاراسی
گوروروخ چونکه موثردی وجودین یاراسی
سنی تئز سالدی ایاقدان در و دیوار آراسی
بیر بیوک غمدی بو حالت آنا قربانون اولوم
یاندرور قلبمزی فرقه اشرار اثری
هاردا یادّدان چخاجاق قوم ستمکار اثری
گور نجه پارچالیوب سینوی مسمار اثری
نجه صبر ائتدین او ساعت آنا قربانون اولوم
آرزوموز بویودی ساق و سلامت قالاسان
بالالار باشینه چوخ لطفله سایه سالاسان
بیز ملول اولساخ اگر گوگلمیزی سن آلاسان
اشقیا وئرمدی فرصت آنا قربانون اولوم
ایلدی ظاهر اورک عقده سینی قوم ظُلَم
وردولار اود قاپوموز یاندی بئله اولدی ستم
بابامون سایه لی قدّین او ستم ایلدی خم
سولدی گلزار رسالت آنا قربانون اولوم
قویارام ایندی ایاقین اوزونه صورتیمی
آشکار ایلرم اوز گیزلین اولان نیّتیمی
منزل خولیه گل دید ائله کیفیّتیمی
گورنه عنواندور او ساعت آنا قربانون اولوم
گله جک بیر گونی فردوس بریندن دوراسان
اشک خونابیله گوز کاسه سینی دولدوراسان
قتلگاه ایچره گلوب مجلس ماتم قوراسان
ائده سن مندن عیادت آنا قربانون اولوم
ننه سندن صورا دائم توکرم گوزیاشیمی
ئولدورلّر هامی انصاریمی همَ قارداشیمی
کوفه دن بزم یزیده آپارالّر باشیمی
منه ایللر اهانت آنا قربانون اولوم
#دلکش اولما نگران ائت اورگین نوحه سرا
حضرت فاطمه ایلر هامی مدّاحه عطا
گنه اوّلده کی عنوانیله وئر نظمه صفا
یتوشوب موسم فرقت آنا قربانون اولوم
- پنج شنبه
- 4
- بهمن
- 1397
- ساعت
- 11:47
- نوشته شده توسط
- ابوالفضل عابدی پور
- شاعر:
-
مرحوم احمد رمضانی
ارسال دیدگاه