ای گنج پیمبرده اولان درّ یگانه
معیاریوه مبهوتیدی صرّاف زمانه
گوزدن نه سبب اولدی بیله آتدون علینی
مقصودیوه چاتدون ولی آغلاتدون علینی
کیم سن کیمی آفاقیده معتادیدی صبره
دؤزدون اؤز عم اوغلوندان اؤتور سن هامی جبره
گَتدیم اوز الیمله گئجه قویدوم سنی قبره
راحت گئجه لر یاتمازیدون بو گئجه یاتدون
بو قبریده یاتدون، یارالیدون نجه یاتدون
کیم سن کیمی بو درد دلیمدن اولی آگاه
مونس منه سنسیز اولاجاق نالۀ جانکاه
سندن صورا چوخ اولمیا عمریم اولا کوتاه
هر شام و سحر سویلرم ای خالق بر حقّ
ئولدور منی لطفیله بتوله ایله ملحقّ
ای حقّ علینی ایدن عالملره اثبات
جدّون سنیله فاطمه ایلردی مباهات
سنسیز منی آیا کیم ائدر ناله دن اسکات
سندن صورا ایوای منیم احوالیمه زهرا
چارم ندی کیم باش چکر اطفالیمه زهرا
ای حور سیر، صورتاً انسیّه مُصوّر
ای نوری اولان نور خدائیله مُخمّر
ای برج حیاده یوزی بیر ماه مُنوّر
اندوه و محن ایتدی دراز عمریوی باریک
دور گور نجه خسفون ایلیوب عالمی تاریک
بیجا یره من آغلامورام واردی دلیلی
ثانی ال آچوب ووردی یول اوسته سنه سیلی
گُل صورتیوی سیلی یری ایلدی نیلی
بنزردون او گوندن سارالان یاپراقا زهرا
قویدوم او گویرمیش یوزیوی توپراقا زهرا
آغلار سنه فرض ایلمه بیگانه، علیدور
بو قبره گَلن شام غریبانه علیدور
سن شمع وفاسن سنه پروانه علیدور
پروانه اولان شمع اودونا رسمیدی یانسون
من تک هانی پروانه بئله اوددا دایانسون
ای نوری اولان نور حق داوره مشکات
نوروندی سبب قائم اولوب ارض و سماوات
یکسر سنیله ضوء و ضیا تاپدی حجابات
صد حیف اولا نورون اولونوب ظلمیله خاموش
اولدی اودی بو تیره ترابیله هم آغوش
گلزاریده هیچ گل بیله بیر سن کیمی سولماز
هیچ غنچه گلون باغری بیله قانیله دولماز
سنسیز منیم احوالیمه بیر کس یانان اولماز
هم ناله تاپولماز من بی پشت و پناهه
ناچار قالوب کشف ایدرم دردیمی چاهه
بیر کوکبیدون فاطمه سن چرخ ادبده
مشهوریدون آفاقیده مرضیّه لقبده
مخفی نیه بو قبریده یاتدون دل شبده
ظاهرده اگر چه منی سن گوزدن آتوبسان
باطنده علینون ولی قلبینده یاتوبسان
ای شمع شبستان علی دختر طاها
محبوبه ی داور، اوزی صدّیقه مسمّا
دنیایه سنون فاطمه مثلون گَله حاشا
ای داد وفا ایتمدی دنیا سنه افسوس
آتدون منی اولدون بو سیه خاکیله مانوس
غم ایلمه قبرون سنون ایتگین قالاجاقدور
قانون گَله جاق قائم موعود آلاجاقدور
تیغ دوسریله فلکه اود سالاجاقدور
عدلیله بالام دولدوراجاق سطح زمینی
نائل اولا پابوسینه ای کاش #امینی
- پنج شنبه
- 4
- بهمن
- 1397
- ساعت
- 20:27
- نوشته شده توسط
- ابوالفضل عابدی پور
- شاعر:
-
مجید امینی
ارسال دیدگاه