باخ یولّارا امیدیله ای چشم انتظار
تا گورنه وقت طالع اولور طلعت نگار
دنیا تیکوبدی گوز یولا تا بیر گوزل گله
جان ملکینه صفا وئره اول یار گلعذار
منظور او یاریدن گل گلزار عشقیدور
عاشق او گل عذاره عزیزان روزگار
مهدی دی اول ذخیره ی دین محمّدی
اولماز اگر او اولماسا خورشیدیده مدار
گؤندر سلام باد صبادن حضورینه
بلکه ائده عنایت او سلطان تاجدار
خوش حالینه غبار قدومین ئوپنلرین
چون توتیادی دیده ی احبابه اول غبار
بعد از وقوع غیبت کبری او حضرتی
چوخلار گوروب آلوبلا ملاقاته اذن بار
اول قومیدن بیری که دوشوب آدی دللره
ایرانلیدور بنام علی بن مهزیار
اقباله باخ اولوب نچه گون حضرت قوناق
شیرین حکایتی تاپوب عالمده اشتهار
بیر عمر گزدی سؤیگولونون وصلینه چاتا
مهدی دیه دیه گونی اولدی چو لیل تار
بو عشقیله حجازه ائدوب یرمی یول سفر
ایّام حجّیده اولا تا پای بوس یار
امّا نقدری گئتدی قیتدی یورولمادی
هی گون سایوب زیارته اولدی امیدوار
تا بیرگجه گوروب یوخودا هاتفی دئیور
ای مهزیارین اوغلی ائله کؤنه افتخار
سن مکّه ده بو ایل چاتاجاقسان مرادیوه
دور حاضر اول مسافرته اولما اشکبار
دوردوم دیور شیرین یوخودان دستماز آلوب
قیلدیم نماز شکر تاپوب عشقیم اعتبار
صبحه کیمی یاتانمادیم عشق وصالیدن
گون چیخدی منده چیخدیم ائویمدن ائدم فرار
بیر کاروانه یولداش اولوب راه کوفه دن
گئتدیم حجازه دلده طَرَب وصله بی قرار
ایّام حجّیدی چوخودی مکّیه گَلَن
من آختاریردیم ئوز گولومی خلقیدن کنار
دل زمزمه ائدوردی نگاریم هایاندادی
قلبیم دیوردی ایستدیگین آختاران تاپار
تا بیر گجیکه خلوتیدی نسبتاً حرم
دوردوم طوافه گوزیاشیم اولدی یوزه نثار
حال طوافیده ئورگیم اسدی ناگهان
گوردوم که بیر جوان گلور آزاد و باوقار
پیچیده پیکری ایکی بُرد یَمانیه
اَستار کعبه دن دوتوب ایلوردی آه و زار
جلب ایلدی منی او جوانین وجاهتی
عطر خوش وصالی آلوب مندن اختیار
دل بسکه بیقراریدی گئتدیم اونا طرف
وئردیم سلام آلدی جواب اول بزرگوار
ائتدی سؤال هارالیسان،اهوازلیام دئدیم
مندن سوروشدی ابن خضیبی اؤ هوشیار
عرض ائتدیم آز زماندی گئدوب دار باقیه
رحمت دئدی اونا ائلسون حیّ کردگار
اِبن الخضیب اَنیسیدی قرآنیلن بیر عمر
هم قائم الیالیدی هم صائم النهار
بعداً بویوردی سن تانیسان مهزیاریده؟
عرض ایلدیم منم، گُله حسرت قالان هَزار
طوبا دئدی سعادتیوه ای اباالحسن
وئر اول علامتی که قالوب سنده یادگار
وئرمیشدی بیر اوزوک حسن عسکری منه
حَمیانیدن چیخاتدیم اونی حول و دلفکار
نقش نگین محمّد آدیدی علی آدی
اول نقشه باخدی آغلادی چون ابر نو بهار
ائتدی سؤال حاجتون اولسا بیان ائله
بو سؤزده ال وئروبدی منه حال انکسار
دولدی گوزوم دئدیم آقامی ایستورم آقا
حیران عشقم اولموشام آواره ی دیار
شاد اول دئدی امام، ئوزی گوندروب منی
آخر یتر مرادینه کیم اولسا بُردبار
گئت منزله تدارکیوی گور زیارته
گیزلت بو سرّی ئوزگه دن ای شیخ رازدار
اولدی غرض شرایط دیدار بازگو
آیریلدی گئتدی مندن او پیک پُر اقتدار
گلدیم ائوه اویاقیدی بختیم کیمی گوزوم
بیر پاس گئچدی شبدن اولوب ساعت قرار
قاصد دئمیشدی شِعب بنی عامره گئدم
آیریلدیم ائودن اولدوم اودم ناقَمه سوار
شِعبه چاتاندا گوردوم اوزاقدا جوان دوروب
گوردی منی چاغیردی گل ای عاشق نزار
دوشدی یولا منی ئوزونه یولداش ایلدی
گئچدیق غرض منا عرفانی به عشق یار
طائف یولوندا سویلدی اَن ناقه دن یره
آماده اول نمازه وئرور نخل فیض بار
قیلدیم اونیلا نافله ی شب نماز صبح
بعد از نماز سجدیه دوشدی او نامدار
دوردی اشاره ایلدی مین مرکبین گنه
ارشاد ائدوب قاباقجا ئوزی اولدی رهسپار
چیخدی دایاندی بیر اوجا یرده بویوردی گل
دور سنده بوردا سال نظر اطرافه گور نه وار
باخدیم اورک گوزیله نه گوردوم او دشتیده
بیر سبز بقعه دور باخانی ایلیور خمار
پوشیده دور او بُقعه گُلیله گیاهیله
اولماز صفالی بیر بئله هئچ باغ و لاله زار
بعداً بویوردی باخ او اوجا تلّین اوستونه
بیر خیمه گوردوم اوردان اولور نور آشکار
بیلدیم او خیمه سویگولومون خیمه گاهیدی
اولدوم پیاده شکر ائلدیم حقّه بی شمار
قاچدیم او خیمیه ساری سس گلدی صبر ائله
اذن دخول آلوم صورا گئت ای غمه دچار
گئتدی قیتدی سویله دی خوش حالیوه سنون
مولا اجازه وئردی داخی چکمه انتظار
وارد اولاندا خیمیه گوردوم امام عصر(عج)
بیر ساده قرمزی نَمَد اوسته تاپوب قرار
تکیه ائدوبدی بالشه فرزند فاطمه
برق نگاه یار وُروب قلبیمه شرار
ال سینه ده سلام ائلدیم پیشگاهینه
آلدی جواب لطفی منی ائتدی شرمسار
من ذرّه دن کَمم نجه تعریف ائدیم گونی
چون جمعیدی یوزونده اونون حُسن هشت و چار
قاشلار کشیده چهره گوزل گونه لر جمیل
چشم سیه له بیر باخیشی یوسفی یخار
بیر پارچا نوریدی اوتوموشدی اؤ خیمه ده
اون بیر امام وارثی دنیایه شهریار
وئرمیشدی جلوه صاق یوزونه خال هاشمی
باخدوقجا صبر ملکینی ایلوردی تار و مار
من انتظاریدیم آچا بیر گل دوداقلارین
قورتاردی غصّه دن منی دیلّندی اول نگار
اوّلده آلدی شیعه لرین حالینی خبر
عرض ایلدیم اولوبلا آقا ظلم الینده خوار
فرمایش ائتدی بیرگونی اولّار عزیز اولار
دین پرچمین جهادیله ایللّه استوار
مندن یتور او شیعه لره ایلسونله صبر
بیرگون گلر که آلّام اله منده ذوالفقار
من قول وئرمیشم آتاما ظاهر اولمیام
گیزلینده شیعیانه وارام یار و غمگسار
حقدن نه وقت اذن اولاجاق منده بیلمورم
امّا بو قدر وار گلرم وقت اضطرار
بیر بیر امام عسکری وئرمیش منه خبر
الله منیم الیمله ائدر دینی پایدار
بیر گون اولار کمکلریمی منده سسلرم
کفّاری قورخودار اوزمان صوت انفجار
اوچ یوز اون اوچ علم اوجالار دور کعبه ده
مندن حمایت ایلر او یاران حق شعار
رنگی علملرین آق اولار بعضی زرد رنگ
سایه سالوب علملر ائدر بیتی استتار
آزاده لر گلر حَجر الاَسوَده طرف
بیعت ائدلله منله جوانان جان نثار
الله لم یزل منه رخصت وئرر او گون
تیغیله روزگار عدودن چکم دمار
قربان اولوم اؤ اللره مهدی هایانداسان
گل منتظردی جمله کفن پوش پاسدار
ای مهزیارین اوغلینی مهمان فیض ائدن
بیزدنده کسمه لطفوی یا سیّد کُبار
گل گوزلرون فداسی حسینون قانین تئز آل
محزون ائدوب اورکلری هجران جان شکار
مولا نه وقته چان گزه جاقسان او چوللری
قالدی شهید آنالارینون قلبی داغدار
وئرّم قسم آقا آناوین حقّینه سنی
سال مکّه دن ظهور گونی یثربه گذار
یغ دوریوه مدینه نون اهلین سؤال ائله
زهرا اگر بقیعده یاتوب بس هانی مزار
شیرین دیلونله فاطمیه مرثیه اوخی
آغلا او حاله که قاپوسین یاندیریردیلار
اوچ یوز نفر توکولدی علینی آپارماقا
بیعت بهانه سیله گلوب قوم نابکار
زهرا قاپونی آچمادی آگاهیسن ئوزون
دشمن هجوم ائدوب قاپیا وئردیلر فشار
نه قنفذون الیندن آلان اولدی قمچی سین
نه کیمسه گلدی سو سپوب ائتسون اودی محار
یابن الحسن ئوزون وئر اجازه«کلامیه»
یازسون بقیع خاطره سیندن بیر اختصار
مداح اهلبیت حاج اصغرله بیر گجه(۱)
باهم مدینه ده واریدوق زار و سوگوار
بو سؤز که ایستورم یازام اوردا ائشیتمیشم
شیعه بوله که نیله دی زهرایه اهل نار
شرح مفصّلی اوخی مُجمل اشاره دن
تاپدی گوراخ نه تز خانمی حال احتضار
بیر کربلالی مرثیه خوان بو مصیبتی
گویا اوخوردی حقّی ادا اولمادی کرار
مأیوس گلدی منزله باشه ورا ورا
گیزلینده ائلدی خانما عرض اعتذار
یاتدی یوخودا گوردی او خاتون محشری
آخر او شخص سیّدیدی هاشمی تبار
عرض ایلدی گذشت ائله تقصیریمی آنا
بوندان بئله او محنتی من ائتمم انتشار
وئردی خانم جواب که ای ذاکر حسین
تردیده دوشمه دوزدی همان ماجرای دار
بیر روضه ده ئوزوم اوخورام آغلادام سنی
سنده دئ آغلیانلارا گلسون اله عیار
دوشدوم اوگون که من در و دیوار آراسینا
مسمار باتدی سینمه بابه یاخیلدی ثار
دشمن توکولدی منزله قورخوشدی قیزلاریم
نه تک منی حسینیمه ده سیلی ووردیلار
آه ای قلم چتین یره چکدون گریزی سن
قورتار بو ماجرانی داخی یازما زینهار
اولدی بو شعره حجت الاسلام قائمی(۲)
بانی«کلامی»یازدی به عنوان یادگار
ــــــــــــــــــــــ
(۱)منظور آقای حاج اصغر گنج خانلو مداح معروف زنجانی می باشد.
(۲)منظور استاد فاضل حجت الاسلام و المسلمین حاج آقا قائمی زنجانی می باشد
- پنج شنبه
- 4
- بهمن
- 1397
- ساعت
- 20:28
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه