ساقـیِ بـزم دلــدار اباالفضـل
لشگـر حقّـه سـردار اباالفضل
آچ گوزون گلمشم باشون اوسته
باصفـادور بـو دیدار اباالفضل
سـن منیـم حالیمـه آغلا قان‌یاش
من دیوم وای بلیم سندی قارداش
****
باوفـــا همدمیـم سرسپاهیـم
غـم گونونـده امیدیـم پناهیـم
آز قالـور قــوم اشـرار الینـده
اود دو تـا سربه‌سر خیمه‌گاهیم
****
خیمیـه گلــدی ادرک صداسـی
آرتوب اطفـال عشقون هراسی
وای دئدیـم گئتدی یاریم الیمدن
باتـدی القانـه غیـرت هماسی
****
جان گلوب درده غم منظروندن
یانـدی قلبیـم سنان شهپروندن
دردیمـه دشمنـون ال چالانـدا
بوسـه آلدیم کسـوک اللروندن
****
غرق اولوب جان و دل دود آهه
دونـدروب صبحـی شام سیاهه
من بو دوغرانمش اعضانی عبّاس
تک نجه حمل ائدوم خیمه‌گاهه
****
واردی درد اهلینون سوز و سازی
دلبرون هر نه دن خوشدی نازی
باخمـا میدانـه السیز دوشـوبسن
قائـم ائتـدون کتـاب و نمازی
****
دویمادیـم عاشقانـه سوزونــدن
نـه قمـر طلعتـون نـه ئوزوندن
دیسگنوب خیمه گهده دئدیم وای
اوخ دگنده سنون ساق گوزوندن
****
کربلا زمزمه سی - سیفی اردبیلی
منبع:سایت مدایح
- پنج شنبه
- 9
- شهریور
- 1391
- ساعت
- 13:39
- نوشته شده توسط
- جواد
ارسال دیدگاه