معین مکتب حق پیر عرفان
منور سینه سی کانون ایمان
صحابه ایچره صاحب شأن و رجحان
رسول اللهه مونس اهل ایران
نژادی فارسیدور آدی سلمان
اولوب بیر عمر یار دین و قرآن
مسلمان یوخدی سلمان پایه سینده
تاپوب عزّت پیمبر سایه سینده
او قدری ائتدی رشد اول پیر دانا
نمونه بیر مقامه اولدی دارا
اونا عزّت مدالی وئردی طاها
دئدی شأنینده السّلمانُ منّا
ائدوب حق مکتبینده سیر معنا
قرین لطف اولوب محبوب دلها
مقامی اهل معنادن باش اولدی
خانم زهرایه سلمان قارداش اولدی
اونی ایمان یتوردی مدّعایه
اوجاتدی باشینی عرش علایه
اولوبدی مفتخر اهل ولایه
قاریشدی اهلبیت مصطفایه
هزار احسن او پیر با وفایه
انیس راز اولوب خیرالنسایه
که بیلمزدی اونی بیگانه، زهرا
دییردی دردینی سلمانه، زهرا
غرض دوران دؤنوب باشلاندی ماتم
ائدوب رحلت رسول الله خاتم
بساط معنویّت اولدی برهم
یغشدی ناجوانمردان عالم
یانوب دولتسرای فخر آدم
علینون قوللاری باغلاندی محکم
دل خاتون محشر دوشدی درده
قالوب ناموس عالم پشت درده
مفصّل دردی مجمل یازماق اولماز
کیچیک بیر لوحه مقتل یازماق اولماز
نئدوب اشرار ارذل، یازماق اولماز
اودی کیم گتدی اوّل یازماق اولماز
آچوب قنفذ کیمه ال یازماق اولماز
قلم اولما معطل یازماق اولماز
فقط بیر کلمه یاز قلبی غم آلدی
بش اون گونده جوان زهرا قوجالدی
گئدوب الدن آتاسی بیر طرفدن
اولوب درد آشناسی بیر طرفدن
یانوب دولتسراسی بیر طرفدن
قباله ماجراسی بیر طرفدن
وجودینده یاراسی بیر طرفدن
سیزیلدور دورت بالاسی بیر طرفدن
گونی گوندن بدن تحلیله گئتدی
آغیر غملر رسا قدّین خم ائتدی
نه آرامش دل حیدرده قالدی
نه تاب اصحاب پیغمبرده قالدی
غم محسن دل مضطرده قالدی
کیچیک قبری اونون منظرده قالدی
بو غملی داستان دللرده قالدی
مریض اولدی خانم بسترده قالدی
آتاسین اوخشیوب اشکین الردی
ملاقاته فقط سلمان گلردی
ز بس عرشه یتوردی التجاسین
کریم الله قبول ائتدی دعاسین
طبیب معنوی یازدی دواسین
اجل گلدی تاپوب درد آشناسین
گئدوب فردوسین آرتیردی صفاسین
آلوب آغوشه سقط اولموش بالاسین
سینیق لعلی بقیعه گتدی مولا
قرانلوق قبریده گیزلتدی مولا
دیور سلمان که بعد از دفن زهرا
منه اولدی قفس وسعتلی دنیا
دؤنوب ماتمسرایه شهر بطحا
اقلّیّتده قالدی اهل معنا
گونی گوندن پوزولدی حال مولا
علینی کیم گوروب وئردی تسلّی
آچوب بازاری تجّار مسلمان؟
عزا قورتاردی زهرا چیخدی یادّان
اثر ائتدی بو محنت خاص و عامه
حقیقت اولمادی روشن عوامه
یوخیدی سس وئرن بیکس امامه
ائدوب صبر آچمادی ال انتقامه
صحابه باغلادی قاره عمامه
یولا سالدوخ بِلالی شهر شامه
چیخاتدی یاسلیلار قاره لباسی
علی قالدی ائوینده دورت بالاسی
من اُول ائودن ایاق کسمزدیم امّا
چه قبل از مرگ و بعد از دفن زهرا
پوزولدی حالتیم اولدوم معزّا
بوغازدان گئتمه دی آب گوارا
دئدیم الله خراب اولسون بو دنیا
ائلیکه وئردی جان بانوی کبریٰ
داریخدیم قالدیم آواره وطنده
یاناردیم بیت الاحزانه گئدنده
اورکده نخل غم آتمیشدی ریشه
نهال صبریمه دگمیشدی تیشه
ائدردیم لعن او قوم کفر کیشه
منه نی تک نوا اولموشدی پیشه
نهان سرّی دئمزدیم قوم و خویشه
علیدن گیزلین آغلاردیم همیشه
گئدنده منزله دلگیر اولاردیم
گزنده شهری جاندان سیر اولاردیم
غرض بیر گون در زهرایه گئتدیم
سلامه محضر مولایه گئتدیم
او یردن مسجد طاهایه گئتدیم
اورک چیرپیندی هر مأوایه گئتدیم
چیخوب مجنون کیمی صحرایه گئتدیم
ادای دین واویلایه گئتدیم
که تا باشدان آتام دنیانی چولده
دویونجا اوخشیام زهرانی چولده
واریدی نسگلیم قلبیمده از بس
مصیبت رختینه اولدوم ملبّس
دئدیم اولماز بو غملی چولده بیر کس
اولوب جاری دله ذکر مقدّس
سسیمدن ائتدی لرزه چرخ اطلس
نه گوردوم که گلور بیر آشنا سس
دیینده من هرای مظلوم خانیم وای
اودا سسلوردی زهراسیز جانیم وای
ایاقه دوردوم احوالی پریشان
دئدیم ایوای بو کیمدور ایلور افغان
یاخونلاشدیم نه گوردوم شاه مردان
علیدور حالی پوزقون سینه سوزان
منی گوردی بویوردی قورخما سلمان
گل اگلش بیر بیزوک بیر بو بیابان
پریشانم اوزاقه گئتمه مندن
سنی زهرا سوزون گیزلتمه مندن
دئدیم مولا اورکده بیر سوزوم وار
اجازه وئر ائدیم بو دردی اظهار
دیوم نوحه برای اوّلین بار
او گونلر که خانم اولموشدی بیمار
ملاقاتینه گئتدیم چوخ دل افکار
یوخیدوز ائوده سیز ای شاه ابرار
پریشان گوردوم اول کان حیانی
سوروشدوم حال دخت مصطفانی
سوروشمیدیم خانیمون حالین ایکاش
سوروشدوم گوزلریندن آخدی قانیاش
دیوم سنده علی جان منله آغلاش
بویوردی بیر سوزوم وار اولماسون فاش
عم اوغلوم بیلسه چوللرده آچار باش
دانیشدی منله عیناً باجی قارداش
شکایت ائتمدی اغیار الیندن
دئدی اوچ دفعه وای مسمار الیندن
پوزوب مولانی سلمانین نواسی
بویوردی ای مصیبت آشناسی
منیمده چوخدی دردیم یوخ دواسی
دیوم گل آغلیاق الله رضاسی
قویاندا قبره اول گردون اساسی
نه گوردوم سینه سینده وار یاراسی
پوزولموش نایدن افغان گلوردی
او مسمارین یریندن قان گلوردی
غم زهراده عرش داور آغلار
گورنده یاره سین پیغمبر آغلار
او دؤشدن قان کسیلمز کوثر آغلار
دوروب زمزم یانیندا هاجر آغلار
خدیجه باشدا قاره معجر آغلار
یوزون گورستسه اهل محشر آغلار
او گونده سس گلر عرش رفیعدن
یومون گوز فاطمه گلدی بقیعدن
- یکشنبه
- 7
- بهمن
- 1397
- ساعت
- 10:1
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه