آنا یا فاطمه یاتما اویاندور
حسینین گور نه نوعی باغری قاندور
منی بیر ساقلیقون تک آل کناره
منه درد فراقین چوخ گراندور
رضا اولمازدون ایلوم ناله بیر آن
عذاره گوز یاشیم ایمدی رواندور
سسیمه ایمدی سن سس ویر آناجان
منی آز نار هجرانیله یاندور
سنیدی قلبیم اولمازدون رضا سن
او قلبیم لخته لخته ایمدی قاندور
حسن قارداشیم آغلار بیر طرفده
آنا اولادیوه محشر عیاندور
آچوب باش زینبین بیر یاندا آغلار
یولار زلفین قدی غمدن کماندور
اولوب کلثوم اویاندا مو پریشان
آنا وای زینبه ورد زباندور
آنا چوخ درد و غم چکدون جهاندا
منیم سنسیز ملالیم جاوداندور
قولین سیندی قاپون یاندیردی دشمن
سنین بو غملرین دلده نهاندور
اولوب اون سگز ایل عمرین جهاندا
زبس غم چکموسن قدین کماندور
اوزین گئتدون خلاص اولدون اگر چه
عیالین صبح و شامی باغریقاندور
منی سندن صورا مقتول ایده لّر
ائدن بو ظلمی قوم کوفیاندور
کسر بو باشیمی شمر جفاجو
ز بس بی رحم مخلوق جهاندور
باجیم زینب چیخاندا خیمه لردن
گورر قانلی باشیم نوک سناندور
یانار آغلار توکر رخساره قانیاش
باجیم زینب منه چوخ مهرباندور
ویرر سعد اوغلی شمر دونه فرمان
ووروب اود خیمه و خرگاهی یاندور
قیزین سسلر سنی اولدم هرایه
آنا گل زینبین حالی یاماندور
ئولوب قارداشلاریم یوخ پاسبانیم
آلان اطرافیمی بو کوفیاندور
وورار شمر لعین قمچی باشیمدان
دیر زینب نولوب نه الاماندور
چکر شامه کیمی چوخ درد و محنت
یزید بی مروت کامراندور
دوشنده خیردا قیزلار ناقه لردن
قالان چوللرده سسلر سارباندور
حسین آدین « حسینی » ایلوب ازبر
بو اسم پاک اونا ورد زباندور
شفیع محشره محشرده محبوب
بو عالمده حسینه آغلیاندور
حسینه آغلا هر قدر عمرین اولسا
حسین اوددان سنی بُل قورتاراندور
عزادار حسین یانماز جزاده
بَکا اَبکا بونا شرح و بیاندور
- یکشنبه
- 7
- بهمن
- 1397
- ساعت
- 10:35
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه