الله منی بیر گوللی گلستاندا یاراتدی
بیر گلشن زیبا و خراماندا یاراتدی
خوش آب و هوا باغیده بستاندا یاراتدی
خوش طالعی گؤرستدی منه دست عوالیم
رشد ایلدی اول گلشن خرّمده نهالیم
توپراقدا ائدوب ریشه‌می محکم هی اوجالدیم
دورمده اولان گول چیچگی حیرته سالدیم
هرزه گؤوَرَن اوت ـ علفین طاقتین آلدیم
برگ و بر آچوب باغیده اولدوم اوجا قامت
وئردیم او زمان گلشنه بیر اؤزگه طراوت
گویلوم کیمی سیر ایلدی ایّام زمانه
قوشلار ائلدی شاخه‌لریم اوستونی لانه
بلبل‌لر اوخوردی سینه‌مون اوسته ترانه
گیسولریمی باد صبا شانه‌لیردی
یارین تئلی تک شانه‌مه افشان ائلیردی
باغبان منه بیر اؤزگه محبّتله باخاردی
چکمیشدی سو آرخی، ایاقیم آلتدان آخاردی
غم غصّه‌سی یاددان منی گؤرماقلا چیخاردی
گوللر باشینا گوللی گلستاندا تاج اولدوم
ایل‌لر دولانوب خوش‌قدوقامت آغاج اولدوم
یاز فصلی منیم شاخه‌لریم یاپراق آچاردی
یای فصلی قناری اوتوروب، قمری اوچاردی
پاییزده یاپراقلاریمون رنگی قاچاردی
قیش‌فصلی سووخ‌دوشجاق همین خوابه‌گئدردیم
تجدید قوا، حکمت داوردن ائدردیم
یئل‌لر که اسردی سحر، آواز ائلیردیم
اؤز حُسنومه مین شیوه‌ایلن ناز ائلیردیم
تای توشلاریما فخریمی ابراز ائلیردیم
افسوس! فلک جور و جفایه باز اولارموش
بو معرکۀ فانیده خوش گون آز اولارموش
بیر گون بلی چرخی فلکین ترسه دولاندی
عمروم بولاغی خاک ملالیله بولاندی
عبرت گؤتور، آز ناز ائله، صددرصد اولاندی
طوفان بلا گلشن آماله اسیلدی
ارّه قویولوب ساقه‌م او گلشنده کسیلدی
کسدیکجه منی ارّه اوجالتدیم گوه فریاد
هئچ کیم یوخودی ایلیه بو بی‌کسه امداد
محنت گونونون اولمازیموش یولداشی ای‌داد!
مندنده او گونده دئیه بیللم هامی قاچدی
شاخه‌مده او لانه ائلین قمریده اوچدی
القصّه فلک چوخ منی غملی حالا قویدی
نجّار یولوب قول‌بوداغیم، ساقه‌می سویدی
سویدوقجا دئیوردی: نه عجبده اوجا بویدی!
معناده گؤزوم آغلادی قان بو قره بخته
دوغراندیم اونون اولدوم الینده نئچه تخته
تسلیم او گون ائتدیم اؤزومی دست قضایه
تقدیره روا چون دگولی عرض گلایه
صدقیله بلی یعنی دئدیم، درد و بلایه
سؤز چوخدی دئیم دم‌به‌دم اؤز دردسریمدن
ال چکمدی نجّار منیم تخته‌لریمدن
کسدی هره‌سین اؤزگه بیر اندازه‌ده نجّار
بعضین گوده، بعضی‌سین اوزون ایلدی، زنهار
اوست‌اوسته قویوب سینه‌مه دوگدی ایتی مسمار
نجّارین الینده تزه بیر شکله قورولدوم
بیرده قوشولوب بیربیره من بیر قاپی اولدوم
بوندان بئله دقّت ائله گفتاریمه امّا
بیلدیم منه نه لطف ائلیوب خالق یکتا!
گؤردوم منه سویلوللـه در خانۀ زهرا
بختیم گئنه یار اولدی منه بختور اولدوم
حیدر ائوینه بیت ولایتده در اولدوم
نصب اولدوم ائله بیر ائوه، که قبلۀ عالم!
باش گونده چکردی او ائوه حضرت خاتم
هر گون دولاناردی باشیما عالم و آدم
جبریل گلنده اول ائوه، وجده گلردی
عشقیله ملک‌لر ائلسون سجده، گلردی
من بیر ائوه نصب اولدوم، او ائو رشک جناندی
عالملره هم ملجأ و هم دارالأماندی
اهلی او ائوین، سرور مخلوق جهاندی
بیر خشتی دگردی او ائوین باغ بهشته
صحنین سوپورردی او ائوین حور و فرشته
او گوندن عجب عزّتیلن شوکته چاتدیم
بیلدیم هارا نصب اولموشام، عالم غمین آتدیم
فخر عالمه ائتدیم، باشیمی عرشه اوجاتدیم
فخریم بویودی کسب شرافت ائلیردیم
من، پنج‌تنی گونده زیارت ائلیردیم
هر صبح منی لمس ائلیردی شه بطحا
زهراسینی شوقیله گؤره، حضرت طاها
پیشوازه گلردی قاپونین آغزینا، زهرا
من شاهدم، اشکین آقا رخساره سَپَردی
گه صورت و گه سینۀ زهرادن اؤپردی
هر لحظه اولوب نور خدا جلوه‌گر اوردا
ممزوج اولونوب جوهر شمس و قمر اوردا
دورد دفعه وئروب عصمت‌وغیرت ثمر اوردا
اوردا شرف عالم امکان یارانوبدی
حق لطف ائلیوب، لؤلؤ و مرجان یارانوبدی
من شاهدم، اول ائوده اولان عشق و صفایه
من شاهدم، اول ائوده اولان مهر و وفایه
هی بیربیرینه جان چاغیران اهل کسایه
ائو یوخ، اورا کانون شرف، کعبۀ جاندی
تا واردی جهان قبلۀ عشاق زماندی
ائو یوخ، اورادی معدن اجلال و شرافت
ائو یوخ، اورادی قبلۀ مردان ولایت
ائو یوخ، اورادی مصدر ایثار و شهادت
عرش اهلی گؤرردی او ائوین نوری جلی‌دی
روضات جنان، خانۀ زهرا و علی‌دی
هر کیم منی امّید عطاییله چالاردی
باب کرم فاطمه‌دن، حاجت آلاردی
سائل سسی هر گون قاباقیمدا اوجالاردی
زهرا خانیم هئچ سائلی مأیوس ائلمزدی
«دست کرمین کیسه‌ده محبوس ائلمزدی»
هر دفعه منی بیر اورگیم ایستین آچدی
هرکیم قاپی دوگدی، یکی از پنج‌تن آچدی
گه حضرت زهرا، گه حسین، گه حسن آچدی
قلبیم دوتولان وقتیده بو مطلب آچاردی
دوگسیدی حسین گر قاپینی، زینب آچاردی
افسوس اولا بیر گون غمیلن دولدی بو دنیا
ترک ایلدی بو عالمی شاهنشه بطحا
توش اولدی او گون درد و غمه عترت طاها
گؤزیاشلارینی صورته جاری ائلیوبلر
دیلده باباوای تعزیه‌داری ائلیوبلر
فکر ایلدیم، امّت هامی ایوایه گللّر
افغان ائلیوب آهیله سودایه گللّر
زهرا خانیما عرض تسلّایه گللّر
قارداشسیز اولان بیر باجیا همدم اولاللار
داغلی اورگه غم گونیدی، مرهم اولاللار
اوچ گون اولارا اولدی شریک غم، عوالم
غم غصّه‌دن اوددوتدی منیم غملی وجودیم
حیرانیدیم الله نیه بس گلمدی هئچ کیم
زهرا بالالاری غم طاهاده یانوبلار
پیغمبرین امّت، ندن اوچ گونده دانوبلار؟
بیر گون ولی مین محنتین عنوانی‌نی گؤردوم
ظلم اهلینون اول صورت پنهانی‌نی گؤردوم
اوچ‌یوز نفر عصیانگریلن ثانی‌نی گؤردوم
گؤردوم اولارین دلده نهان کینه‌سی واردی
آل‌الهیلن کینۀ دیرینه‌سی واردی
بو صحنه منیم طاقت و آرامیمی آلدی
عرشه اولارین نعره و فریادی اوجالدی
شرم ائتمدی ثانی او ائوه ولوله سالدی
غملر اوخی اوندا دل پردردیمی دلدی
تحقیق ائده جریانی، خانیم فاطمه گلدی
ثانی نه پیمبردن اوتاندی، نه خدادن
نه شرم ائلدی فاطمۀ خیرنسادن
اود ویردی در خانۀ زهرایه جفادن
دردیم بو دگول من شرر ظلموده یاندیم
بیر ایش او دنی گؤردی که زهرادن اوتاندیم
تکیه ائلمیشدی منه صدّیقۀ اطهر
قویموردی آچیلسون قاپی، اول حیدره یاور
بیر ضربه ولی ویردی او دم ثانی کافر
گل سینه‌سینه ناگه ایتی خار توخاندی
صدر گل پیغمبره مسمار توخاندی
یاننام بو غم و درد و مصیبتدن الاهی
گرچه منه اود ویرمیشیدی فتنه سپاهی
ایستوردیم اولام من خانیمون پشت‌وپناهی
بیلمزدیم ائله ظلم اولار ادوار آراسیندا
زهرا قالاجاقدور در و دیوار آراسیندا
اوچ‌یوز نفر اول لحظه هجوم ایلدی بیردن
بو صحنه‌نی قیل دلده مجسّم، ائله شیون
فریادی اوجالدی خانیمون، یاندیم اودم من
معناده تزلزل گویه، طوفان یئره دوشدی
سیندی صدف طاهره، مرجان یئره دوشدی
زهرا غمی، زخم دل مجروحه نمک‌دی
بو غمده گلن نالیه ارکان فلک‌دی
مندن سوروشان یوخ که خانیم اوندا نه چکدی؟
هر ضربه‌ده بیر سرخط احمر یازیلوردی
کوثر سینه‌سی اوستونه وَانْحَر یازیلوردی
بیر حاله خانیم قالدی که شرحه گله حاشا
اول حاله فغان ائتدی ملک، آغلادی حورا
نه حاله قالار گول که گؤروبسوز ایاق آلتدا
او چکدیگی دردی فقط الله اؤزی بیلدی
بین در و دیواریده، اعضاسی ازیلدی
لوح دلیمه محنت عالم یازیلوبدی
گلسه اوخویار مهدی، نه ماتم یازیلوبدی
یازغیم نه بیلئیدیم بئله پرغم یازیلوبدی
ای کاش یانوب باشدان ایاقه کول اولئیدیم
نه اینکه علی قلبینه من نیسگیل اولئیدیم
- دوشنبه
- 8
- بهمن
- 1397
- ساعت
- 10:48
- نوشته شده توسط
- ابوالفضل عابدی پور
- شاعر:
-
علیرضا حضرتی (ناعمی)
ارسال دیدگاه