حکم قرآندور مسلماندا حجاب اولسون عم اوغلی
باحیا عورت یوزونده بیر نقاب اولسون عم اوغلی
هانسی موجودون که دلده اصطلاحی کیمیادور
گورمیوب چوخ گوز او موجودی نظرلردن خفادور
بیله بیر اکسیردن منظور عصمتدور حیادور
مو به مو واقف گرکدور شیخ و شاب اولسون عم اوغلی
بی خبر انسان اولا بو کنزیدن سرمایه سیزدور
سستدور بنیانی استحکامی یوخدی مایه سیزدور
اولسا بنت عامره حتّی اگر پیرایه سیزدور
ایستر عالی مرتبت عالی جناب اولسون عم اوغلی
مصحف منزلده نسبت عفّته وار هر نه آیات
لازم الاجرادی حکمُ الله گرک اولسون مراعات
کافره مسلم حجابیله ایدر فخر و مباهات
ایستمز معمورۀ مذهب خراب اولسون عم اوغلی
زندگانلیق پرده سیز ایتمز خواتین مجلّل
مخزن ناموس و عفّت درگهین ایتمز مقفّل
وئرمز الدن عصمتین ساخلار اونی مانند مشعل
رهنمای خلق مستقبل حساب اولسون عم اوغلی
ماجرای بیعتین سونمز گوگلدن التهابی
مسجده گئتدیم یوزومده ایلدیم محکم نقابی
قدرت الله اللریندن تا که آچدیردیم طنابی
ائتمدیم طاقت بو قولّاردا طناب اولسون عم اوغلی
بو یدالله اللرون باغلانمادی تک بیعت اوسته
باغلیان آگاهیدی باغلور الون نه حکمت اوسته
بیرده سندن من بُلوردوق باغلیوب حرّیّت اوسته
اختناقه یول آچیلسون فتح باب اولسون عم اوغلی
بو مُبَرهَن دور که فتح مکّه ده ای شیر داور
بو ایکی ال همّتیله سرنگون اولدی صنم لر
نقش طاغوتی داغیتدی نقشۀ الله اکبر
اهل باطل ایستور ایمدی حق مجاب اولسون عم اوغلی
بیر بویوک طومار محنتدور قباله ادّعاسی
یالقوز عورت، ظلم ثانی، کوچه و بازار آراسی
بیر شل اولموش ال جفاسی گوشواره ماجراسی
گور نجه منده دوام و صبر و تاب اولسون عم اوغلی
قابل بخشش دگل بیر عدّه نون جرم و گناهی
درگهیم اوددا یاناندا یاندی قلب ماه و ماهی
آتش ظلمیله یاندی مهبط وحی الهی
وار یری پیغمبرین قلبی کباب اولسون عم اوغلی
کاش درگاهیم یاناندا خیمۀ گردون یانِیدی
نجم تک محنت افولینده دل هامون یانِیدی
نه صدف قلبی سنِیدی، نه دُر مکنون یانِیدی
بیر بئله دلدن گرکمز التهاب اولسون عم اوغلی
کاش گلشنده گُلون هم خانه سی خار اولمیِیدی
آیریلیق، بیرلیق اولِیدی یاریدن یار اولمیِیدی
بیر زمان ساکن اولِیدی چرخ دوّار اولمیِیدی
بو یوزی قاره فلک بی آفتاب اولسون عم اوغلی
ایستوری دست اجل روحی بدندن آیری سالسون
عندلیبی غنچه دن گُلدن چمندن آیری سالسون
محضروندن دویمیان زهرانی سندن آیری سالسون
قویموری کامینجه دلدن کامیاب اولسون عم اوغلی
نیمه جان بسمل اولوب من قالموشام کنج قفسده
جان گئدر تحلیله هضمه درد الیندن هر نفسده
یوخدی یارای تکلّم حیف اولا دوتقون بو سسده
شائقم که چوخ سواله چوخ جواب اولسون عم اوغلی
اگلشوب داغلار بویی داغلی دلیم اوستونده داغلار
لاله تک داغلی گوگل داغلی دل دنیانی داغلار
بیر بیله داغلار قبالینده دوام ائتمزله داغلار
وار یری داغدان بو داغ تک دل مذاب اولسون عم اوغلی
نظمیله نظمه بو شعری «حافظی» صالح سالوبدی
گوئیا روح القدسدن تک به تک الهام آلوبدی
دللرون آچسان بو ایده حکّ اولوب دلده قالوبدی
دادرس ابن ترابه بوتراب اولسون عم اوغلی
- دوشنبه
- 8
- بهمن
- 1397
- ساعت
- 20:8
- نوشته شده توسط
- ابوالفضل عابدی پور
- شاعر:
-
مرحوم حافظی تبریزی
ارسال دیدگاه