گلنده قبر بتوله گئجه امام همام
اولاردی فاطمه نین اسم پاکی تکیه کلام
بو دللریله مخاطب ایدردی دلبرینی
سلام اولا سنه، ای بانوی بلند مقام
دور ای دیَن آتاسی بارها سنه قربان
فدا اولا سنه جان علی،آنام، هم آتام
شمیم جانیله آکنده دور فضای بقیع
بهشت عطری گلور، یادگار خیرالانام
پیمبر عطرینی بیرده بهشت رایحه سین
فراق ختم رسالتده سندن آلدی مشام
سن اولماسیدون اگر فرقت پیمبرده
چتین تحمل ایدردیم، اولاردی سلبِ قِوام
او سخت واقعه نی تازه ایتدی آیریلیقون
اولوب علی ایشی ناله صبح و شام مدام
نولوبدی مین دلیله حالیمی تفقّد ایدن
خموش اولوبدی، یاتوب نازیلن، اولوب آرام
ندن سوروشموسان احوالینی بو خون جگرون
سن ای شهیده ی راه ولایت و اسلام
سوروشما حالیمی قوی شرح ایدوم فراقوندا
نه رنج و زحمتیلن گوندوزوم اولور آخشام
او کیمسه نون که قالا استخوان گلوسینده
گوزونده ده قوم اولا، خوش گیچر اونا ایّام؟
گونوم بو نحویله سنسیز یقین اولور سپری
فراق یاریده خوش گون اولار نگاره حرام
حبیبه سختیدی، جاندان عزیز یاریندن
جواب ایشیتمیه، گوزیاشلی هر نه ایتسه کلام
کیمی قالوبدی علینون، مدینه ده سنسیز
قالان منه بیر اولوب درد و غصه و آلام
بالالارون گونی گوندن خزان اولوب سارالار
اولوبدی هر بیرینون ورد و ذکری ایوای آنام
یتیم اوشاقلاریوین گرچه نازینی چکورم
نقدری یالوارورام اولموری حسین آرام
یوزون قویار قاپیا، های هایلن آغلار
او نوعیلن که یاغار فصل گل اولاندا غِمام
قاریشارام یانان اطفالوه یاناندا دلیم
ایدوم نه چاره دیوبلر، داشار دولان کیمی جام
نقدری سن واریدون داغ کیمین دایانمیشیدیم
یوخ ایمدی من کیمی خیبر شکنده حال قیام
بیلیم بوکولدی اینان بارِ فرقتونده سنون
قالوبدی من کیمی بیر شیرِ شرزه دن قوری نام
علی بُلور نجه شخصیّتی ویروب الدن
بهای هر نفسون فاطمه، تمام نظام
جهانین اهلینه شخصیّتون قالا مجهول
قوروب دسیسه ثقیفه گونونده قوم لئام
بُلوردولر نقدر فاطمه اولا زنده
علینی بیعته مجبور ایدنمز اهل ظُلام
بیر عدّه مردم پیمان شکن ضعیف ایمان
و یا منافق و ظاهرده پیرو اسلام
واریدی بعضیسینون کینه مکه فتحیندن
منیم الیمله اولان گونده منهدم اصنام
ویروبله دست به دست اود ووروبلا درگهیوه
بو فکریله یانا اهل کساء او ایوده تمام
نه چکموسین در و دیوار آرا یاناندا قاپون
بو قدری وار که جوانلیقدا اولدی قدّون لام
گورنده نقش زمین غیرت الله عصمت اللهی
گَلوبدی غیظه علی، جمله ماسوایه امام
همین که بُلدوله پیغمبرین وصیّتی دور
صلاح دیندن اوتور آلمیام الیمه حُسام
(رسن گتوردوله دست خدانی باغلادیلار) (1)
اولوبدی گله ی روباهه شیر ضیغم رام
حمایت ایلینیم بیر او گون منه سنیدون
رهین منّتیوم بانوی خدیو و کرام
سنیله باطل آرا اوندا بیر کشاکش اولوب
ولایت اهلینه واردور او کشمکشده پیام
ئولونجه بوشلامازیدون ولایتین اتگین
سالوبدی فاصله مابینیمیزده ضرب نیام
حیاتیمی سنه زهرا ئولونجه مدیونم
بو ادّعانی بُلور یثرب اهلی خاصّیله عام
دولاندی باشیمه دنیا ویرنده غسلیوی من
قولوندا ظلم اثری منده قویمیوبدی دوام
بیر آیری ظلم اثری آغلادوبدی صبحه کیمین
گرک ئولونجه چخا کهکشانه آه و نوام
عیان اولوب، آیا جلوه ویرن یوزون، نصفین
ندن بولود کیمی دوتموشدی زلف مشکین فام
ئولومدن اوزگه داخی آرزو یوخومدی منیم
حسینه آند اولا گوندوز اولوبدی لیله ی شام
اگرچه مشغله ی کاری چوخدی خدمتی آز
قاپوندا «سالک» اوزون فرض ایدر غلامِ غلام
بُلور که خاطریوی فاطمه چوخ ایستر علی
ویروب قسم ایلیم حل مشکله اقدام
ــــــــــ
(1) خزانیه مرحوم صافی_تبریزی
- چهارشنبه
- 10
- بهمن
- 1397
- ساعت
- 10:13
- نوشته شده توسط
- ابوالفضل عابدی پور
- شاعر:
-
حاج مهدی سالک
ارسال دیدگاه