باشه آز قالوبدور یته منیم
عمر مستعاریم عم اوغلی جان
گل اوتور بیر آز درد دل ایداخ
ای منیم نگاریم عم اوغلی جان
فصل وصل باشه گلور بو دم
گورسنور فراقین علامتی
لطف ایدوب باشیم اوسته گل اوتور
وار عزیزیوین نچه صحبتی
ویرمرم جهانه عم اوغلی جان
من بو لحظه نی بیله ساعتی
باش سنون دیزونده گلم دیله
غملی شهریاریم عم اوغلی جان
سایه سار لطفونده دوقوز ایل
شامل کراماتون اولموشام
دوقوز ایلده شامل عم اوغلی جان
خاصه عنایاتون اولموشام
ای غریب بو شهر بی وفا
عاشق کمالاتون اولموشام
آغلیوب بیله ناله ایلمه
ای ئورک قراریم عم اوغلی جان
آغلیاندا سن من دوزنمورم
ای قرار و صبریله طاقتیم
آغلاما عم اوغلی مریضيیم
جسمیده واریمدور جراحتیم
گوینیور یارام آغلیانده سن
آرتوری بو قلبیمده محنتیم
دردو غصه دن جانه دویموشام
سولدی گل عذاریم عم اوغلی جان
گلستان و باغ پیمبره
گرچه من اوزوم بیر گلم ولی
گلستانیوه باغبان سنون
اولموشام بو مدتده یا علی
گل کیمی سارالدیم عم اوغلی من
گور نه ظلم ایدوبدور جفا الی
یاننام آغلارام من بو محنته
سولدی لاله زاریم عم اوغلی جان
نازیله بالا بسلدیم ولی
گورمدیم ثمر من بو زحمته
صبر ایدوب دایاندی عم اوغلی جان
عم قیزون هامی رنج و محنته
من فقط بو درده دوزنمورم
گوز یاشیم آخور غملی صورته
فاطمه ئولور تک قالور علی
ای یگانه یاریم عم اوغلی جان
عمرومون گونی آز قالور باتا
گل بو دمده رفع ملال ایله
حقیمی حلال ایلدیم سنه
سنده حقوی گل حلال ایله
صون نفسده ای شاه ذوالکرم
لطف ایدوب بیر آز سن مقال ایله
حسرتیله باخما که قالموری
دیلده اختیاریم عم اوغلی جان
گل دیله دانیش سویله دل سوزون
ای سوزی ئورک تاب و طاقتی
فاطمه فدا جانیوه سنون
ای خدای سبحانون حجتی
روحیمه صفا آرتیرار سسون
لطفیله آزات دیلده رقتی
روحیمه صفا ویر دوباره ای
یار تاجداریم عم اوغلی جان
گرچه غم منیم حالیمی پوزوب
پوزما سن بو نوعیله حالتون
آغلاما علی قوی من آغلیوم
گوز یاشیله ایسلاتما صورتون
یاندیرار دل اهل عالمی
یا علی سنون درد غربتون
من غریب سنده غریب سن
دوندی روزگاریم عم اوغلی جان
نچه وقتیدور که مریض اولوب
غصه یاندیروب قلب زاریمی
یوخدی بو ایوه بیر گلوب گیدن
سولدوروبدی محنت بهاریمی
آز قالور غریبانه جان ویرم
باغلا دیده اشگباریمی
قورتولا غم و غصه دن منیم
بو دل هزاریم عم اوغلی جان
من بابام فراقینده هر گئجه
اشگیمی بو رخساره باغلارام
دویمارام نقدر آغلیام اگر
جانیدن دویوب سینه داغلارام
دویمادیم ولی من بو دهریده
سن کیمی نگاریمدان آغلارام
خون دلدی رخساریمه توکور
چشم در نثاریم عم اوغلی جان
یا علی یقینیمدی فاطمه
سن کیمی نگاره حبیبه دور
آیریلیق چتین دردیدور ولی
دل دوامی لازم شکیبه دور
فرقتیمده چوخ آغلاما علی
فرض ایله ئولن بیر غریبه دور
صبر قیل بو هجرانه آغلاما
یار غمگساریم عم اوغلی جان
درک ایدن زماندان حضوریوی
ای ولی خلاق ذوالکرم
اولمیوب بو مدتده خواهشیم
سندن ای شهنشاه محتشم
وار ولی بو ساعتده خواهشیم
قلبیوی اگر دولدورار الم
قیل تفضل احوالیمه منیم
سید کباریم عم اوغلی جان
من که ترک قیلدیم بو عالمی
قویما غم ئورک تابیوی آلا
یا گئجه زمانی عم اوغلی جان
آیریلیق سنی محنته سالا
غسل کوینگ اوستن علی منه
ویر که بعضی سریم نهان قالا
حالیمی رعایت ایله منیم
اولما اشگباریم عم اوغلی جان
بیرده قیل کفن جسمیمه اوزون
نصف شب هامی گوز یاتان زمان
لطفویله پوزقون بو جسمیمی
یا علی اوزون قبره قوی نهان
بولمسونله تشیعیمی منیم
درگهیمی ظلمیله یاندیران
ایستورم که گیزلین بو دهریده
تا قالا مزاریم عم اوغلی جان
تاپشوروم سنه بیرده یا علی
قالدی سنله بو دوت بالام منیم
گل کیمی اگرچه سولوبدولار
قویما چوخ سولا غملی گلشنیم
هر بیری صفا دور بو روحیمه
تک تکی منیم پاره تنیم
گوز ایوینده ساخلا بالالاری
یار دلفکاریم عم اوغلی جان
بو (نوین) نه مدتدی یا علی
وار سنه ئورکدن ارادتی
آرزوسی واردور بو جمعیله
ایستیور مدینه زیارتی
ایسته ذات حی ودودیدن
قالماسین ئورکده بو حسرتی
تا یتورسین آمالینه اونی
حی کردگاریم عم اوغلی جان
- جمعه
- 12
- بهمن
- 1397
- ساعت
- 15:2
- نوشته شده توسط
- ابوالفضل عابدی پور
- شاعر:
-
علی نوروزی (نوین)
ارسال دیدگاه