گل ایدیم وصیتمی یوموم
گوزومی جهاندان عم اوغلی جان
بو آز عمروم آخرینه چاتوپ
یورولوب زماندان عم اوغلی جان
گوزونی یوماندان آتام منیم
محن زمانه یه دوزموشم
آپاراندا مسجده بیعته
سنی تازیانه یه دوزموشم
آلونوبدی حق مسلمون
غم بی کرانه یه دوزموشم
شرر آسمان لارا قوزانوب
در دودمان دان عم اوغلی جان
ییتیشیبدی غصه نهایته
غلیان ایدور اورگیم غمی
خفقان یاراندی سقیفه دن
بیزه یوز گتوردی بلا یمی
آلونوب فدک نه گلوب منه
دیمیرم دا آیریلیقین دمی
گونوزوم قرانلیق اولوب منیم
غم بی کراندان عم اوغلی جان
اریین وجودیمه غسل ویر
گیجه کفن ایله گیجه دفن ایله
اورگیم رضا دگول اهل کین
بیری قبریمین یرینی بیله
نه روا که غاصب حقیمیز
ستمیله مجلسیمه گله
دوشه جکدی روحوم عذابه چون
او گلن زاماندان عم اوغلی جان
بالالاری حد بلوغه من
ییتیرنمدیم اورگیم قالوب
نه لر اولدی محسنی عالمه
گتیرنمدیم اورگیم قالوب
یارالاریمین چوخونی علی
ایتیرنمدیم اورگیم قالوب
آیین ایشیقی دیه جاق سنه
خبر نهاندان عم اوغلی جان
لحظات آخر عمریدی
باشیم اوسته باشلا تلاوتی
اوخودوقجا آیه به آیه سن
منه وار بیر آیری حلاوتی
گوزیوین یاشین ایلمه روان
اونا یوخ بتولیده طاقتی
او قدر که ظلم اولونوب سنه
منی سالدی جاندان عم اوغلی جان
بو بلالی عالمی ترک ایدیب
گیدیرم اورکده ولی نوا
بالالاریمین نگرانیم
اولاری مباد حزین اولا
منیم آخرین گوروشیمدی بو
اولا وعده میز داخی کربلا
نه چکر بو گوللریم اول زمان
ید کوفیاندان عم اوغلی جان
گزه جکدی روحوم او چوللری
اورگیم قرین اولا محنته
نه بلالره دوشه جکدیلر
بالالار دءوزر نه جنایته
او مناظری گوروب آغلارام
اورا اوخشار عین قیامته
او دیاره گلسن حمایت ایت
من باغریقاندان عم اوغلی جان
اولاجاقدی تکجه خدا فقط
او بلالی چولده مخاطبیم
باتاجاق او وادی ظلم ده
همی آی گونوم همی کوکبیم
شرر مصایب بی حده
یاناجاق حسینیله زینبیم
نیجه ظلم ایدر نه جوره گیچیم
من او سارباندان عم اوغلی جان
گله جاق او وادی ظلمته
دگه نظمی بیر بیره آفاقین
گزه جاق وجب به وجب چولی
چیخا تا غنیمتی توپراقین
اوزوگه گوره او حسینیمین
کسه جاخدی ظلموله بارماقین
گیچیده له اهل و عیالینی
او همان مکان دان عم اوغلی جان
هامی روزگاری بو شاعرین
سپری اولوب دی گناهیلن
عرصاتیده گوزی بیزده دی
گله جاقدی روی سیاهیلن
صفحات دفتر شعر یده
یازیلیبدی سوزش و آهیلن
متنعم ایلییروخ اونی
خبر جنان دان عم اوغلی جان
- جمعه
- 12
- بهمن
- 1397
- ساعت
- 15:3
- نوشته شده توسط
- ابوالفضل عابدی پور
- شاعر:
-
کربلایی رحیم شایان
ارسال دیدگاه