آئینۀ صانعدی یقین طلعت زهرا
دنیانی سالوب حیرته شخصیّت زهرا
یوخ حاجتی تعریفیده اثبات دلیله
بیر نور منزّهدی او بانوی جلیله
اسباب مباهاتدی اولاد خلیله
پیغمبره عزّت گَتیرور عزّت زهرا
تاویل اولونوبدور آدینا کلمۀ علیا
اوز صدقینه مصداقیدی صدّیقۀ کبری
افلاکیده مشهور اولونوب زهرۀ زهرا
دنیایه معرّفدی همان شهرت زهرا
مظهردی جلالتده خداوند جلاله
فائزدی کمالاتیده سرحدّ کماله
شایسته دی فخر ایلسه نسوان رجاله
زهرائیله چون نادره دور خلقت زهرا
عالم متواضعدی بو خاتون عظامه
سرگشته دی تحریرِ مقاماتینه خامه
دنیا یازا مشکل یتیشه مدحی تمامه
مقدور دگل هر دلیله صحبت زهرا
ماهیّتینی تا یارادوب حیّ توانا
انواری ایدوب چشم عوالمده تجلّی
بیر پرده سالوب نوریدن آخِر حق یکتا
تا قابل ادراک اولونا رویت زهرا
پیغمبر رحمت شرف عالم امکان
ایستردی ایده بو خانمون شانینی اعلان
دائم بویوراردی آتاسی بو قیزا قربان
بوردان بُلونور وار نه قدر شوکت زهرا
منصوره ده شخصیّته باخ مظهر آیات
بیر معنی کوثرله ایدر فخر و مباهات
مسجدده گیدوب حقّین ایدن وقتیده اثبات
غاصبلری رسوا ایلدی حجّت زهرا
بو نکته مسلّمدی تواریخ و مثلدن
بو کج دولانان کج دولانوب روز ازلدن
یارب او جفاجو شل اولیدی ایکی الدن
هتک اولدی همان اللریله حرمت زهرا
شرم ایتدی نه حقدن و نه زهرادن اوتاندی
گَلدی او ملائک دایانان درده دایاندی
بیر جنگ و جدل باشلادی آخِر قاپی یاندی
فریادینه مستوجب اولوب شدّت زهرا
اجباریله مرضیّه نون آرامینی آلدی
ناموس و حیا هیکلینی توپراقا سالدی
گَل فضّه سسی دخت پیمبردن اوجالدی
بیتاب ایلدی فضّه نی بو دعوت زهرا
درک ایتدی بُلوب صورت احوالینی فضّه
مقهور تاپوب شاهد آمالینی فضّه
اوز زلفی تک آشفته ایدوب حالینی فضّه
پوزدی پوزولان حالتینی حالت زهرا
سسلندی گَل ای شیرخدا حجّت برحق
طغیان ایلدی ظلمیده بو جاهل مطلق
اولدی خانمیم فاطمه نین مرگی محقّق
وار سینه ده قطعی اثر رحلت زهرا
#خوندل اولا هر کیمسه ده تقوا و فضیلت
توهین ایلمز اوزگیه از روی جهالت
منصوره ده باخ گور نه قَدَر واردی جلالت
دنیانی سالوب حیرته شخصیّت زهرا
- جمعه
- 12
- بهمن
- 1397
- ساعت
- 15:13
- نوشته شده توسط
- ابوالفضل عابدی پور
- شاعر:
-
مرحوم حاج حیدر شبگرد
ارسال دیدگاه