سنسیز آنا یا فاطمه
تا جاندا وار جان آغلارام
سالام خیاله غملرین
گوزدن توکوب قان آغلارام
خوش روزگاره ایلدی چرخ دنی حسرت سنی
اولدی بهارینده خزان ظلمیله عمرین گلشنی
قویدون یرینده نایبه ای غمکش دوران منی
سندن صورا گلمز یوزوم هر لحظه هر آن آغلارام
بو محنتین یاد ایلرم جدّیم پیمبردن صورا
یاندون آنا درگاهیوه اود ووردولار اهل جفا
بین در و دیواریده قالدون همان ساعت آنا
بطنینده سقط اولدی بالان سن ایتدون افغان آغلارام
ثانی جفاسین یادیمه سالدوقجا گلّم شیونه
ووردی او ظالم ظلمیله بیر ضربت سیلی سنه
گول برکی تک تر صورتین دوندی آناجان سوسنه
باغرین او غمده غنچه تک اولدی آنا قان آغلارام
یالقوز آناسیز قیزلارین هرگز یوزی گولمز آنا
سنسیز جهاندا صاق قالوب زینب ندن ئولمز آنا
من تک آناسیز قالمیان احوالیمی بُلمز آنا
تک ایوده یوز دیواریده زار و پریشان آغلارام
سندن جهاندا آلموشام درد و بلا سر مشقینی
عالملره ویرّم نشان صبر و وفا سر مشقینی
قاپون یانان گون ایلدیم من کربلا سر مشفینی
دشت بلانین غملری باشلاندی بوردان آغلارام
سن تک منیمده قسمتیم اولموش ازل گوندن بلا
شوریده باشیمده اودور واردور هوای کربلا
دل وئرمیشم روز ازل هر بیر بلایه برملا
گورسم حسینین نعشینی القانه غلطان آغلارام
فریاد او ساعتدن تاپار زینب یارالی قارداشین
عریان یارالی بیکفن باغلار عذاره گوز یاشین
آیا نجه صبر ایلسون گورسه کسوب قارداش باشین
اوّل گیجه خولی ائدوب کول اوسته مهمان آغلارام
#اشکی کلامین ایسته سن اولسون ملیح و دلنشین
نعمتدی حق لطف ایلیوب بُل طبع شعرین قیمتین
باخما هوای نفسه دوت محکم حسینین دامنین
یاز سوز یازاندا اشکیله عرض ائت حسین جان آغلارام
- شنبه
- 13
- بهمن
- 1397
- ساعت
- 20:9
- نوشته شده توسط
- ابوالفضل عابدی پور
- شاعر:
-
حاج مجید بدایعی
ارسال دیدگاه